باسىلىمنىڭ مالىمەتىنشە، ۇستالعانداردىڭ كوبى ماسكەۋ (1360) مەن سانكت-پەتەربۋرگ (523) ۇلەسىندە. نوۆوسيبيرسكىدە 97, ۆورونەجدە 92, قازاندا 92, نيجني نوۆگورودتا 90 ادامنىڭ ۇستالعانى انىقتالعان.

باسىلىم ۇستالعاندار سانىن ءجيى جاڭارتىپ جاتىر. سوعان قاراعاندا بۇل اقىرعى سان بولۋى ىقتيمال.

23 قاڭتار كۇنى رەسەيدىڭ جۇزدەگەن قالاسىندا وپپوزيتسيالىق ساياساتكەر الەكسەي ناۆالنىيدى بوساتۋدى تالاپ ەتكەن نارازىلىق اكتسيالارى ءوتتى.

ناۆالنىي 17 قاڭتار كۇنى بەرليننەن ماسكەۋگە ورالعان بويدا قاماۋعا الىنعان. 18 قاڭتار كۇنى ماسكەۋ سوتى ونى 30 تاۋلىككە قاماۋ تۋرالى ۇكىم شىعاردى. وسى مەرزىم ارالىعىندا ونىڭ شارتتى جازاسىن قاماۋعا اۋىستىرۋ تۋرالى وتىرىس ءوتۋى كەرەك. اڭگىمە 2014 جىلعى "يۆ روشە" ءىسى جونىندەگى سوت شەشىمى توڭىرەگىندە بولىپ وتىر. ناۆالنىي جاقتاستارى شارتتى جازانىڭ وتكەن جىلدىڭ سوڭىندا اياقتالعانىن ايتادى.

23 قاڭتار كۇنى بولعان ميتينگىلەرگە ناۆالنىيدىڭ ءوزى شاقىرعان. ول بۇل ۇندەۋىن 18 قاڭتار كۇنگى سوت وتىرىسىنىڭ الدىندا جولداعان. كەيىنىرەك ونىڭ شتابى ناقتى كۇندى حابارلادى.

ميتينگ كۇنى جانە ونىڭ قارساڭىندا رەسەي بيلىگى ناۆالنىي جاقتاستارىن ۇستاپ، ءتىنتىپ، ولارعا دەگەن قىسىمدى كۇشەيتتى.

44-جاستاعى ناۆالنىي رەسەي پرەزيدەنتى ۆلاديمير ءپۋتيننىڭ ەڭ باستى قارسىلاسى سانالادى. وتكەن جىلى تامىز ايىندا وپپوزيتسيالىق ساياساتكەر تومسكىدەن ماسكەۋگە ۇشىپ بارا جاتىپ، ەسىنەن تانىپ قالدى. ەكى كۇننەن سوڭ ەس-ءتۇسسىز كۇيى گەرمانياعا جەتكىزىلگەن ناۆالنىي ماسكەۋگە ورالعانعا دەيىن سول ەمدەلگەن. گەرمانيا ۇكىمەتى ناۆالنىيدىڭ "نوۆيچوك" دەيتىن جۇيكە جۇيەسىن سال ەتەتىن ۋمەن ۋلانعانىن مالىمدەدى. ونى رەسمي بەرليننىڭ وتىنىشىمەن بولەك تالداۋ جۇرگىزگەن ءۇش تاۋەلسىز زەرتحانا راستاعان.

ناۆالنىي قاماۋعا الىنعاننان ەكى كۇن وتكەن سوڭ ونىڭ شتابى ء"پۋتيننىڭ سارايى" دەيتىن ەكى ساعاتتىق زەرتتەۋ ءفيلمىن جاريالادى. Youtube جەلىسىندە جاريالانعان زەرتتەۋ وسى ۋاقىتقا دەيىن 77 ميلليون كورىلىم جيناپ ۇلگەرگەن.

Abai.kz