شەتەلدىك بانكتەر قازاقستاندا «ءبىر ءوتىنىش» قاعيداتى بويىنشا ءوز فيليالدارىن اشا الادى.

دۇنيەجۇزىلىك ساۋدا ۇيىمىنا كىرۋ كەزىندە قابىلدانعان مىندەتتەمەلەردى ىسكە اسىرۋ اياسىندا 2020 جىلدىڭ 16 جەلتوقسانىنان باستاپ قازاقستان رەسپۋبليكاسىنىڭ اۋماعىندا شەتەلدىك بانكتەردىڭ، ساقتاندىرۋ (قايتا ساقتاندىرۋ) ۇيىمدارىنىڭ جانە ساقتاندىرۋ بروكەرلەرىنىڭ فيليالدارىن اشۋعا رۇقسات بەرىلدى.

قازاقستان رەسپۋبليكاسىنىڭ اۋماعىندا قىزمەتىن باستاۋ ءۇشىن شەتەلدىك قارجى ۇيىمى قر قارجى نارىعىن رەتتەۋ جانە دامىتۋ اگەنتتىگىندە فيليال اشۋعا رۇقسات الۋعا ءتيىس، ودان كەيىن فيليال اگەنتتىكتىڭ ءتيىستى ليتسەنزياسىن الادى.

شەتەلدىك قارجى ۇيىمىنا فيليال اشۋ جانە قىزمەتىن باستاۋ ءۇشىن مىناداي تالاپتار قويىلاتىن بولادى:

رەزيدەنتتىك ەلىنىڭ اۋماعىندا بانكتىڭ نەمەسە ساقتاندىرۋ (قايتا ساقتاندىرۋ) قىزمەتىن جۇزەگە اسىرۋعا قولدانىستاعى ليتسەنزياسى بار;

فيليال تاراپىنان مىندەتتەمەلەر ورىندالماعان جاعدايلاردا، مىندەتتەمەلەردى ءسوزسىز جانە دەرەۋ ورىنداۋ تۋرالى جازباشا مىندەتتەمە ۇسىندى;

شەتەلدىك بانك اكتيۆتەرىنىڭ ەڭ از كولەمى 20 ملرد اقش دوللارىن قۇرايدى;

شەتەلدىك ساقتاندىرۋ (قايتا ساقتاندىرۋ) ۇيىمى اكتيۆتەرىنىڭ ەڭ از كولەمى 5 ملرد اقش دوللارىن قۇرايدى، بۇل رەتتە جۇمىس تاجىريبەسى 10 جىلدان كەم بولماۋعا ءتيىس. شەتەلدىك ۇيىم فيليالدارىنىڭ باسشى قىزمەتكەرلەرى رەتىندە تاعايىندالاتىن كانديداتتار ءۇشىن – جوعارى ءبىلىمنىڭ، ىسكەرلىك بەدەلىنىڭ ءمىنسىز (وتەلمەگەن نەمەسە الىنباعان سوتتىلىعىنىڭ بولماۋى), حالىقارالىق قارجى ۇيىمدارىنداعى ەڭبەك ءوتىلىنىڭ بولۋى مىندەتتى.

بۇل رەتتە شەتەلدىك قارجى ۇيىمىنىڭ فيليالى باسشى قىزمەتكەرلەرىنىڭ قۇرامىندا قر كەمىندە 2 ازاماتى بولۋعا ءتيىس. شەتەلدىك بانكتەردىڭ، ساقتاندىرۋ (قايتا ساقتاندىرۋ) ۇيىمدارىنىڭ جانە ساقتاندىرۋ بروكەرلەرىنىڭ فيليالدارى ءۇشىن دە قازاقستاندىق قارجى ۇيىمدارىنا قاتىستى قولدانىلاتىن رەتتەۋ تالاپتارى قولدانىلادى.

وسىعان بايلانىستى شەتەلدىك قارجى ۇيىمدارىنىڭ فيليالدارى پرۋدەنتسيالىق نورماتيۆتەردىڭ جانە بانكتەر مەن ساقتاندىرۋ ۇيىمدارىنا قويىلاتىن ساقتالۋى مىندەتتى وزگە دە تالاپتاردىڭ تولىق تىزبەسىن ساقتاۋعا ءتيىس.

Abai.kz