«ZHERSU»، «سات&كو» كورپوراتسيالارى جانە مارات مازىمباەۆتىڭ پروموۋتەرلىك كومپانياسىنىڭ ۇيىمداستىرۋمەن الماتىدا كاسىپقوي بوكسشىلاردىڭ ماتچتىق كەزدەسۋى ءوتتى. بۇل جولى قازاقستان مەن قىرعىزستاننىڭ بىلعارى قولعاپ شەبەرلەرى ادەتتەگىدەي الماتىداعى مەملەكەتتىك تسيركتە ەمەس، «ابىلاي حان» سپورت كەشەنىندە كۇش سىناستى.
ايقاستار اشىق اسپان استىندا ءوتتى. جانە دە بۇل جولى شارشى الاڭعا شىققانداردىڭ دەنى جاستار بولعانىنا قاراماستان كەزدەسۋدى تاماشالاۋ ءۇشىن كەلگەندەر از بولعان جوق. ءتۇرلى تۇجىرىمداردىڭ ءتاجى ءۇشىن ايقاس نەگە وتپەگەنى جايىندا بەلگىلى پروموۋتەر مارات مازىمباەۆتان سۇراعانىمىزدا، ول: «جاز ۋاقىتىندا بەلدى بوكسشىلارعا ءبىراز دەمالىس بەرۋدى ءجون سانادىق. بالكىم، بازبىرەۋلەر قاتاردا مىقتىلار بولماسا، جارىستىڭ ءسانى كەتەدى دەپ ويلاۋى مۇمكىن. بىراق سول پىكىردىڭ جاناساق ەكەنىنە بۇگىن كوزىمىز جەتتى. ال بىلە بىلگىڭىز كەلسە، ءبىز تەك اتاقتىلاردى ايقاستىرىپ قويۋمەن شەكتەلۋدى قۇپ كورمەيمىز. جاس بۋىن وكىلدەرى اراسىنان دارىندىلاردى ىرىكتەپ الۋ، ولاردى قاتارعا قوسۋ، ۇلكەن سپورتقا جولداما بەرۋ بۇل – «ZHERSU كورپوراتسياسى مەن مارات مازىمباەۆتىڭ پروموۋتەرلىك كومپانياسىنىڭ ۇستانىپ وتىرعان باسىم باعىتى»، – دەپ ءوزىنىڭ كورەگەندىگىن بايقاتتى. راسىندا دا سول كەشتە «ابىلاي حاندى» بەتكە العان جانكۇيەرلەر جارىستىڭ ءسانى دە، ءمانى دە كەتپەگەنىنە كۋا بولدى.
69, 9 كەلى سالماقتا سىنعا تۇسكەن الماتىلىق عالىمجان مىرزاباەۆتىڭ جانكەشتىلىگى كورەرمەندەردى ءسۇيسىندىردى. قارسىلاسى قىرعىزستاندىق الەكساندر باحوۆ تا وسالدار ساناتىنان ەمەس ەكەن. ەكى راۋند بويى ول جەرلەسىمىزدى ابدەن ساستىردى. كەي ساتتەردە تورتپاق جىگىت ايقىن باسىمدىلىق تانىتاتىنداي بولىپ كورىندى بىزگە. عالىمجان بىرازعا دەيىن باحوۆتىڭ وسال تۇسىن تابا المادى. ءۇشىنشى كەزەڭدە شابۋىلىن ۇدەتكەن قانداسىمىز تىزگىندى بەرىك قولعا السا، ءتورتىنشى راۋن مىرزاباەۆتىڭ ەكپىندى شابۋىلىمەن ءوتتى. قارسىلاسى، تىپتەن، رينگتىڭ بەسىنشى بۇرىشىن ىزدەپ كەتە جازدادى. ناتيجەسىندە قاپتالداعى ءۇش تورەشىنىڭ ۇشەۋى دە جەڭىستى عالىمجان مىرزاباەۆتقا بەردى.
59 كەلى سالماقتا كۇش سىناسقان پاۆلودارلىق فارحاد وسپانوۆ پەن شىمكەنتتىك ارمان ۋىتجانوۆ اراسىنداعى باسەكە وتە شيەلەنىستى ءوتتى. العاشقى ەكى راۋندتا كەرەكۋلىك بوكسشى الىمدى كورىندى. وڭتۇستىك قازاقستان وبلىسىنىڭ وكىلى ءسال سەسكەنىڭكىرەپ جۇرگەندەي اسەر قالدىردى. الايدا بۇل ونىڭ تاكتيكالىق قۋلىعى ەكەن. ارمان «ءبىر بارماعىن ىشىنە بۇگىپ» ءجۇرىپتى. اقىرىندا ۋىتجانوۆ وسپانوۆتى ساباپ تاستادى. ءتورتىنشى راۋندتا بىرنەشە اۋىر سوققىلارىن دارىتىپ، قان جوسا ەتتى. بىراق تورەشىلەر جەڭىستى وسپانوۆقا بەردى. ونىڭ سەبەبىن بىلسەك، تورەشىلەر: «فارحادتىڭ العاشقى كەزەڭدەردە جيعان ۇپاي قورى ونىڭ جەڭىسكە جەتۋى ءۇشىن جەتكىلىكتى بولدى»، – دەپ ءتىل قاتتى.
