مۇنىڭ الدىندا ەلدىڭ سىرتقى ىستەر مينيسترلىگى دە عالىمنىڭ ولىمىنە ء"يزرايلدىڭ قاتىسى بار" دەگەن. يسلام رەسپۋبليكاسى باسشىسىنىڭ اسكەري كەڭەسشىسى حوسەين دەحكان بۇل قاستاندىق ءۇشىن كەك الاتىندارىن مالىمدەگەن.

يران يادرولىق باعدارلاماسى باسشىلارىنىڭ ءبىرى ايزيك موحسەن فاحريزادە تەگەران ماڭىندا قاستاندىقپەن ءولتىرىلدى. ەلدىڭ Fars اقپارات اگەنتتىگىنىڭ حابارلاۋىنشا، الدىمەن وقيعا ورنىندا جارىلىس بولىپ، سودان سوڭ اۆتوماتتان وق اتىلعان. اقپارات اگەنتتىگىنىڭ مالىمەتى بويىنشا، بەلگىسىز ادامدار فاحريزادە وتىرعان كولىككە وق اتقان. فيزيك عالىم جاراقات الىپ، اۋرۋحاناعا جەتكىزىلگەن سوڭ كوز جۇمعان.

فاحريزادە بۇرىن يسلام رەۆوليۋتسياسىن قورعاۋشىلار كورپۋسىندا قىزمەت ەتكەن، يران قورعانىس مينيسترلىگىندە جوعارى لاۋزىمداردا بولعان جانە فيزيكالىق زەرتتەۋ ورتالىعىن باسقارعان. بۇۇ-نىڭ يراننىڭ يادرولىق باعدارلاماسى جونىندەگى 2004 جىلعى قارارىندا ونىڭ ەسىمى العاش رەت اتالادى.

ازاتتىقتىڭ يران قىزمەتى سوڭعى جىلدارى باسپاسوزدە ءيزرايلدىڭ فاحريزادەنى ولتىرۋگە تىرىسقانى جونىندە اقپارات شىققانىنا نازار اۋدارادى. بۇدان بۇرىن يزرايل پرەمەر-ءمينيسترى بينيامين نەتانياحۋ فاحرەزادە يادرولىق وقتۇمسىق جاساۋ جونىندەگى قۇپيا باعدارلامانى باسقارادى دەگەن.

يزرايل باسشىلىعى ازىرگە بۇل وقيعاعا قاتىستى مالىمدەمە جاساعان جوق.

باتىس ەلدەرىنىڭ بارلاۋشىلارى 1980 جىلداردىڭ سوڭىنان باستاپ يراننىڭ قۇپيا يادرولىق باعدارلاماسى بار ەكەنىن ايتىپ كەلەدى. بىراق 2009 جىلدان بەرى اتوم ەنەرگياسى جونىندەگى حالىقارالىق اگەنتتىك (ماگاتە) ساراپشىلارى بۇعان ەشقانداي ايعاق تاپقان جوق. تەگەران تەك بەيبىت ماقساتتاعى يادرولىق باعدارلاما جاساپ جاتقانىن ايتۋمەن كەلەدى.

• 2015 جىلى اقش، رەسەي، قىتاي، ۇلىبريتانيا، گەرمانيا جانە فرانتسيا يرانمەن يادرولىق كەلىسىمگە كەلگەن. يران حالىقارالىق سانكتسيالاردى الىپ تاستاعان جاعدايدا يادرولىق قارۋ جاساۋعا جەتەرلىك دەڭگەيدە ۋران وڭدەۋدەن باس تارتۋعا ۋادە بەرگەن.
• 2018 جىلى اقش بۇل كەلىسىمنەن ءوز بەتىمەن شىعىپ، يرانعا قارسى سانكتسيانى كۇشەيتە ءتۇستى. وسىنداي قىسىمنىڭ كومەگىمەن ۆاشينگتون تەگەراندى جاڭا كەلىسىمگە قول قويۋعا كوندىرۋگە تىرىسقان. ول كەلىسىم تەك يادرولىق باعدارلاما ەمەس، زىمىران جاساۋدى دا قاتىسۋى ءتيىس ەدى.
• باتىس بارلاۋشىلارى "يران بومباسىنىڭ اتاسى" دەپ اتاپ جۇرگەن فاحرەزادەنىڭ ءولتىرىلۋى اقش-تىڭ جاڭا سايلانعان پرەزيدەنتى دجو بايدەننىڭ يرانمەن ارادا ديپلوماتيالىق قاتىناستى جاقسارتۋ نيەتىنە كەدەرگى جاساۋى مۇمكىن. بايدەن يراننىڭ يادرولىق باعدارلاماسى جونىندەگى كەلىسىمگە قايتا قوسىلۋعا تىرىساتىنىن ايتقان.