قر جوعارعى سوتىنىڭ نازارىنا!

قر جوعارعى سوتىنىڭ نازارىنا!

وتكەن جىلدىڭ قاراشا ايىندا وقو ءىىد پوليتسيا قىزمەتكەرى اسقار كولباەۆ   ماس كۇيىندە  شىمكەنت قالاسىندا جاياۋ جۇرگىنشىلەر جەرىنەن ءوتىپ بارا جاتقان 16 جاسار دينارا اتاجانوۆانى قاعىپ، قىرشىن قىزدىڭ وقيعا ورنىندا ءتىل تارتپاي قازا تاپقانى ەلدى دۇرلىكتىرگەن-ءدى. ءبارى دە سول وقيعا قاتىستى وتەتىن سوت پروتسەسىنىڭ سوڭىن اڭدىعان-دى. الايدا، جۋىردا وسى سوتتى جۇرگىزگەن شىمكەنت قالالىق ءا-فارابي اۋداندىق سوتى زاڭنىڭ ءالسىز تۇسىن پايدالانىپ، كۇدىكتىنى  دۇنيەگە جاڭا كەلگەن سابيدەي، «سۇتتەن اق، سۋدان تازا» ەتىپ، سوت زالىنان، تۇتقىننان بوساتىپ جىبەردى. بۇل از دەسەڭىز، سوت پوليتسيا قىزمەتكەرى اسقار كولباەۆتىڭ ۋداي ماس كۇيىندە ماشينا جۇرگىزگەنى مەدينيتسينالىق ساراپتامامەن دالەلدەنگەنىنە قاراماستان، سوت بۇل ايعاقتى قاپەرىنە الماعانى جايىندا اقپارات قۇرالدارىندا ايتىلىپ، جازىلعان ەدى. وسىنى تەلەارنالاردان كورگەن حالىق جاعالارىن ۇستاپ، شوشىندى. سول-اق ەكەن، باق بەتتەرىندە قازىرگى قولدانىستاعى زاڭنىڭ السىزدىگىن ايتقان جانە سوتتىڭ ادىلەتسىزدىگىن سىناعان قوعامدىق پىكىرلەرى قاپتاپ كەتتى. وسىدان تايسالعان بولۋى كەرەك، جوعارى سوت جانە پارلامەنت سەناتىنىڭ توراعاسى ق.مامي دا سوت قاۋلىسىن ءادىل دەپ باعالاپ، ون ەكىدە ءبىر گۇلى اشىلماعان  16 جاسار قىزدى قاعىپ ولتىرگەن قىلمىسكەردىڭ ءىسىن قر قىلمىستىق كودەكسى بويىنشا «ورتاشا قىلمىسقا» جاتقىزىپ، قر تاۋەلسىزدىگىنىڭ 20 جىلدىعىنا بايلانىستى شىعارىلعان «راقىمشىلىق جاساۋ تۋرالى» زاڭعا ىلىككەنىن ايتىپ اقتالىپ باقتى. البەتتە، تاۋەلسىزدىك مەرەكەسىنە وراي  جەڭىل جانە ورتاشا قىلمىس جاساعان جازاسىن وتەۋشىلەرگە كەشىرىم جاسالعانى دۇرىس. دەسەكتە، جۇرتتى شۋلاتقان، ىشىمدىككە تويىپ الىپ  جوعارى جىلدامدىقپەن  كەلىپ، قىز بالانى  2 مەتر جوعارى كوتەرە، 60 مەتردەي جەرگە لاقتىرىپ، قاعا قاشقان ادامدى راقىمشىلىقا ىلىكتىرۋ ادامي-مورالدىق جانە زاڭدىق تۇرعىدان دا ادامگەرشىلىككە، ادىلدىككە جاتپايدى. ولاردى مارقۇمنىڭ وبالى مەن  اتا- اناسىنىڭ كوز جاسى جىبەرمەيتىنى انىق. اتالمىش جول-كولىك وقيعاسى تۋرالى ينتەرنەت سايتتارىندا قاپتاعان بەينەتاسپانى كورسەڭ جۇرەگىڭ اۋىرادى. مۇنداي جايدى اڭ ەكەش، حايۋاننىڭ باسىنا دا بەرمەسىن.

