قازاقستاندا 10 ميلليون ادامعا كوروناۆيرۋسقا قارسى ۆاكتسينا سالۋ جوسپارلانىپ وتىر. بۇل تۋرالى دەنساۋلىق ساقتاۋ ءمينيسترى الەكسەي تسوي مالىمدەدى. 

تسوي رەسەيلىك «سپۋتنيك V» ۆاكتسينالارىنىڭ ەكى ميلليون دوزاسىنا كەلىسىم بار ەكەنىن اتاپ ءوتتى. ول قازاقستانعا سۋبستانتسيا تۇرىندە جەتكىزىلەدى جانە كەيىننەن قاراعاندى فارماتسەۆتيكالىق زاۋىتىنىڭ بازاسىندا وندىرىلەدى ەكەن.

«قازىر بىزدە جەتكىزۋ بويىنشا كەلىسسوزدەر جۇرگىزىلىپ جاتىر. ازىرگە ەكى ميلليون دوزا. جالپى، ءبىز شامامەن 10 ميلليون ادامعا ۆاكتسينا سالۋدى جوسپارلاپ وتىرمىز - بۇل 55 پايىز. ءبىز ناۋقاستارمەن تىكەلەي بايلانىستا بولاتىن نەگىزگى وسال توپتاردى انىقتادىق. ازىرگە بۇل 18 جاستان 60 جاسقا دەيىنگى سانات»، - دەدى مينيستر وكق بريفينگىندە.

ال، كوروناۆيرۋسقا قارسى Pfizer ۆاكتسيناسى ەلگە تەك جىلدىڭ ەكىنشى جارتىسىندا عانا اكەلىنۋى مۇمكىن. قازىر مينيسترلىك قىزمەتكەرلەرى امەريكاندىق كومپانيا وكىلدەرىمەن كەلىسسوزدەردى باستاعان.

Abai.kz