قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاۋەلسىزدىك كۇنىمەن قۇتتىقتاۋى

قۇرمەتتى وتانداستار!

بارشاڭىزدى ەلىمىزدىڭ ەڭ ۇلىق مەرەكەسى – تاۋەلسىزدىك كۇنىمەن شىن جۇرەكتەن قۇتتىقتايمىن!

ءبىز 29 جىل بۇرىن اتا-بابامىزدىڭ عاسىرلار بويى اڭساعان ارمانىن ورىنداپ، تاۋەلسىزدىككە قول جەتكىزدىك.

الەم كارتاسىنا قازاقستان اتىن ويىپ جازدىق.

سول ساتتەن ەلىمىزدىڭ جاڭا تاريحى باستالدى.

وسى جىلدار ىشىندە مەملەكەتىمىز ايتارلىقتاي ءوسىپ-وركەندەدى، ايتۋلى جەتىستىكتەرگە جەتتى.

ءبىز ەلدىگىمىز بەن ەگەمەندىگىگىمىزدى نىعايتىپ، شەكارامىزدى بەكىتتىك.

باسەكەگە قابىلەتتى نارىقتىق ەكونوميكاعا كوشىپ، مەملەكەتىمىزدى اياققا نىق تۇرعىزدىق.

قازاقستان الەم مويىنداعان ىرگەلى ەلگە اينالدى.

ەۋرازيا جۇرەگىندە جاڭا استانامىزدى سالدىق.

ءبىز ەلىمىزدە تۇراقتىلىقتى، قوعامىمىزدا تاتۋلىق پەن كەلىسىمدى ساقتاي وتىرىپ، كوپ ۇلتتى حالقىمىزدى ءباسى بولەك ارتىقشىلىققا اينالدىردىق.

تاۋەلسىزدىكتى الىپ، ونى دۇنيەگە پاش ەتۋ ءبىر بولەك، ال سول تاۋەلسىزدىكتى ساقتاپ قالۋ ودان دا زور مىندەت.

ءبىز وسى جىلدار ىشىندە بۇرىنعى كەڭەس وداعى قۇلاعان تۇستا دۇنيەدەگى ەڭ ۇلكەن ەكونوميكالىق داعدارىستى ارتقا تاستاپ، قازىرگى جاھاندىق پاندەميانى دا ەڭسەرىپ وتىرمىز.

باسىمىزعا تۇسكەن سىناقتار ءبىزدى شىڭداپ، رۋحىمىزدى كۇشەيتىپ، جىگەرىمىزدى ارتتىردى، ورتاق ماقساتقا جۇمىلۋىمىزعا تۇرتكى بولدى.

قازاقستاننىڭ دامۋ مەن وركەندەۋ جولىندا ۇنەمى العا باسۋى ءۇشىن قولدان كەلگەننىڭ ءبارىن جاساپ، بەرىك نەگىز قالىپتاستىردىق.

تاۋەلسىزدىكپەن بىرگە سان عاسىرلىق تاريحىمىز، ءتول مادەنيەتىمىز بەن اتا ءداستۇرىمىز قايتا تۇلەدى.

ءبىز التايدان اتىراۋعا، الاتاۋدان ارقاعا دەيىنگى ۇلان-عايىر اتىراپتى مەكەندەگەن ءباھادۇر بابالاردىڭ ۇرپاعىمىز.

ءۇستىرت پەن قارت كاسپيدىڭ جاعاسىن، سىر مەن ەرتىستىڭ اراسىن الىپ جاتقان بايتاق دالانىڭ زاڭدى مۇراگەرىمىز.

بۇل – اتا-بابامىزدىڭ اماناتى.

وسىنى ەشقاشان ۇمىتپاۋىمىز كەرەك.

بابادان ميراس بولعان قاستەرلى جەرىمىزدى كوزدىڭ قاراشىعىنداي ساقتاۋ، تاۋەلسىزدىگىمىزدى باياندى ەتۋ، ەلىمىزدىڭ جارقىن بولاشاعى ءۇشىن قىزمەت ەتۋ – ءبارىمىزدىڭ اسىل بورىشىمىز.

قۇرمەتتى قازاقستاندىقتار!

ءار ەلدىڭ ەڭ ۇلى، ەڭ قاستەرلى مەرەكەسى بار.

ءبىز ءۇشىن ول – تاۋەلسىزدىك كۇنى.

بۇگىن ءبىز سول تاۋەلسىزدىكتىڭ وتىز جىلدىعىنا قادام باسىپ وتىرمىز.

بۇل – جۇرتىمىز ءۇشىن مەرەيلى بەلەس، زور قۋانىش.

ەگەمەن ەلىمىزدىڭ جاڭا ءداۋىرى، جارقىن جەتىستىكتەرىمىزدىڭ جاڭا كەزەڭى باستالدى دەگەن ءسوز.

ءبىزدىڭ باعىندىرار بەلەسىمىز بەن شىعار شىڭىمىز ءالى الدا!

بارشاڭىزدى سول ماقساتتارعا قول جەتكىزىپ، قازاقستاندى وركەنيەتتى وتىز ەلدىڭ قاتارىنا قوسۋ ءۇشىن ايانباي قىزمەت ەتۋگە شاقىرامىن.

وسىناۋ ايتۋلى مەرەكەدە سىزدەردىڭ شاڭىراقتارىڭىزعا شاتتىق پەن بەرەكە تىلەيمىن.

تاۋەلسىزدىگىمىز تۇعىرلى بولسىن!

قازاقستانىمىز ماڭگى جاساي بەرسىن!

نۇرسۇلتان نازارباەۆ

Abai.kz