ءبىز قورقىنىشتى جۇيەدە ءومىر ءسۇرىپ جاتىرمىز...
ادۆوكات ءلاززات كەندەبايقىزىنىڭ قىزىلوردا وبلىسىنىڭ ەكس-اكىمى ق. ىسقاقوۆقا قاتىستى پوستتارىنا ەل شۋلاپ جاتقان سوڭ نە بولىپ جاتىر ەكەن دەپ قاراپ شىعىپ، تاڭ قالىپ وترىمىن.
ارىستاعى جارىلىستان كەيىنگى جاعدايدان سوڭ قىزىلوردا وبلىسىنىڭ ەكس-اكىمىنىڭ ورىنباسارى 80 ميلليون پارا الىپ، حالىقتان جينالعان اقشانى جىمقىرىپ كەتىپتى دەگەن اقپارات بۇرق ەتە قالعان بولاتىن. سودان سول اقپاراتتاردىڭ بىرنەشەۋىنە مەن دە بارىپ، كوزىم جەتپەسە دە، "مەملەكەتتىك دەڭگەيدەگى ءبىر قۇنىققان جەمقوردىڭ ءبىرى عوي، بۇل جۇيەدە وڭعان ادام بولعان ەمەس..." دەپ پىكىر قالدىرعان ەدىم.
ءلاززات كەندەبايقىزىنىڭ سول ءىس بويىنشا جازىپ جاتقان پوستتارىنا زەر سالسام، جاعداي ءبىز ويلاعاننان مۇلدە بولەك بولىپ شىقتى. ءلاززات احاتوۆانىڭ پوستىنىڭ استىنا ەلگە بەلگىلى ابزال قۇسپاننىڭ پىكىرىن وقىپ، تاعى تاڭ قالدىم. ەكى بىلىكتى زاڭگەر دە اپ-انىق ەتىپ جازىپ وتىر. جاعداي مۇلدەم بولەك. سوت ورگاندارى مەن تەرگەۋ ورگاندارى ءىستى اياۋسىز بۇرمالاپ، وزدەرىنىڭ ماقساتتارىن ىسكە اسىرۋدا الدىنا جان سالماعان. مۇنداي بۇرمالاۋشىلىق يسلام ابىشەۆ اعامىزدىڭ ىسىندە دە ورىن العان بولاتىن. مىناۋ جاعدايعا ءاتۇستى قارايىن دەسەڭ، مەملەكەتكە تانىمال ەكى بىردەي زاڭگەردىڭ جازباسى انىق دالەل بولىپ تۇر.
ءلاززات كەندەبايقىزى مەن ابزال قۇسپاننىڭ پىكىرىن قاراپ شىعىپ، سوت ورگاندارىندا راسىندا سۇمدىق دەگراداتسيا مەن رەگرەسس بولىپ جاتقانىن اڭعاراسىڭ. ءبىزدىڭ زايىرلى ەلدەگى سوتتىڭ سىيقى وسى. مىناداي سوت ورگاندارى تۇرعاندا، ءبىزدىڭ ەلدىڭ تۇلەپ ءوسۋى ەكىتالاي. بولاشاق تا قورقىنىشتى. مىناۋ تۇرىمەن ءبىزدى ەل قىلمايدى ەكەن. ءبىزدىڭ تەرگەۋ ورگاندارى مەن سوت ورگاندارى 1931-1937 جج جالا جابۋ، قۋعىنداۋ، قۋدالاۋ، قارالاۋ سيستەمامەن جۇمىس ىستەپ جاتىر.
ءبىزدىڭ كوزىمىز ناقتى ءبىر نارسەگە جەتپەي، الدىن الا كوسەمسىپ قوياتىنىمىز راس ەكەن. وبلىس اكىمىنىڭ بۇيرىعى شىققاننان كەيىن تاعايىندالعان اكىمنىڭ ورىنباسارىنىڭ ءوزىنىڭ وكىلەتتىگى بولماعان ىسكە نۇسقاۋ بەردى ەتىپ، وزگە بىرەۋلەردىڭ قولىمەن كوسەۋ كوسەپ، ايىپتى قىلىپ وتىر. قارجى سول ماڭايدىعى بىرەۋلەردىڭ نۇسقاۋىمەن باسقا جاققا اۋدارىلىپ كەتكەن. ونى قۋاتتاپ كورسەتەتىن قۇجاتتار مەن كۋاگەرلەر دە بار ەكەن. سوندا دا ءىس بۇرمالانىپ جاتىر. بۇل وزدەرىنىڭ بىلىقتارىنىڭ بەتىن جابۋ ءۇشىن قۇرباندىق ىزدەۋدىڭ جولى عانا. قارالىپ جاتقان ىستەرگە دا نازار سالىپ كوردىم. ءبارى بۇرمالاۋشىلىق پەن اياقاستى ەتىپ قۇقىن تاپتاۋ. سول كەزدەگى اعات پىكىرىم ءۇشىن دە كەشىرىم سۇرايمىن.
مەنىڭ دە ەسەپ شوتتارىمدى بىرەۋلەر زاڭسىز جاۋىپ تاستاپ وتىر. سوتقا ارىز بەردىم، مۇلدەم قارالعان جوق. ودان كەيىن تاعى دا ارىز بەردىم، تاعى دا قارالعان جوق. ءبىز سوندا نە ىستەۋىمىز كەرەك؟ جوعارى دەڭگەيدەگى مەملەكەتتىك قىزمەتكەردىڭ قۇقى وسىلاي تاپتالىپ جاتقان سوڭ، قاراپايىم ادامدىڭ قۇقىن قالاي داۋلاي الىپ جاتىرمىز با؟ ءبىز قورقىنىشتى جۇيەدە ءومىر ءسۇرىپ جاتىرمىز. جاۋابى جوق وتە اۋىر سۇراق ايتەۋىر.
بەكبولات قارجاننىڭ الەۋمەتتىك جەلىدەگى جازباسى
Abai.kz
