مەملەكەت حالىقتىڭ ءۇنىن ەستۋى كەرەك
3 قاڭتاردا شىمكەنتتە قازاقستان حالىق پارتياسىنىڭ بەلسەندىلەرى مەن مۇشەلەرى قالادا قحپ-نىڭ ۇگىت ماتەريالدارىن تاراتۋ بويىنشا اكتسيا وتكىزدى.
داۋىس بەرۋگە جەتى كۇن قالعاندا ساياسي قوزعالىستىڭ جاقتاۋشىلارى ازاماتتارعا قحپ سايلاۋالدى باعدارلاماسىنىڭ نەگىزگى تارماقتارىن ءتۇسىندىرىپ بەردى.
– ءبىزدىڭ پارتيا حالىقتىڭ تابىس كولەمىن دە، ەڭ تومەنگى كۇنكورىس دەڭگەيىن ارتتىرۋ قاجەت دەپ ەسەپتەيدى. مەملەكەت زەينەتاقى مولشەرىن ۇلعايتىپ، ازاماتتاردىڭ زەينەت جاسىن 60 جاسقا دەيىن تومەندەتۋى كەرەك. «زياندى» ماماندىقتاردىڭ وكىلدەرى قۇرمەتتى دەمالىسقا ەرتەرەك شىعۋى ءتيىس، – دەدى اكتسيا بارىسىندا قر پارلامەنتى ءماجىلىسىنىڭ دەپۋتاتتىعىنا كانديدات نۇرلان قادىرقۇلوۆ.
سونداي-اق ول قحپ پاندەميا باستالعانعا دەيىن ۇنەمى سالىق تولەپ، جۇمىس ورىندارىن قۇرعان ازاماتتار ساناتى ءۇشىن ءبىر رەتتىك نەسيە راقىمشىلىعىن جۇرگىزۋدى ۇسىندى.
– بۇل پاندەميا مەن شەكتەۋ شارالارى سالدارىنان قيىن جاعدايدا تاپ بولعان شوب قىزمەتكەرلەرىنە قاتىستى. ياعني، ازىق-تۇلىك دۇكەندەرىنىڭ، كافەلەردىڭ، شاشتارازداردىڭ يەلەرى مەن قىزمەتكەرلەرى قامتىلۋى قاجەت. ايتا كەتۋ كەرەك، بانكتەر كارانتيننەن شىعىنسىز ءوتتى، ولاردىڭ كوپشىلىگى ءوز كاپيتالىن ارتتىردى. شاعىن جانە ورتا بيزنەس پەن قاراپايىم ازاماتتارعا عانا سالماق ءتۇستى. ەندى ولار بۇرىنعى نەسيەلەرىن وتەۋ ءۇشىن تاعى نەسيە الۋعا ءماجبۇر، – دەدى قازاقستان حالىق پارتياسىنىڭ مۇشەسى.
قحپ مەملەكەت ءوز ازاماتتارىنا بانكتەر ەسەبىنەن نەسيە راقىمشىلىعىن جۇرگىزۋدى قامتاماسىز ەتۋى ءتيىس دەپ سانايدى.
Abai.kz
