بۇگىن اعارتۋشى، ۇستاز ىبىراي ءالتىنساريننىڭ ءومىرى مەن رۋحاني مۇراسىنا ارناپ تۇسىرگەن  «ۇستاز» دەرەكتى ءفيلمى ەفيرگە شىعادى. بۇل تۋرالى «Qazaqstan» ۇلتتىق تەلەارناسى مالىمدەدى. 

فيلم اۆتورلارى ورىنبور شەكارا كوميسسياسىنىڭ مۇراعاتىنان پاتشا ۇكىمەتىنىڭ قازاقتاردى شوقىندىرۋ ساياساتى قالاي باستالعانىن كورسەتەتىن ماتەريالداردى تاپتى. وقيعا ىبىراي التىنسارين مەن ورىس ميسسيونەرى يلمينسكيدىڭ كەزدەسۋىن كورسەتە وتىرىپ باياندالادى. فيلمدە ءالتىنساريننىڭ جانە يلمينسكيدىڭ حاتتارى - يلمينسكيدىڭ 1869 جىلى اعارتۋ ءمينيسترى د.ا. تولستويعا، ءالتىنساريننىڭ 1889 جىلى ۆ.ۆ. كاتارينسكيگە جازعان حاتى زەرتتەلىپ، حريستيان ميسسيونەرلەرىنىڭ شىنايى پيعىلىن اشاتىن ۇزىندىلەر كەلتىرىلەدى.

جوبادا سونىمەن بىرگە ى.ءالتىنساريننىڭ 1884 جىلى شىققان «مۇسىلمانشىلىقتىڭ تۇتقاسى» اتتى ەڭبەگىنىڭ جارىق كورۋ تاريحى، ترويتسك قالاسىندا مەدرەسە اشىلعاندا ءالتىنساريننىڭ ونىڭ سالىنۋىنا ءوز قالتاسىنان قارجىلاي كومەك بەرگەنى باياندالدى. مۇنىڭ ءبارى ۇلى ۇستازدىڭ تەك قازاقتىڭ ەمەس، بارشا تۇركى حالىقتارىنىڭ وراسان زور قايراتكەرى ەكەنىن كورسەتەدى.

جوبا اۆتورى – جۋرناليست دارحان ابدىك. دەرەكتى تۋىندى «Qazaqstan» ارناسىنان بۇگىن 20:35-تە ەفيرگە شىعادى.

Abai.kz