قر پرەزيدەنتى ق.ك.توقاەۆنىڭ،
قر باس پروكۋرورىنىڭ،
قر سىرتقى ىستەر ءمينيسترىنىڭ نازارىنا!

قازاقستاندى ىشتەن شايقالتۋعا باعىتتالعان ارانداتۋشى كۇشتەر باس كوتەرىپ جاتىر. وسىندايدا پرەزيدەنتتىڭ، ۇكىمەتتىڭ، ءسىم-ءنىڭ جانە ءبىزدىڭ ساياساتشىلارىمىز بەن تاريحشىلارىمىزدىڭ ءالى كۇنگە دەيىن بۇعان ءمان بەرمەۋى تۇسىنىكسىز؟ ولاردىڭ ارەكەتتەرى تىم بەلسەندىلىك الىپ بارادى. بۇل قوعامعا «ۇلكەن داۋىل الدىنداعى ىسقىرىقتاي» اسەر ەتۋدە.

«قازاقستاننىڭ تەرريتورياسى مەن تاۋەلسىزدىگىن مويىندامايتىن دۋمانىڭ فەدوروۆ دەيتىن دەپۋتاتى – رەسەيدەگى «ۇلتتىق ازات ەتۋ قوزعالىسىن» قۇردى. ءدال وسى «ۇلتتىق ازات ەتۋ قوزعالىسى» (نارودنو وسۆوبوديتەلنوە دۆيجەنيە، قىسقاشا - نود) 2012 جىلى رەسەيدە تىركەلگەن. ونىڭ نەگىزىن قالاۋشى - ەۆگەني الەكسەەۆيچ فەدوروۆ. شتاب-پاتەرى – ماسكەۋدە ورنالاسقان. ەڭ سوراقىسى سول – فەدوروۆتىڭ «ۇلتتىق ازات ەتۋ قوزعالىسىنىڭ» فيليالى قازاقستاندا دا جۇمىس ىستەپ جاتىر. «نود استانا» دەپ اتالاتىن سايتتارى اشىق تۇر. ءجاي تۇرعان جوق، «ءبىزدىڭ قاتارىمىزعا قوسىل» دەپ، شاقىرىپ ءجۇر» (قاراڭىز: Abai.kz)...

بۇل از بولعانداي ەندى بۇلارعا ورىس - كازاكتارى قوسىلدى. قازاقستاندا اسكەري بولماساڭىز، ونداي كيىمدى زاڭسىز كيۋگە رۇقسات جوق. قوعامدا اسكەري فورمانى كيگەن تۇرعىنداردىڭ قۇقىق بۇزۋشىلىقتارى مەن ءتارتىپ بۇزۋشىلىقتارى، اسكەري قىزمەتكەرلەر جاساعان بۇزۋشىلىق رەتىندە قابىلدانادى. وسىعان بايلانىستى كەشە عانا قازان ايىندا ناۋقاندىق شارا ءوتىپ، ارنايى دۇكەندەردە، بازارلاردا اشىق ساتىلىپ جاتقان قولجەتىمدى «اسكەري كيىم ۇلگىلەرىن» كيگەن قاراپايىم ادامداردى، ءتىپتى6 اۋىلداعى مالشىلاردى دا قۋالاپ ءجۇرىپ ۇستاپ، زاڭناماعا سايكەس، جەكە تۇلعالارعا – 5 اەك (13 890 تەڭگە) جانە زاڭدى تۇلعالار ءۇشىن دەپ - 25 اەك (69 450 تەڭگە) كولەمىندە ايىپپۇل سالىندى. ەندەشە بۇل تالاپ ورىس كازاكتارىنىڭ اسكەري فورما كيگەن قۇرامالارىنا، جەكەلەگەن وكىلدەرىنە جانە وفيتسەرلەرىنە نەگە جۇرمەيدى؟

وسى جايلاردى جاريا ەتە وتىرىپ،

مالىمدەيمىن!

كازاكتاردىڭ اسكەري بىرلەستىكتەرىنىڭ جانە فەدوروۆتىڭ «ۇلتتىق ازات ەتۋ قوزعالىسىنىڭ (نود) ارەكەتى كونستيتۋتسياعا قارسى، قازاقستان رەسپۋبليكاسىنىڭ مەملەكەتتىك دەربەستىگى مەن اۋماقتىق تۇتاستىعىنا قاۋىپ توندىرەتىن، قازاق حالقىنىڭ ۇلتتىق ار-نامىسىنا تيەتىن، ۇلتارالىق ارازدىقتى ورشىتەتىن، قوعامدىق-ساياسي احۋالدى تۇراقسىزداندىراتىن جانە قازاق جەرىندە وتارلاۋشىلىق اسكەري-اتاماندىق قۇرىلىمدى قايتا تۇلەتۋدى كوكسەۋشىلىك دەپ تانىلىپ، تاۋەلسىز مەملەكەتتىڭ ىشكى ىسىنە سىرتتان قول سۇعۋشىلىق دەپ باعالانسىن!

ارەكەتتەرى زاڭدىق تۇرعىدان ءوز باعاسىن الىپ، بولاشاقتا قازاقستاندا مۇنداي ۇيىمداردى قۇرۋعا زاڭ جۇزىندە تيىم سالىنسىن!

الداعى ۋاقىتتا قوعامعا جات ارانداتۋشىلىقتى بولدىرماۋ ءۇشىن جەرگىلىكتى وكىمەتتەر مەن قۇقىق كۇشتەرىنىڭ ءىس-قيمىلىنىڭ وزىندىك ءتارتىبى بەلگىلەنسىن!

مەملەكەتتىك دارەجەدە ساياسي جانە قۇقىقتىق باعا بەرىلسىن!.

نۇرلىباي قوشامانۇلى,

دارىگەر، قر جۋرناليستەر وداعىنىڭ مۇشەسى،

اقتوبە قالاسى

Abai.kz