29 قازاندا رۋسلان قازاقباەۆ نۇر-سۇلتانعا رەسمي ساپارمەن بارىپ، قازاقستاندىق ارىپتەسى مۇحتار تىلەۋبەردىمەن كەزدەسكەن.
كەزدەسۋ بارىسىندا ساياسي، ساۋدا-ەكونوميكالىق، مادەني-گۋمانيتارلىق جانە ميگراتسيالىق سالادا قىرعىز-قازاق ىنتىماقتاستىعى ءسوز بولعان.
"ەلدەگى الەۋمەتتىك-ەكونوميكالىق جاعدايعا بايلانىستى رۋسلان قازاقباەۆ قىرعىز تارابىنا قارجىلاي-تەحنيكالىق كومەك كورسەتۋدى سۇرادى", - دەلىنگەن حابارلامادا.
بۇدان بولەك ەكى ەل اراسىنداعى شەكارادا جۇك وتكىزۋ كەزىندە بولاتىن قيىندىقتاردى جويۋ ماسەلەسى تالقىلانعان. قىرعىز تارابى جۇك وتكىزۋدە بىرىڭعاي الگوريتم جاساۋدى ۇسىنعان. سونىمەن بىرگە شەكارا ايماعىنان اۋىل شارۋاشىلىعى ونىمدەرىن ەكسپورتتاۋ ءۇشىن بىرلەسكەن ساۋدا-لوگيستيكالىق ورتالىق اشۋ ۇسىنىلعان.
سۋ-ەنەرگەتيكالىق ماسەلەلەر دە ءسوز بولعان. كەزدەسۋ قورىتىندىسىندا باۋىرلاس ەكى ەلدىڭ قارىم-قاتىناسى ودان ءارى بەرىك دامي بەرەتىنىنە سەنىم بىلدىرگەن.
Abai.kz
