(ەلىمىزدەگى جول كولىك وقيعاسى سالدارىنان قايتىس بولعانداردىڭ جارتىسى جاستار)

سوڭعى 17 جىلدا 270 مىڭ جول-كولىك وقيعاسى تىركەلىپ، 49 مىڭ ادام قايتىس بولسا، 300 مىڭنان استامى ءتۇرلى دەڭگەيدە جاراقات العان. وكىنىشتىسى، قازا تاپقانداردىڭ 50 پايىزى جاستار. بۇل تۋرالى ورتالىق كوممۋنيكاتسيالار قىزمەتىندە وتكەن ءباپاسوز ماسليحاتىندا جول اكتيۆتەرى  ۇلتتىق ساپا ورتالىعىنىڭ باس ديرەكتورى زامير ساعىنوۆ مالىمدەدى.

ازيا دامۋ بانكى جۇرگىزگەن زەرتتەۋلەرگە سايكەس، جول-كولىك وقيعالارى سالدارىنان, ەلىمىزدىڭ ەكونوميكاسى 9 ميلليارد اقش دوللارىنا پارا-پار زارداپ شەگىپتى.

ال ادام شىعىنى بويىنشا قازاقستان 175 ەلدىڭ ىشىندە قايتىس بولۋ كورسەتكىشتەرى بويىنشا 17,6 رەيتينگىمەن 74-ءىنشى ورىندا تۇر. مىسالى; رەسەي (18), وزبەكستان (11,5), بەلارۋس (8,9). قاۋىپسىز ەلدەر رەيتينگ كورسەتكىشتەرىن 5,5 ادام شىعىنىمەن ەۋروداق باستاسا، مەيلىنشە ناشار كورسەتكىشتەر افريكا مەن لاتىن امەريكا ەلدەرىندە كورىنەدى.

جۇرگىزۋشىلەردىڭ  جاۋاپسىزدىعى سالدارىنان تالاي ادام اجال قۇشىپ جاتادى. قازاقستاندا «جول ءجۇرۋ مادەنيەتى» قالىپتاسپاعان، - دەگەن زامير ساعىنوۆتىڭ ايتۋىنشا، - كولىك اپاتتارىنىڭ نەگىزگى سەبەپتەرى جىلدامدىقتى تىم ارتتىرۋ. بارلىق جول-كولىك اپاتتارىنىڭ 30 پايىزى ناق وسى جىلدامدىقتى شەكتەن تىس ارتتىرۋدان ورىن الۋدا. سوندىقتان جول ينفراقۇرىلىمىن ساپالى سالۋمەن قاتار، جىلدامدىقتى قاتاڭ باقىلاۋدا ۇستاۋ – جول قاۋىپسىزدىگىن ارتتىرۋدىڭ ماڭىزدى قۇرالى.

وتكەن 9 ايدا «نۇرسۇلتان-ششۋچە» جول ۋچاسكەسىندە جىلدامدىقتى ساعاتىنا 150 شاقىرىمنان جوعارى ارتتىرۋدىڭ 8280 فاكتىسى تىركەلگەن. ءتارتىپ بۇزۋشىلىقتىڭ 58 جاعدايىندا جىلدامدىق ساعاتىنا 200 شاقىرىمنان اسىپ تۇسسە، بمۆ ماشيناسىمەن ءبىر جۇرگىزۋشى ساعاتىنا 238 شاقىرىمدىق جىلدامدىقپەن جۇرگەنى انىقتالىپ وتىر. وسى ۋچاسكەدەگى تىركەۋ كامەرالارىنىڭ، اكىمشىلىك پوليتسيا كوميتەتىنىڭ دەرەكقورىمەن بىرىكتىرىلمەۋى سالدارىنان، زاڭ بۇزۋشىلاردىڭ تالايى جازادان قۇتىلىپ كەتۋدە، - دەيدى ز. ساعىنوۆ.

جول اكتيۆتەرىنىڭ ۇلتتىق ساپا ورتالىعى قازان ايىندا بەلگىلەر مەن تاڭبالاردىڭ ساپاسىن باعالاۋعا ارنالعان جالپى رەسپۋبليكالىق اكتسيا وتكىزدى. تەكسەرىلگەن 5 مىڭعا جۋىق بەلگىلەردىڭ 46 پروتسەنتى نورماعا سايكەس ەمەس. 1620 شاقىرىم جول بەلگىلەرىنىڭ 251 شاقىرىمى ستاندارتقا ساي ەمەس. قالا كوشەلەرى بويىنشا بەلگىلەردىڭ 50 پايىزى جانە تاڭبالاردىڭ 40 پايىزى ستاندارتقا ساي بولماي وتىر.

- كەلە جاتقان جۇرگىزۋشى بەلگىنى كورمەسە، ول قالاي دەر كەزىندە شەشىم قابىلداي الادى؟ بۇل دا نازاردا بولۋ كەرەك دەپ سانايمىن - دەيدى زامير ساعىنوۆ، - ەلىمىزدە «جول مادەنيەتىن قالىپتاستىرۋ» باعىتىندا ىشكى ىستەر مينيسترلىگى جانە باسقا دا ءتيىستى مەكەمەلەر تاراپىنان كوپ جۇمىستار اتقارىلىپ كەلەدى. ءبىز دە وسى باعىتتا جۇمىس جاساپ جاتىرمىز، ءالى دە جالعاستىرماقپىز. ماقساتىمىز، ازاماتتارعا جول قاتەلىكتى كەشىرمەيتىنىن تۇسىندىرگىمىز كەلەدى. ءوز ءومىرىمىز ءۇشىن، ارقايسىمىز - ءوزىمىز جاۋاپتىمىز. وسىنى ءار ازاماتتىڭ ساناسىنا قۇيساق دەيمىز.

Abai.kz