63 كەلى سالماقتاعى كوكشەتاۋلىق ءانۋار مۇساعۇلوۆ پەن تالدىقورعاندىق ەلجان بوقانوۆتىڭ اراسىنداعى تارتىس اسا اسەرلى بولمادى. ءتورت راۋند بويى جىگىتتەر ءبىر-ءبىرىنىڭ وسال تۇسىن تابا العان جوق. اقىرى تورەشىلەر ءسال عانا باسىمدىلىقپەن كوكشە ءوڭىرىنىڭ تۇلەگى جەڭىسكە جەتكەنىن جاريا ەتتى.
79 كەلى سالماقتا شەبەرلىك بايقاسقان ميحايل كرينيتسيندى جانكۇيەر قاۋىم جاقسى بىلەدى. وسىدان ءبىراز ۋاقىت بۇرىن يسلام ءدىنىن قابىلداپ، ەسىمىن «ءال-حاتتاب» دەپ وزگەرتكەننەن كەيىن ونىڭ جولى وڭعارىلا باستادى. قاراعاندى قالاسىنىڭ تۇلەگى سول كۇنى قىرعىزستاندىق ومىربەك رىسكەلديەۆتەن باسىم ءتۇستى. ىلە-شالا پاۆلودارلىق الەكساندر جۋراۆسكي تاعى ءبىر «ايىر قالپاقتى اعايىنىمىزدى» تەزگە سالدى.
كاسىپقوي بوكستىڭ قامىتىن كيگەنىنە اسا كوپ ۋاقىت بولماسا دا، ءمىرجان جاقسىلىقوۆتىڭ (57 كەلى) ونەرى جۇرتقا ۇنادى. اياكوز قالاسىنىڭ تۋماسى قاي جاعىنان الساڭىز دا، ماقتاۋعا تۇرارلىق جىگىت. ونىڭ بويىندا بولاشاق چەمپيونعا قاجەت بارلىق قاسيەت بار دەيدى ماماندار. راسىن دا سولاي ەكەن. بۇعان دەيىنگى جەكپە-جەكتەرىنىڭ دەنىن ايقىن جەڭىسپەن اياقتاعان جاقسىلىقوۆ بۇل جولى دا ءوزىن جاقسى قىرىنان كورسەتتى. قارسىلاسى الماتىلىق ەربول نۇرىشەۆقا قاراعاندا الدەقايدا جىلدام، الدەقايدا شيراق قيمىلداعان ءمىرجاننىڭ ۇستەمدىگى ەش كۇمان تۋعىزعان جوق.
ەڭ سوڭعى جەكپە-جەك 53,3 كەلى سالماقتىلار اراسىندا ءوتتى. رينگكە ميرات سارسەمباەۆ كوتەرىلگەندە جانكۇيەرلەر دۋ ەتە قالدى. ولاردىڭ ميراتقا وسىنداي قوشەمەت كورەتەتىندەي ءجونى بار. جەتىسۋدىڭ ورەنى اۋەسقوي رينگتە تالاي بەلەستى باعىندىرعان تارلانبوز. الىپ ازيانى مويىنداتىپ، الەمدىك دەڭگەيدەگى بوكسشىلار ساناتىنا ەركىن ەنگەن. ال ەلىشىلىك جارىستاردا كۇنى بۇگىنگە دەيىن سارسەمباەۆتىڭ الدىن وراعان بوكسشى جوق. سوعان قاراماستان ول كاسىپقوي رينگتى تاڭدادى. بۇل رەتتەگى العاشقى قادامى جامان ەمەس. وسىدان ءبىر اي بۇرىن ءوزىنىڭ العاشقى باسەكەسىن جەڭىسپەن اياقتاعان تالدىقورعاندىق ورەن «ابىلاي حاندا» وتكەن تۋرنيردە دە شابىسىنان جاڭىلعان جوق. بىشكەكتەن كەلگەن ازىزبەك قالماماتوۆ قانشا تىرىسقانىمەن، قانداسىمىزعا ەش قايرات كورسەتە المادى. ءتورت راۋند بويى ميرات ونى تومپەشتەپ، ۇپاي سانىمەن ۇتتى.
– مەن قالماماتوۆتى ۇرىپ قۇلاتۋدى ماقسات تۇتقان جوقپىن. ويتكەنى، قازىر مەن ءۇشىن ايقىن جەڭىستەن گورى فۋنكتسيونالدىق دايارلىعىمدى بايقاپ كورۋ ماڭىزدى. قانشا دەگەنمەن اۋەسقوي جانە كاسىپقوي بوكستىڭ اراسىندا الشاقتىق كوپ. سوندىقتان دا باستاپقى باسەكەلەر ارقىلى بارىنشا مول تاجىريبە جيۋ قاجەت. ال ايقىن جەڭىس پەن اتاق-داڭق ءوز ۋاقىتىندا كەلەدى، – دەپ جەكپە-جەكتەن سوڭ ميرات اعىنان جارىلدى.
سونىمەن، «ابىلاي حان» سپورت كەشەنىندە وتكەن جەكپە-جەكتەر جانكۇيەر كوڭىلىنەن شىقتى. ەندى «ZHERSU كورپوراتسياسى مەن مارات مازىمباەۆتىڭ پروموۋتەرلىك كومپانياسى ءوزىنىڭ كەلەسى ءتۋرنيرىن شىلدە ايىنىڭ سوڭىندا ىستىق كولدىڭ جاعالاۋىندا ۇيىمداستىرۋدى كوزدەپ وتىر.

«ايقىن» گازەتى 30 ماۋسىم 2009 جىل