ساراپشىلار بۇل باستامانىڭ تەك سيمۆولدىق مانگە يە ەكەنىن جانە دجو بايدەننىڭ 20 قاڭتاردا پرەزيدەنت قىزمەتىنە كىرىسۋىنە ەش كەدەرگى جاساي المايتىنىن ايتادى.
2 قاڭتارداعى مالىمدەمەسىندە 11 سەناتور "2020 جىلعى سايلاۋداعى بۇرمالاۋ مەن زاڭ بۇزۋ تۋرالى مالىمەت وتە كوپ بولدى" دەيدى، بىراق بۇل مالىمدەمەلەرىنە لايىقتى دالەل كەلتىرمەيدى.
پرەزيدەنت دونالد ترامپ بىلتىر قاراشادا وتكەن سايلاۋدا جەڭىلگەنىن مويىنداماي، داۋىستاردىڭ بۇرمالانعانىن ايتىپ، سايلاۋ ناتيجەلەرىن جوققا شىعارتۋعا تالپىنىپ كەلەدى.
رەسپۋبليكالىق پارتيادان سايلانعان ءبىر توپ سەناتور 6 قاڭتاردا كونگرەسس بايدەننىڭ جەڭىسىن رەسمي تۇردە جاريالاۋعا جينالعاندا سايلاۋ ناتيجەسىن قايتا قاراۋ ءۇشىن "10 كۇندىك توتەنشە تەكسەرىس" جۇرگىزەتىن ارنايى كوميسسيا قۇرۋدى تالاپ ەتپەك.
كونگرەستىڭ بىرلەكەن وتىرىسىندا وكىلدەر پالاتاسىنىڭ 140-قا جۋىق مۇشەسى دە سايلاۋ ناتيجەسىنە قارسىلىق ءبىلدىرۋى مۇمكىن دەگەن بولجام بار.
اقش سايلاۋشىلار القاسى 2020 جىلعى 14 جەلتوقساندا بايدەننىڭ جەڭىسىن رەسمي تۇردە جاريالاعان. دەموكرات بايدەن سايلاۋشىلار القاسىنىڭ 306 داۋسىن، ال رەسپۋبليكاشىل دونالد ترامپ 232 داۋسىن العان.
بايدەننىڭ رەسمي وكىلى مايكل گۆين بۇل ارەكەتتى ساياسي سپەكتاكل دەپ سىنادى.
"بۇل ارەكەت سايلانعان پرەزيدەنت بايدەننىڭ 20 قاڭتاردا انت بەرۋىنە ەش كەدەرگى جاساي المايدى، سەبەبى بۇل نەگىزسىز ايىپتاردى ترامپتىڭ ءوزى تاعايىنداعان باس پروكۋرور دا، ونداعان سوت تا، ەكى پارتيانىڭ سايلاۋعا جاۋاپتى ادامدارى دا قاراپ، جوققا شىعارعان" دەدى ول.
اقش-تىڭ سايلاۋ جۇيەسى بويىنشا، حالىق الدىمەن ءوز اتىنان تاڭداۋ جاسايتىن سايلاۋشىلار القاسىنىڭ مۇشەلەرىنە داۋىس بەرەدى، ال ولار جالپىۇلتتىق سايلاۋدان بىرنەشە اپتا وتكەن سوڭ فورمالدى تۇردە اقش پرەزيدەنتىن انىقتايدى.
رەسپۋبليكالىق پارتيانىڭ سەناتورلارى سايلاۋ ناتيجەلەرىن قايتا قاراۋدى قاجەت ەتەتىن "داۋلى شتاتتاردان" كەلگەن سايلاۋشىلار القاسى مۇشەلەرىن مويىندامايتىنىن ايتادى.
كونگرەسس ولار قويعان تالاپتاردى ورىنداۋى نەعايبىل.
اقش كونگرەسىندە سايلاۋ ناتيجەسىنە قارسى شىعۋ ۇسىنىسى رەسپۋبليكالىق پارتيانىڭ ءوزىن ەكىگە جارىپ وتىر. سەناتتاعى كوپشىلىكتىڭ باسشىسى ميتچ ماككونەلل پارتياعا كىرمەيتىن سايلاۋ كوميسسيالارىنىڭ وكىلدەرى ء"ادىل دە تازا ءوتتى" دەپ باعالاعان سايلاۋعا كۇمان كەلتىرمەۋگە شاقىردى.
اپتا باسىندا رەسپۋبليكالىق پارتيا اتىنان نەبراسكادان سايلانعان سەناتور بەن ساسسە پارتيالاستارىن ەلدىڭ ازاماتتىق نورمالارىنا قاۋىپ توندىرەتىن بۇل "قاتەرلى باستامادان" باس تارتۋعا شاقىرعان.
Abai.kz
