قازاقستاندا كيىم ءوندىرىسى تومەندەدى
كيىم ءوندىرىسى 2020 جىلدىڭ 11 ايىندا ايتارلىقتاي تومەندەدى. بۇل تۋرالى قازاقپارات حابارلادى.
سۆيتەر، جەمپىر، كارديگان، جەلەتكە جانە سول سەكىلدى توقىما ءوندىرىسى جىلىنا 40,8%-عا، 90,5 مىڭعا دەيىن قىسقاردى. ەمىزۋلى بالالارعا ارنالعان كيىم 40,1%-عا، 14,6 ملن تەڭگەگە ازايدى. ماشينامەن نەمەسە قولمەن توقىلاتىن سىرت كيىم ءوندىرىسى 39,4%-عا، 87,4 مىڭعا، شۇلىق 25,2%-عا، 10,7 ملن-عا دەيىن قىسقارعان.
باس كيىم مەن قالپاققا سۇرانىس، كەرىسىنشە، ارتقان. ءوسىم جىلىنا 54,1%-دى نەمەسە 12 ملرد تەڭگەنى قۇرايدى.
باعاسى بويىنشا 2020 جىلدىڭ 11 ايىندا ءبىر جىل بۇرىنعىمەن سالىستىرعاندا 40,6 ملرد تەڭگەگە - 10,2%-عا كوبىرەك كيىم وندىرىلگەن. ال شىنايى ءوسىم وتكەن جىلمەن سالىستىرعاندا – 3,7%.
وڭىرلەر بويىنشا الماتى وبلىسى، شىمكەنت جانە الماتى قالالارى كوش باستاپ تۇر. بۇل وڭىرلەردە «Glasman» جشس، «ارلان 777» جشس، «تف اجار» جشس، «مەدياتەكس-ن» جشس، «Texti Market» جشس، «دەمەۋ-ارنا» جشس، «تەحنواۆيا-قازاقستان» جشس، «كازلەگپروم-الماتى» جشس، «ارايلى» جشس، «گاۋحار» تىگىن فابريكاسى، «نۋردان» كومپانياسى، «الەم-بت» جشس سىندى كومپانيالار جۇمىس ىستەيدى.
سۇرانىس (ەكسپورت پەن ىشكى نارىقتاعى ساۋدا) تولىعىمەن يمپورتشىلارعا تاۋەلدى. ونىڭ ىشىندە، 2020 جىلدىڭ ون ايىنىڭ مالىمەتى بويىنشا ءىش كيىم نارىعىنىڭ 98,9%-ى، ەمىزۋلى بالالارعا ارنالعان كيىمنىڭ 99,7%-ى، توقىلعان سىرت كيىمنىڭ 99,5%-ى، سۆيتەر، جەمپىر سىندى توقىما ونىمدەرىنىڭ 98,8%-ى، شۇلىقتىڭ 95,5%-ى جانە سپورتتىق كيىمدەردىڭ 73,2%-ى يمپورتقا تيەسىلى.
قازاقستانعا اكەلگەن جەڭىل ونەركاسىپ ءونىمى ەكسپورتتان 30 ەسە اسىپ تۇسەدى. شەتەلدىك وندىرۋشىلەر ەلىمىزگە 1 195 ملرد دوللار تۇراتىن تاۋار جەتكىزگەن. ال قازاقستاندىق ەكسپورتشىلار 41 ملن دوللاردىڭ عانا تاۋارىن ساتقان. قازىرگى ۋاقىتتا قازاقستانداعى تىگىن مەكەمەلەرى مەملەكەتتىك تاپسىرىس ەسەبىنەن قىزمەتىن توقتاتپاي وتىر. ونسىز دا ءماز ەمەس جاعدايدى پاندەميا ءتىپتى قيىنداتىپ جىبەردى.
تمد ەلدەرىنەن ەلىمىزگە 18,1 مىڭ توننا كيىم اكەلىنگەن. ولاردىڭ اراسىنداعى نەگىزگى يمپورتشىلار وزبەكستان مەن رەسەي. باسقا ەلدەردەن سوماسى 350,8 ملن دوللار تۇراتىن 44,2 مىڭ توننا كيىم جەتكىزىلگەن. الەمنىڭ باسقا ەلدەرىنەن كەلگەن يمپورتتىڭ 85,1%-ى قىتايعا تيەسىلى.
2020 جىلدىڭ قاراشاسىنىڭ قورىتىندىسى بويىنشا كيىم مەن اياق كيىم باعاسى بىلتىرعى جىلدىڭ وسى كەزەڭىمەن سالىستىرعاندا 5,2%-عا وسكەن. اسىرەسە قىزىلوردا، باتىس قازاقستان جانە سولتۇستىك قازاقستان وبلىستارىندا بۇل تاۋارلار ايتارلىقتاي قىمباتتاعان. سىرت كيىم جىلىنا 4,7%-عا، ونىڭ ىشىندە ەرلەردىڭ كيىمى 4,6%-عا، ايەلدەردىكى - 5%-عا جانە بالالاردىڭ سىرت كيىمى 4,2%-عا قىمباتتادى.
Abai.kz
