ايتىسكەر اقىن، «اسىل ارنا» ءدىني تەلەارناسىن باسقارعان مۇحامەدجان تازابەكتىڭ توڭىرەگىندە ۇزاق جىلعا سوزىلعان ءدىني داۋعا بيلىك نۇكتە قويدى. ورتالىق كوممۋنيكاتسيالار قىزمەتىندە 7 قاراشا كۇنى وتكەن ءباسپاسوز ءماسليحاتى بارىسىندا م.تازابەك و باستان ءدىني باسقارمامەن بىرلەسىپ ءتۇرلى جوبالاردى ىسكە اسىرىپ كەلە جاتقانىن، الايدا قاڭقۋ سوزدەر دە كوپ بولعانىن ايتا كەلىپ:

«قازاقستان مۇسىلماندارى ءدىني باسقارماسىمەن ءبىر باعىتتا، ءبىر شاريعاتتا كەلە جاتىرمىن. مەندە باسقا باعىت، باسقا جول جوق» - دەپ مالىمدەدى.

وسىلايشا، اركەز قوعامدا ءتۇرلى داۋ-دامايدىڭ كوزى بولىپ كەلگەن كۇرمەۋى قيىن، شەشىلمەستەي كورىنگەن ءدىني شەتىن ماسەلەنى بيلىك ءبىرجولا نۇكتە قويىپ، شەشىمىن تاپتى.

بۇعان دەيىن ءمالىم بولعانداي، ءدىني باسقارما «حالىق ارناسى» اتتى جاڭا ءدىني ارنا اشىلىپ، «اسىل ارنا» تەلەارناسى جابىلدى. جانە دە مۇحامەدجان تازابەك ارنايى مالىمدەمە جاساپ، ءدىني سەنىمىنە قاتىستى جاريا كوزقاراسىن ايتقان ەدى.

«سوڭعى 7-8 جىلدا وسى ماسەلەنى زەرتتەۋمەن اينالىسىپ، اللا رازى بولسىن سوڭعى نۇكتەسىن ناۋرىزباي حازىرەت قويىپ وتىر. ويتكەندە وسىعان بايلانىستى سوڭعى ءبىر كۇماندارىم، سوڭعى ءبىر سەيىلمەي تۇرعان دۇنيەلەرىمدى بۇ كىسى اق قاراسىن، اماناتىن موينىنا ارقالاپ وتىرىپ ايتىپ، ءتۇسىندىرىپ مەن ءبىر بارماعان بۇرىشتار مەن دۇنيەلەر بار ەكەن، كۇمانىمدى كەتىردى» دەگەن ەدى ول.

سونداي-اق ورتالىق كوممۋنيكاتسيالار قىزمەتىندە 7 قاراشا كۇنى وتكەن ءباسپاسوز ءماسليحاتىندا قمدب توراعاسىنىڭ ورىنباسارى ەرشات وڭعاروۆ: «اسىل ارنا» تەلەارناسىنىڭ ديرەكتورى مۇحامەتجان تازابەكوۆ قمدب جانىنداعى عۇلامالار كەڭەسىنىڭ وتىرىسىنا كەلىپ مالىمدەدى. تىرنەكتەپ جيناعان كونتەنتتىك ءارحيۆىن «حالىق ارناعا» تولىق تاپسىراتىنىن ايتتى. مۇحامەتجانعا وسىنداي كەمەڭگەرلىك كورسەتكەنى ءۇشىن ءدان ريزامىز» - دەدى.

ال مۇحامەدجان تازابەك بولسا، «ءتالىمتۆ» ارناسى جايلى دا ايتتى.

«ءتالىم تۆ» تەلەارناسى الەۋمەتتىك رولدىك مودەلدەردى ۇسىناتىن موتيۆاتسيالىق كونسەرۆاتيۆتى الاڭعا اينالادى دەگەن ويدامىن. تەلەارنا سالاسىندا 10 جىلدىق تاجىريبەممەن قاجەت بولعان جاعدايدا «حالىق ارنا» تەلەارناسى ءۇشىن دە بولىسۋگە دايىنمىن» دەدى ول.

دەرەككوز: arasha.kz

Abai.kz