رەسمي ورگاندار بەرگەن مالىمەتكە قاراعاندا، 10 قاڭتاردا پارلامەنتتىڭ تومەنگى پالاتاسىنا جانە جەرگىلىكتى وكىلەتتى ورگانعا دەپۋتات سايلاۋ بارىسىندا سايلاۋشىلارعا بەرىلگەن جالپى بيۋللەتەندەردىڭ ءۇش پايىزدايى جارامسىز بولى شىققان.

— بۇلىنگەن بيۋللەتەن دەگەن – سايلاۋشىنىڭ تاڭداۋىن انىقتاۋ مۇمكىن بولماعان بيۋللەتەن. بۇل [كانديداتتار سىزىپ تاستالعان، سايلاۋشى باسقا ءسوز جازعان بيۋللەتەن] عانا ەمەس. ۆاريانت ءارتۇرلى. بوس بيۋللەتەن بولۋى مۇمكىن. سايلاۋشىنىڭ ناقتى كىمگە داۋىس بەرگەنىن انىقتاۋ مۇمكىن ەمەس بيۋللەتەن جارامسىز، ياعني بۇلىنگەن بيۋللەتەن قاتارىنا جاتقىزىلادى، — دەدى الماتى اۋماقتىق سايلاۋ كوميسسياسىنىڭ (اسك) توراعاسى جاننا اسانوۆا.

جارامسىز بيۋللەتەن ستاتيستيكاسى قورىتىندى حاتتاماعا بولەك ەنگىزىلەدى. اسانوۆانىڭ ايتۋىنشا، حاتتامادا تەك سايلاۋشى الىپ كەتكەن بيۋللەتەن عانا كورسەتىلمەيدى. قولعا بەرىلگەن بيۋللەتەن مەن جاشىككە سالىنعان بيۋللەتەن اراسىنداعى ايىرماشىلىققا قاراپ سايلاۋشىلاردىڭ قانشا بيۋللەتەندى الىپ كەتكەنىن انىقتاۋعا بولادى.

الماتىدا ءماجىلىس دەپۋتاتتارىن سايلاۋ ءۇشىن تۇرعىنداردىڭ قولىنا 342 564 بيۋللەتەن بەرىلسە، 331 602 بيۋللەتەن جاشىككە سالىنعان (ايىرما - 10 962) دەلىنگەن اسك حاتتاماسىندا.

ءماسليحات سايلاۋىندا سايلاۋشىلارعا 341 431 بيۋللەتەن بەرىلگەن، ال جاشىككە 330 446 بيۋللەتەن سالىنعان (ايىرما - 10 985). الماتىدا 1 ميلليون 132 مىڭ سايلاۋشى تىركەلگەن.

10 قاڭتاردا وتكەن ءماجىلىس جانە ءماسليحات سايلاۋى قارساڭىندا وپپوزيتسيالىق كوزقاراستاعى ءبىراز بەلسەندى "ادىلەتسىز ءوتىپ جاتقان" سايلاۋعا نارازىلىق رەتىندە بيۋللەتەندەگى پارتيالاردىڭ ءبارىن سىزىپ تاستاۋعا نەمەسە قاعازدى باسقا ادىسپەن بۇلدىرۋگە ۇندەگەن. داۋىس بەرۋ كۇنى جۇرت پارتيالار سىزىپ تاستالعان، باسقا "كانديداتتار", ۇراندار جازىلعان بيۋللەتەندەردىڭ سۋرەتىن جاريالادى. اراسىندا اقش پرەزيدەنتى دونالد ترامپتى جازىپ قويعاندار بار.

جالپى قازاقستان بويىنشا قانشا بيۋللەتەننىڭ جارامسىز بولىپ شىققانى بەلگىسىز. ورتالىق سايلاۋ كوميسسياسى پارتيالارعا بەرىلگەن داۋىس سانىن عانا جاريالايدى، بۇلىنگەن بيۋللەتەن بويىنشا مالىمەت بەرمەيدى.

Abai.kz