اقش وكىلدەر پالاتاسى پرەزيدەنت دونالد ترامپقا «بۇلىككە شاقىرۋ بابى» بويىنشا يمپيچمەنت جاريالادى. ول اقش تاريحىنداعى ەكى رەت يمپيچمەنت جاريالانعان جالعىز پرەزيدەنت بولدى.

رەزوليۋتسيادا ترامپتىڭ ارەكەتتەرى «اۋىر قىلمىستار مەن تەرىس قىلىقتار» تۋرالى كونستيتۋتسيالىق تۇجىرىمدامامەن سايكەس كەلەدى، ول ءۇشىن پرەزيدەنتكە يمپيچمەنت جاريالاۋعا بولاتىندىعى ايتىلعان.

كونگرەسستىڭ داۋىس بەرۋى ارقىلى 222 دەموكرات يمپيچمەنت تالابىن قولدادى. رەسپۋبليكاشىلاردىڭ 197-ءى قارسى داۋىس بەردى، بىراق 10 پارتيا مۇشەسى ساياسي قارسىلاستارىنىڭ ترامپتى وتستاۆكاعا كەتىرۋ تۋرالى تالابىن قولدادى.

ترامپتى بيلىكتەن مەرزىمىنەن بۇرىن كەتىرۋ ءۇشىن ونى سەناتتاعى پروتسەستىڭ قورىتىندىلارى بويىنشا سوتتاۋ كەرەك، دەگەنمەن رەسپۋبليكاشىلدار ازىرگە سەناتتى 20 قاڭتاردا دجو بايدەننىڭ يناۋگۋراتسياسىنا دەيىن دەمالىسقا شىعارۋعا كەلىسكەن جوق.

كەيىنىرەك، سەنات ترامپتىڭ يمپيچمەنتى تۋرالى ۇكىمىن ونىڭ 20 قاڭتارداعى پرەزيدەنتتىك مەرزىمى اياقتالعانعا دەيىن شىعارمايتىنى بەلگىلى بولدى.

«سەنات پروتسەسى وسى اپتادا باستالىپ، تەز جۇمىس ىستەگەن كۇننىڭ وزىندە، پرەزيدەنت ترامپ قىزمەتىنەن كەتەر الدىندا تۇپكىلىكتى ۇكىم بولماس ەدى. بۇل مەن قابىلداعان شەشىم ەمەس، بۇل فاكت»، - دەدى رەسپۋبليكاشىل سەناتتىڭ جەتەكشىسى ميتچ ماككوننەلل.

ونىڭ ايتۋىنشا، ترامپ مەرزىمىنىڭ قالعان جەتى كۇنىندە «ءادىل جانە بايىپتى» سوت ءىسىن جۇرگىزۋ مۇمكىندىگى جوق.

ايتا كەتەيىك، 6 قاڭتاردا اقش پرەزيدەنتى دونالد ترامپ اق ءۇي ماڭىندا وتكەن ميتينگىدە جاقتاستارىن كونگرەسس ماقۇلداعان سايلاۋ ناتيجەلەرىنە قارسى كاپيتوليگە بارۋعا شاقىردى. ترامپتىڭ جاقتاستارىنىڭ كوپشىلىگى اقش كاپيتوليىن قورشاۋعا الىپ، عيماراتقا كىرىپ، كونگرەسستىڭ بىرلەسكەن وتىرىسىن ءۇزىپ تاستاعان.

قاقتىعىس سالدارىنان بەس ادام قازا تاپتى.

Abai.kz