باستى زاڭىمىز - كونستيتۋتسيانىڭ 1-بابىندا: «قازاقستان رەسپۋبليكاسى ءوزىن دەموكراتيالىق، زايىرلى، قۇقىقتىق جانە الەۋمەتتىك مەملەكەت رەتىندە ورنىقتىرادى، ونىڭ ەڭ قىمبات قازىناسى - ادام جانە ادامنىڭ ءومىرى، قۇقىقتارى مەن بوستاندىقتارى» دەلىنگەن. دەگەنمەن، اتا  زاڭىمىز نەگىزىندە جازىلعان قىلمىستىق كودەكستە ادام ءومىرىن قيعان ارەكەتتىڭ ورتاشا قىلمىسقا جاتقىزىلۋى تۇسىنىكسىز جاعداي. ەگەر، قاعىلعان ادام اسارىن اساپ، جاسارىن جاساعان ماسكۇنەم، قاڭعىباس بولىپ جانە ىشىمدىككە سىلقيا تويىپ، جاياۋ جۇرگىنشىلەر وتپەيتىن جەردەن ءوتىپ بارا جاتقان كەزدە  قاعىپ كەتسە ايتار داۋ جوق. بۇل جايدى «ابايسىزدا» دەپ ايتىپ، جاياۋ  جۇرگىنشىنىڭ ءوزى كىنالى دەۋگە بولار.  ال، كولىكتى ماساڭ كۇيىندە وتە قاتتى جۇرگىزىپ، جاياۋ جۇرگىنشىلەرگە ارنالعان بولىكتەن ءوتىپ بارا جاتقان جاۋقازىنداي قىز بالانى قاعىپ، قاس قاعىم ساتتە مەرت قىلعان، زاڭنىڭ جاۋاپكەرشىلىگىن تولىق تۇسىنەتىن پوليتسيا قىزمەتكەرىنىڭ قىلمىستىق ءىسىن اقتاۋلارى، حالىقتى سىيلاماعانى، زاڭدى قۇرمەتتەمەگەنى. تاۋىق، قوي، ۇيالى تەلەفون ۇرلاعانداردى اسا قاۋىپتى قىلمىسكەردەي ۇستاپ، جوسپاردى اسىرا ورىنداۋ ماقساتىندا تەمىر توردىڭ ار جاعىنا توعىتىلعان قانشا ادامنىڭ راقىمشىلىققا ىلىكپەي جاتقانىن ءبىر اللا  عانا بىلەدى. ونداي ۇساق-تۇيەك قىلمىستى اقشاسى جوقتار، كۇنكورىسى ناشارلار عانا جاسايتىنى بەلگىلى. قالتاسىن قامپيتۋدى ارمانداعان سوتتار مەن زاڭدى قاداعالاۋ ورگاندارى راقىمشىلىقتى شەبەر پايدالانىپ، قارجىسى بار ايران ىشكەندەردى بوساتىپ، ال، شەلەك ءتۇبىن جالاعان كەدەي-كەپشىندەر سول كۇيى تۇرمە تۇبىندە شىريمە دەپ ويلايسىڭ. سوندا دەيمىن-اۋ، ادام ءومىرى  تاۋىق پەن قويدان، قالتا تەلەفونىنان دا قۇنسىز بولعانى ما؟.. الدە كونستيتۋتسياداعى الگى باپ سوتتار مەن پروكۋرورلارعا ادىرەم قالعانى ما؟.. وندا ەل-جۇرتقا مازاق بولماۋلارى ءۇشىن ءبىرجولاتا كونستيتۋتسياعا رەفەرەندۋم ارقىلى «مەملەكەتتىڭ باستى قازىناسى - مال مەن قۇس، دۇنيە مەن زاتتار» دەپ وزگەرىس ەنگىزەيىك.

قورىتا كەلگەندە ايتارىمىز، ماس كۇيىندە ماشينا جۇرگىزىپ، ون ەكى دە ءبىر گۇلى اشىلماعان قىرشىن قىزدىڭ ءومىرىن قيعان قۇقىق قورعاۋ قىزمەتكەرى كولباەۆتىڭ ءىسى قايتا قارالىپ، ادام ءومىرىن قيعانى ءۇشىن قاتاڭ جازالانۋى ءتيىس دەپ بىلەمىز!

تالعات قاتاۋوۆ

ورال قالاسى

«اباي-اقپارات»

ۆيدەو youtobe.com cايتىنان الىندى