ءۇشىنشى توقسان بارلىق سىنىپتار ءۇشىن بەكىتىلگەن كەستەگە سايكەس 11 قاڭتاردا باستالادى. بۇل تۋرالى قر ءبىلىم جانە عىلىم مينيسترلىگى مالىمدەدى.

مينيسترلىك اقپاراتىنشا، سايلاۋ كەزەڭىندە رەسپۋبليكاداعى 7 مىڭنان استام مەكتەپتىڭ 5 522 مەكتەبى سايلاۋ ۋچاسكەسى بولعان. مەكتەپكە دەيىنگى 6 651 ۇيىمنىڭ 143-ءى،  644 ورتا ءبىلىم بەرۋ ۇيىمىنىڭ 215-ءى، 125 جوعارى وقۋ ورنىنىڭ 53-ءى جانە 22 مەكتەپ-ينتەرناتى مەن سپورت مەكتەپتەرى، 114 جوعارى وقۋ ورنىنىڭ جاتاقحانالارى، سونىمەن قاتار وزگە ءبىلىم بەرۋ ۇيىمدارىندا ورنالاسقان 12 ۇيىرمە نىساندارى (مەكتەپ وقۋشىلارىنا ارنالعان ساراي، شىعارماشىلىق ءۇيى، مۋزىكالىق مەكتەپتەر) سايلاۋعا پايدالانىلعان.

قر باس مەملەكەتتىك سانيتارلىق دارىگەرىنىڭ 2020 جىلعى 29 جەلتوقسانداعى №69 «قازاقستان رەسپۋبليكاسى پارلامەنتى ءماجىلىسى مەن ءماسليحاتتارى دەپۋتاتتارىنىڭ سايلاۋىن ۇيىمداستىرۋدا جانە وتكىزۋدە COVID-19-دىڭ تارالۋىنىڭ الدىن الۋ شارالارى تۋرالى» قاۋلىسىنا سايكەس، سايلاۋ ۋچاسكەسى رەتىندە پايدالانىلعان ءبىلىم بەرۋ مەكەمەلەرىندە سايلاۋ اياقتالعاننان كەيىن زالالسىزداندىرۋ شارالارى ۇيىمداستىرىلادى.

«دەزينفەكتسيالىق ءىس-شارالار اياقتالعان سوڭ مەكتەپ قابىرعاسىندا كەزەكشى سىنىپتار مەن 9,11 سىنىپتار ءۇشىن ءداستۇرلى فورماتتاعى وقۋ پروتسەسى ءار ءتۇرلى ۋاقىتتا ء(بىرىنشى نەمەسە ەكىنشى اۋىسىمدا) باستالادى.

داۋىس بەرۋ پروتسەسىن ۇيىمداستىرۋدا پايدالانىلماعان جانە دەزينفەكتسيانى اياقتاعان ۇيىمداردا وقىتۋ 2021 جىلعى 11 قاڭتاردا مەكتەپ قابىرعاسىندا ء(بىرىنشى نەمەسە ەكىنشى اۋىسىمدا) باستالادى.

دەزينفەكتسيالىق ءىس-شارالار اياقتالماعان ءبىلىم بەرۋ ۇيىمدارىنىڭ وقۋشىلارى 11 قاڭتاردا ونلاين فورماتتا، ياعني قاشىقتان وقيتىن بولادى»,- دەدى بجعم.

وسىلايشا، ەلىمىزدىڭ بارلىق مەكتەپتەرىندە ءۇشىنشى توقسان بەكىتىلگەن كەستەگە سايكەس 11 قاڭتاردا قاشىقتان نەمەسە ءداستۇرلى فورماتتا باستالادى.

Abai.kz