اسىل دا ارداقتى اتا ءدىنىمىز يسلامدى ۋاعىزداپ، حالىق كوكەيىنە تۇشىمدى تۇردە  جەتكىزۋ ماقساتىندا وبلىستىق ورتالىق «نۇر عاسىر» مەشىتى جانىنان ۇگىت-ناسيحات توبى قۇرىلىپ، اۋدانداردا ۋاعىز ايتۋ جوسپارى جاسالعان ەدى. وسى يگى ءىس-شارانىڭ ىزىمەن جاقىندا قوبدا، ويىل اۋداندارىندا كەزدەسۋلەر ءوتتى. كەزدەسۋگە وبلىستىق ورتالىق «نۇر عاسىر» مەشىتىنىڭ باس يمامى باۋىرجان قاجى ەسماحان، نايب يمام عابيت قاجى ماتكاريموۆ، وبلىستىق ادىلەت دەپارتامەنتىنىڭ ءدىني ىستەر جونىندەگى ءبولىمىنىڭ باستىعى جانە اتالعان ءبولىمنىڭ جەتەكشى مامانى رۋسلان قۇلدىباەۆ پەن ءدىنتانۋشى تولەگەن تالدىباەۆ جانە باسقالار قاتىستى.
كەزدەسۋلەرگە جەرگىلىكتى اتقارۋشى جانە قۇقىق قورعاۋ ورگاندارى، باق وكىلدەرى مەن ءدىني بىرلەستىكتەردىڭ جەتەكشىلەرى جانە اۋدان اقساقالدارى قاتىستى. جيىندار كەزىندە وبلىستىق ورتالىق «نۇر عاسىر» مەشىتىنىڭ باس يمامى باۋىرجان قاجى ەسماحان «يسلام - ىنتىماق ءدىنى» اتتى بايانداما جاسادى. جاماعاتتى يماندىلىققا، ىزگى امالدار جاساۋعا، اقيقاتپەن جۇرۋگە، ءدىن جولىنداعى تۋىنداعان قيىندىقتارعا سابىر ەتۋگە شاقىردى. اللاھتىڭ دىنىنە جاردەم بەرۋشىلەرگە اللانىڭ ءوز جاردەمىن بەرەتىندىگىن جەتكىزدى. ءدىني ماسەلەلەر تۋىنداعان جاعدايدا قازاقستان مۇسىلماندارى ءدىني باسقارماسىنىڭ وبلىستىق وكىلىنە جۇگىنۋلەرىن سۇرادى. يسلام ءدىنىنىڭ اقيقاتىن تۇسىنۋدە ينتەرنەتتەن جانە قمدب-نىڭ قۇزىرىنا كىرمەيتىن وزگە ادەبيەتتەردەن اقپارات الۋدا مۇقيات بولۋدى ەسكەرتتى. سونىمەن قاتار 2009 جىلدىڭ مامىر ايىنىڭ 29 جۇلدىزىندا جارىق كورگەن «ەگەمەن قازاقستان» گازەتىندە جاريالانعان «جانازا ءپاتۋاسىن» حالىققا جان-جاقتى ءتۇسىندىرىپ، جالپى رەسپۋبليكا كولەمىندە جانازا ماسەلەسىن ءبىر ىزگە ءتۇسىرۋ جولىن جەتكىزدى. سونداي-اق سالت-ءداستۇر مەن شاريعات ايىرماشىلىعى جانە اعىمدار تۋرالى قۇران كارىم  اياتتارى جانە پايعامبارىمىزدىڭ (س.ا.ۋ.) حاديستەرى تۋرالى ءسوز بولدى. «ءبارىڭ اللاھتىڭ جىبىنە جارماسىڭدار جانە ءوزارا جىك-جىككە بولىنبەڭدەر» اياتىن وقىپ، «اللاھتىڭ ءجىبى - اللاھتىڭ ءدىنى» ەكەندىگىن تۇسىندىرۋمەن اياقتالدى. مۇنان سوڭ، ادىلەت دەپارتامەنتىنىڭ ءدىني ىستەر جونىندەگى ءبولىمىنىڭ جەتەكشى مامانى رۋسلان قۇلدىباەۆ «وبلىستاعى ءدىني احۋالدىق جاعداي» اتتى بايانداما جاسادى. باياندامادا وبلىس اۋماعىنداعى ءدىني احۋالدى حالىققا جەتكىزىپ، ءدىني ەكسترەميزمنىڭ قاۋىپتىلىگىنەن حالىقتى قورعاۋ ماقساتىندا بىرقاتار دەرەكتەر كەلتىرۋ ارقىلى دىننەن كەلەتىن قاۋىپتەن قورعانۋدىڭ بىرنەشە جولدارىن اشىپ كورسەتۋگە تىرىستى. اتاپ ايتساق، ءداستۇرلى دىندەر ەمەس، ياعني «ىنجىلدىك حريستيان باپتيستەر شىركەۋى كەڭەسى»، «يەگوۆا كۋاگەرلەرى ءدىني قوعامى» سياقتى ءدىني ۇيىمدار اسەرىنەن جاستار اراسىندا مەملەكەتتىك نىشانداردى قۇرمەتتەمەۋ، اسكەري بورىشىن وتەۋ مىندەتتەرىن ورىنداماۋ سياقتى يدەيالار تاراۋدا. وسىعان وراي الماتى قالالىق مامانداندىرىلعان اۋدانارالىق ەكونوميكالىق سوتىنىڭ  2009 جىلعى 5 اقپانداعى شەشىمى بويىنشا «اتا جولى» («اق جول») اعىمىندا جۇرگەن توپتارعا قازاقستان رەسپۋبليكاسىنىڭ اۋماعىندا قىزمەت جاساۋعا تىيىم سالىنعان. وسى اعىم بويىنشا قىزمەتتى جۇزەگە اسىرىپ جاتقان نەمەسە اتالعان جول بويىنشا ەم الىپ جۇرگەن ادامدار زاڭ سالاسىنان تىس بولىپ ەسەپتەلەدى. ياعني وسى تىيىم سالىنعان جول بويىنشا كىمدە-كىم وسى قىزمەتتى جۇزەگە اسىرىپ جۇرگەن تۇلعالالاردىڭ قىزمەتىنە جۇگىنسە، وندا قازاقستان رەسپۋبليكاسى اكىمشىلىك قۇقىق بۇزۋشىلىقتار تۋرالى كودەكسىنىڭ 374-1-بابى بويىنشا  اكىمشىلىك جاۋاپكەرشىلىككە تارتىلاتىنى ەسكەرتىلەدى. ياعني، قازاقستان رەسپۋبليكاسى اۋماعىندا تىيىم سالىنعان قوعامدىق بىرلەستىكتەردىڭ جۇمىسىنا باسشىلىق جاساعانى ءۇشىن تۇلعاعا 100 تومەنگى ەسەپتىك كورسەتكىش كولەمىندەگى ايىپپۇل بەلگىلەنگەن بولسا، وسى سيپاتتاعى بىرلەستىكتىڭ قىزمەتىنە قاتىسقانى ءۇشىن 50 تومەنگى ەسەپتىك كورسەتكىش كولەمىندەگى ايىپپۇل بەلگىلەنگەن. ال، ەگەر جەكە نەمەسە زاڭدى تۇلعا تىيىم سالىنعان قوعامدىق بىرلەستىككە ءۇي-جاي ۇسىنىپ نەمەسە باسقالاي قارجىلىق كومەك كورسەتەتىن بولسا، وندا جوعارىدا كورسەتىلگەن باپتىڭ ءۇشىنشى تارماعى بويىنشا وعان 200 تومەنگى ەسەپتىك كورسەتكىش كولەمىندەگى ايىپپۇل بەلگىلەنگەن.
سونىمەن قاتار ادىلەت دەپارتامەنتىنىڭ ءدىني ىستەر جونىندەگى ءبولىمىنىڭ ءدىنتانۋشى نۇسقاۋشىسى تولەگەن تالدىباەۆ  قازىرگى تاڭداعى مۇسىلمانداردىڭ جاعدايىن، ولاردىڭ الۋمەتتىك تۇرمىستارىن، ەكونوميكالىق احۋالىن، ءبىلىم جانە عىلىمداعى الەۋەتىن عىلىمي دەرەكتەر ارقىلى دالەلدەپ بەردى.
جيىن سوڭىندا ۇگىت-ناسيحاتشىلار تاراپىنان اۋداندارداعى كەيبىر تۇسىنىكسىز سۇراقتارعا جاۋاپتار بەرىلدى.

اسقار جۇبانازار، قمدب-نىڭ اقتوبە وبلىسى بويىنشا وكىلدىگىنىڭ ءباسپاسوز حاتشىسى.
«اقتوبە» وبلىستىق گازەتى 30 ماۋسىم 2009 جىل