ءبىز مىنا كۇيكى تىرشىلىكتىڭ قامىمەن ءجۇرىپ، ءدال قاسىمىزدا ۇندەمەي-تۇندەمەي، ەشكىمگە دە دابىرا قىلماي، قولىنان كەلگەنشە جۇرتقا جاقسىلىق جاساپ جۇرگەن جانداردى بايقاي دا بەرمەيمىز. ودان دا بىزگە اكىم نە جەپ قويددى، كىم كىمدى توناپ كەتتى بولماسا كىم كىمدى باسىپ-جانشىپ كەتتى دەگەن قاۋەسەت پەن اقپاراتتار جانىمىزعا جاقىن، جۇرەگىمىزگە جىلى تيەتىن سەكىلدى.

ادام ازدى ما، الدە قوعام ازدى ما، كىم ءبىلسىن بىرەۋدىڭ بىرەۋگە قول ۇشىن بەرىپ، قولتىقتان دەمەپ جاتقانى جاي عانا، كوڭىل اۋدارا قويمايتىن قۇبىلىس سانالادى. وكىنىشتىسى دە، قورقىنىشتىسى دا وسى. ەەگەر ءبىز مۇندايعا قۋانا بىلمەسەك، وسىنداي جارقىن ىستەردى قالىڭ جۇرتقا جاريالاۋعا اسىقپاساق، اقىرى مورالدىق ازىپ-توزۋعا ۇشىراماساق بولعانى دەگەن قورقىنىشتى وي كەلەدى.

ءبىر عانا مىسال. تەرىستىك ايماقتارداعى، اسىرەسە ءبىزدىڭ قوستاناي سەكىلدى وبلىستا قىستىڭ قانشالىقتى قاھارلى ەكەندىگىن تەك وسىندا تىرشىلىك ەتىپ جاتقان جاندار عانا بىلەدى. ونىڭ بەت قاراتپايتىن ۇسكىرىك ايازىنا ەكىنىڭ ءبىرى شىداس بەرە المايدى. ال ەندى وڭىرىمىزدە كورونوۆيرۋس دەگەن بوي بەرمەي، كۇنىنە 120-دان استام ادام اۋىرىپ، «قىزىل ايماقتان» شىعا الماي جۇرگەنىمىزدە، وسىنى سىلتاۋ ەتكەن اۆتوبۋستاردىڭ ءجۇرۋىنىڭ تىم باسەڭسىپ كەتكەندىگىن ەسكە سالا كەتەيىك. ال ءسىز ەندى سول كولىكتى قوستانايدىڭ قاقاعان ايازىندا ساعاتتاپ كۇتىپ كورىڭىز. ءسىز ءبۇرىسىپ تۇرعانىڭىزدا، جانىڭىزدان تالاي تاماشا جەڭىل كولىكتەر زۋىلداپ ءوتىپ جاتادى. ۇلكەنى بار، كىشىسى بار، قامشى سالدىرماي زىرىلداپ بارا جاتقانى.

بىردە، و عاجاپ، وسىنداي ءبىر جەڭىل كولىك قالانىڭ شەت جاعىنداعى ءبىر ايالدامانىڭ جانىنداعى سۋىقتان قالشىلداپ تۇرعان جانداردىڭ قاسىنا كەلىپ توقتاي قالدى دا: «ال، مىنىڭىزدەرى» دەپ ەسىگىن ايقارا اشتى. جۇرت اڭ-تاڭ. «قانشا الاسىز؟» دەپ سۇراپ جاتىر. رۋلدەگى جاس جىگىت: «تەگىن، ورتالىققا باراتىندارىڭىزدى اپارىپ تاستايمىن»، دەپ جىمىيادى. سەنەرىن دە، سەنبەسىن دە بىلمەگەن جۇرت ىلدام-جىلدام ءمىنىپ جاتىر. الگى جۇرگىزۋشى قاباق شىتپاستان انە-مىنە دەگەنشە جولاۋشىلاردى ورتالىققا اكەلىپ سالدى. ءتىپتى ورتالىقتان ءبىراز تىسقارى جەرگە باراتىن ءبىر جاس قىز بالانىڭ:  «جۇمىسقا اسىعىس ەدىم، اقشاسىن تولەيىن، جەتىزىپ تاستاڭىزشى»، دەگەن تىلەگىن دە ورىندادى. تەگىن، ەشبىر اقىسىز.

