جوبا Telegram چات-بوتتارىنىڭ كومەگىمەن جۇزەگە اسپاق. جوبانى 23 جەلتوقساندا Facebook جەلىسىندە"اشىق ديالوگ" قورىنىڭ پرەزيدەنتى ليۋدميلا كوزلوۆسكا مەن "ۋرالسكايا نەدەليا" باسىلىمىنىڭ ديرەكتورى تامارا ەسلياموۆا تانىستىردى.
FKF قورىنىڭ جەتەكشىسى بارلىق مەڭدىعازيەۆتىڭ سوزىنە قاراعاندا، جاڭا پلاتفورما بەلورۋس بەلسەندىلەرىنىڭ پرەزيدەنت سايلاۋى كەزىندەگى تاجىريبەلەرىنە سۇيەنىپ جاسالعان. "ول بارلىق تاۋەلسىز باقىلاۋشىلاردى بىرىكتىرۋگە مۇمكىندىك بەرۋى ءتيىس".
- ىندەت كەزىندە حالىقارالىق قاۋىمداستىق تارابىنان كوپتەگەن باقىلاۋشىلار مەن جۋرناليستەر كەلە المايتىندىقتان انتونيو ستانگودان سايلاۋدى وبەكتيۆتى باقىلاۋعا كومەكتەسۋىن سۇراعانمىن. ول قولدادى. باستى تالاپ - [سايلاۋشىلار] بيۋللەتەندەردى ەكى جاعىنان انىق ەتىپ ءتۇسىرىپ، جولداۋى ءتيىس، - دەدى بارلىق مەڭدىعازيەۆ.
جوبامەن اينالىسىپ جاتقان تەحنيكالىق توپ وكىلدەرىنىڭ ايتۋىنشا، سايلاۋ اياقتالعاننان كەيىن حابارلامالار سۇرىپتالىپ، تەز ارادا ناتيجەسى جاريالانادى. جوباعا بارلىق ازاماتتار، سايلاۋعا ءتۇسىپ جاتقان پارتيا وكىلدەرى دە قاتىسا الادى.
قازاقستاندا ءماجىلىس جانە ءماسليحات سايلاۋى 10 قاڭتاردا وتەدى. وعان "نۇر وتان", "اقجول", "ادال", "اۋىل" جانە "قازاقستان حالىق پارتياسى" قاتىسادى. ساراپشىلار 2021 جىلى 10 قاڭتارعا جوسپارلانعان سايلاۋعا بيلىككە جاقىن پارتيالار عانا جىبەرىلدى دەپ سانايدى.
جەلتوقسان ايىنىڭ باسىندا ورتالىق سايلاۋ كوميسسياسى تاۋەلسىز بايقاۋشىلار تۋرالى قاۋلى قابىلداعان. قۇجاتتا سايلاۋدى باقىلاۋعا قۇقىعى بار ۇيىمدار عانا سايلاۋ ۋچاسكەسىندەگى داۋىس بەرۋدى قاداعالاي الاتىنى، ال فوتو-ۆيدەوعا ءتۇسىرۋ ءۇشىن سايلاۋ كوميسسياسىنىڭ رۇقساتى كەرەك ەكەنى ايتىلعان. تاۋەلسىز بايقاۋشىلار بۇل تالاپ زاڭعا قايشى دەگەن. وسىعان دەيىن بىرقاتار بەلسەندىلەر جوعارعى سوتتان "زاڭسىز قاۋلىنىڭ" كۇشىن جويۋدى تالاپ ەتكەن.
Abai.kz
