بەكشيننىڭ سوزىنشە، ىندەتتىڭ ەكىنشى تولقىنى باستالعان بىلتىرعى قازان ايىنان بەرى قالادا كوروناۆيرۋس جۇقتىرعاندار سانى 14 ەسە وسكەن.

– قىركۇيكتە ينفەكتسيا جۇققان 165 ناۋقاس انىقتالدى، قازاندا – 360, قاراشادا – 1399, جەلتوقساندا 2256 ادامعا جەتتى. قاڭتاردىڭ العاشقى جەتى كۇنى 700-دەن اسا ادام تىركەلدى. قاڭتارعا جاسالعان بولجام بويىنشا، [ايدىڭ سوڭىنا دەيىن] 4500-گە جۋىقتايدى، – دەدى بەكشين.

ونىڭ سوزىنشە، كەيىنگى ەكى اپتادا ۆيرۋس جۇقتىرعانى انىقتالعانداردىڭ 35 پايىزى – 20-39 جاس، تاعى 33 پايىزى – 40 پەن 59 جاس ارالىعىنداعى ازاماتتار. الماتى قالاسى كوروناۆيرۋس ينفەكتسياسى قاۋپى بويىنشا "سارى ايماقتا" ەكەنىن ەسكەرتكەن باس دارىگەر ءتۇرلى ساۋىق كەشتەرى مەن ساۋدا ورتالىقتارىنا كوپ ادامنىڭ ورتاسىنا بارىپ، شەكتەۋ شاراسىن بۇزۋ – ىندەتتىڭ تاراۋىنا سەبەپ بولىپ وتىرعانىن ايتتى.

بەكشين قازىر قالاداعى بارلىق ەمحانادا ينفەكتسياعا قارسى ۆاكتسينا ەگۋگە دايىندىق جۇمىستارى ءجۇرىپ جاتقانىن ايتتى.

"ەڭ ءبىرىنشى ينفەكتسياعا قارسى كۇرەستىڭ العى شەبىندە جۇرگەن دارىگەرلەر، پەداگوگتار، پوليتسيا قىزمەتكەرلەرىنە ۆاكتسينا ەگەمىز. دەنساۋلىق جاعدايىنا بايلانىستى كەيبىرەۋلەرگە، مىسالى، اياعى اۋىر ادامدارعا ۆاكتسينا ەگۋگە بولمايدى" دەدى بەكشين.

رەسمي مالىمەت بويىنشا، قازاقستاندا 2020 جىلعى 13 ناۋرىزدان بەرى Covid ينفەكتسياسى زەرتتەۋ قورىتىندىسى بويىنشا دالەلدەنگەن 159 819 كىسى تىركەلگەن، وسى اۋرۋدىڭ سالدارىنان 2349 ادام قايتىس بولعان.

دەنساۋلىق ساقتاۋ مينيسترلىگى اۋرۋ بەلگىلەرى كوروناۆيرۋس ينفەكتسياسىنا ۇقسايتىن، بىراق لابوراتوريا ادىسىمەن تەكسەرگەندە اعزاسىنان Covid تابىلماعان ناۋقاستار ستاتيستيكاسىن بىلتىرعى تامىزدان بەرى بولەك جۇرگىزىپ كەلەدى. سودان بەرى وسىنداي پنەۆمونيامەن 46114 ادام اۋىرعان، 519 ناۋقاس قايتىس بولعان.

Abai.kz