25 قاراشادا «Nur Otan» پارتياسى كەزەكتەن تىس XX سەزىن وتكىزىپ، پارتيالىق تىزىممەن ءماجىلىس دەپۋتاتتىعىنا كانديداتتاردى بەكىتتى.

اتالعان تىزىمدە بۇرىنعى سەنات سپيكەرى، «Nur Otan» پارتياسىنىڭ توراعاسى نۇرسۇلتان نازارباەۆتىڭ ۇلكەن قىزى داريعا نازارباەۆا دا بار ەكەن.

ودان بولەك ۇكىمەت باسشىسى اسقار مامين، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك، «سامۇرىق-قازىنا» ۇلتتىق ءال-اۋقات قورى» اق باسقارماسىنىڭ توراعاسى احمەتجان ەسىم، ءماجىلىستىڭ قازىرگى سپيكەرى نۇرلان نىعماتۋللين سىندى قازاق بيلىگىندە بۇرىننان جۇرگەن ازاماتتاردىڭ اتى اتالعان.

بيىل مامىر ايىنىڭ باسىندا سەنات سپيكەرى قىزمەتىنەن كەتكەن نازارباەۆانى كوپشىلىك ۇمىتا باستاعان. بىراق بۇرىنعى پرەزيدەنتتىڭ قىزى ەل نازارىنان مۇلدە شىعىپ قالعان جوق. بىردە ياحتادا ءان ايتىپ, بي بيلەپ جۇرسە، ەندى بىردە شەتەلدەگى دۇنيە-مۇلكىنە قاتىستى بىتپەيتىن داۋمەن ءباسپاسوز بەتىنە شىعىپ تۇردى. الايدا مەملەكەتتىك قىزمەتتەن الىس جۇرگەن نازارباەۆانى مۇنداي اڭگىمەلەر ساستىرماعانى ءسوزسىز. ويتكەنى، داريعا حانىم بيلىكتە جۇرگەن كەزدىڭ وزىندە ەلدى «ەسىنەن تاندىراتىن» مالىمدەمەلەر جاساۋمەن اتى شىققان كىسى.

بىرنەشە اي ءۇنسىز جاتقان داريعا نازارباەۆا ۇلكەن ساياساتقا قايتا ورالدى. ونىڭ قايتا اتقا قوناتىنى جايلى وسىدان ءبىراز ۋاقىت بۇرىن الەۋمەتتىك جەلىدە اقپارات تاراعان. كەيبىر ساراپشىلار «نۇر وتان» پارتياسىنىڭ سەزىندە «پارتيانى قالپىنا كەلتىرۋ» جۇمىسىن ءساتسىز اياقتاعان باۋىرجان بايبەك قىزمەتىنەن بوساتىلىپ، ونىڭ ورنىنا نازارباەۆا كەلەدى دەپ بولجاعان.

الايدا اكەسى باسقاراتىن پارتيا نازارباەۆاعا باسقا قىزمەت ۇسىندى. ول ەندى «نۇر وتان» پارتياسىنىڭ ءبىرىنىش ورىنباسارى دا ەمەس، ەلشى دە، بيزنەسۆۋمەن دە ەمەس، ءماجىلىس دەپۋتاتى بولعالى وتىر. بىراق داريعا حانىم ماجىلىسكە بارسا، قاتارداعى قاراپايىم دەپۋتات بولمايدى دەپ سانايتىندار كوپ. ولاردىڭ ويىنشا، نازارباەۆاعا ءماجىلىس توراعاسى قىزمەتىن اتقارۋى مۇمكىن.

قالاي دەسەك تە، داريعا نازارباەۆا ۇيىندە ۇزاق جاتا المادى. سەنات سپيكەرى قىزمەتىنەن بوساعانىنا تۋرا جارتى جىل تولعاندا ساياسات ساحناسىنا قايتا شىعىپ وتىر. ونىڭ قايتا ورالۋى قانداي ناتيجە بەرەرى ازىرگە بەلگىسىز. ءبىر انىعى كەي ساراپشىلار بولجاعانداي ساياسي كارەراسى جاقىندا اياقتامايتىن سەكىلدى...

قۋانىش قاپپاس

Abai.kz