قر ءىىم ورىنباسارى ارىستانعالي زاپپاروۆ ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا 10 قاڭتار سايلاۋ كۇنى نارازىلىق ءبىلدىرىپ ۇستالعاندارعا قاتىستى پىكىر ءبىلدىردى.

ونىڭ ايتۋىنشا، پوليتسياعا زاڭسىز اكتسيالار مەن ميتينگىلەر ۇيىمداستىرعانى ءۇشىن ۇستالعان جانە زاڭدى تالاپتاردى ورىنداۋدان باس تارتقان ادامدار جەتكىزىلگەن.

«شىنىندا دا، زاڭسىز شەرۋلەر مەن ميتينگىلەردى ۇيىمداستىرۋ ارەكەتتەرى، سونداي-اق ولارعا قاتىسۋعا شاقىرۋلار بولدى. اتالعان ازاماتتار جەرگىلىكتى اتقارۋشى ورگاندارمەن جانە پروكۋراتۋرامەن اكتسيالاردىڭ زاڭسىزدىعى جانە ولاردى توقتاتۋ قاجەتتىلىگى تۋرالى بىرنەشە رەت ەسكەرتىلدى.

ايتا كەتۋ كەرەك، جەكە تۇلعالار مەملەكەتتىك ورگاندار وكىلدەرىنىڭ زاڭدى تالاپتارىن ورىنداۋدان باس تارتتى. سوندىقتان قىزمەتكەرلەر ولاردى تەرگەۋ ءۇشىن پوليتسيا ورگاندارىنا جەتكىزۋگە ءماجبۇر بولدى»، - دەدى زاپپاروۆ.

سونىمەن قاتار، مينيسترلىك الدىن-الۋ اڭگىمەلەرىنەن كەيىن بارلىعى بوساتىلعانىن جانە ەشكىم اكىمشىلىك جانە قىلمىستىق جاۋاپكەرشىلىككە تارتىلماعانىن ايتقان.

Abai.kz