الگى جىگىتتىڭ وسىناۋ وزگەشە قادامىنا ريزا بولعان جولاۋشىلار وسىنداعى وبلىسىمىزعا كەڭىنەن تارايتىن، اسا بەدەلدى «كوستانايسكيە نوۆوۆستي» دەگەن گازەتكە «جاۋراپ تۇرعان جۇرتتى تەگىن تاسىعان بۇل قانداي جان، سونى تاۋىپ بەرىڭىزشى؟ - دەپ تىنىم بەرمەيدى. وبالى نە، گازەت ءتىلشىسى دە ىلدام-جىلدام قوزعالىپ، الگى «قۇپيا جاندى» تاۋىپ الادى.

سويتسە... سويتسە ول الىس قياندا ەمەس، سول «كوستانايسكيە نوۆوۆوستي» گازەتىنىڭ عيماراتىندا ورنالداسقان وبلىستىق «قوستاناي تاڭى» اتتى انا تىلىمىزدە شىعاتىن گازەتتىڭ باس رەداكتورىنىڭ ورىنباسارى جۇماتاي كاكىمجانوۆ دەگەن ازامات بولىپ شىقتى. گازەت ودان ءاپ-ادەمى سۇحبات الىپ، ونىڭ ىزگى دە يگىلىكتى ءىسىن قالىڭ جۇرتقا ءمالىم ەتتى.

 ال ءبىز بولساق، مۇنداي يگىلىكتى ىستەردى ءۇنسىز-ءتۇنسىز اتقارىپ جۇرگەن ازاماتتىڭ ءوزىمىزدىڭ ارىپتەسىمىز بولىپ شىققاندىعىنا قۋاندىق. ويتكەنى، جاقسىلىقتىڭ ۇلكەن-كىشىسى بولمايدى. ونىڭ قاي-قايسىسى دا ەرلىككە پاراپار ءىس. قۇلاپ قالعان قاريانى قولتىقتان دەمەپ، تۇرعىزىپ جىبەرۋ دە نەمەسە پاناسىزدارعا پاتەر سىيلاۋ دا بىردەي باعالاناتىن ەسكىرمەس قۇندىلىقتار. مۇمكىن بىرەۋلەر: «ە، وندا تۇرعان نە بار؟ بوس كەلە جاتقان جوق پا؟» دەپ وزدەرىنشە ءپالساپا سوعار. ال ءسىز سول بوس كەلە جاتقان ونداعان ەمەس، جۇزدەگەن ماشينانىڭ قايسىسىنىڭ توقتاپ، ەڭ بولماسا ءبىر جولاۋشىنى ۇيىنە جەتكىزىپ تاستاعان قانداي جاندى كوردىڭىز؟ ءتىپتى، ءسىزدىڭ ءوزىڭىز وسىلاي ىستەپ پە ەدىڭىز؟ بۇعان جاۋاپ تابىلا قوياتىندىعىنا سەنىمدى ەمەسپىن.

سايىپ كەلگەندە، مۇندايعا دا جومارت جۇرەك سەكىلدى اسىل قاسيەت كەرەك. ول ءتىپتى ەكىنىڭ ءبىرىنىڭ قولىنان كەلە بەرمەيدى. مىنە، سوندىقتان دا الدىڭعى تولقىن اعالارىنىڭ ءىزىن باسىپ كەلە جاتقان ارىپتەستەرىمىزدىڭ ىشىنەن وسىنداي ازاماتتىڭ شىققاندىعىنان جاي عاان قۇبىلىس دەپ قاراي المادىق. سوندىقتان دا جۇماتاي جايلى تەك قوستااناي وبلىسى عانا ەمەس، بايتاق ەلىمىز دە حاباردار بولا بەرسىن دەگەن يگى تىلەكپەن قولىمىزعا قالام الىپ ەدىك.

جايبەرگەن بولاتوۆ

Abai.kz