سەنات توراعاسى پاندەمياعا بايلانىستى ۆاكتسيناتسيالاۋدىڭ ءماجبۇرلى تۇردە جۇرگىزىلمەيتىنىن ايتتى. بۇل تۋرالى ماۋلەن اشىمباەۆ facebook-تەگى پاراقشاسىنا جازدى.

ءوز جازباسىندا سەنات سپيكەرى مەملەكەت باسشىسىنىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا كوتەرىلگەن ماسەلەلەرگە نازار اۋدارىپ، پرەزيدەنت تاپسىرمالارىنىڭ ماڭىزىنا توقتالعان.

«پرەزيدەنتىمىز قازاقستاندىقتاردىڭ ناقتى تابىسىن ارتتىرۋ، شاعىن جانە ورتا بيزنەستى قولداۋ، ەكونوميكالىق ءوسۋدى قامتاماسىز ەتۋ ماسەلەلەرىنە باسا ءمان بەردى. سونداي-اق، قاسىم-جومارت كەمەلۇلى مەملەكەتتىك شىعىنداردى وڭتايلاندىرۋ، ازاماتتاردىڭ وتىنىشتەرىن قاراۋدىڭ تيىمدىلىگىن ارتتىرۋ جانە ينتەرنەتتىڭ ساپاسى مەن جىلدامدىعىنا قاتىستى ماسەلەلەردى شەشۋ جۇمىستارى بويىنشا تاپسىرمالار بەردى»، – دەيدى ماۋلەن اشىمباەۆ.

سونىمەن قاتار، سەنات توراعاسى ۆاكتسيناتسيالاۋ ماسەلەسى تۋرالى ءسوز قوزعاپ، بۇل تاقىرىپتىڭ قازىر قوعامدا جان-جاقتى تالقىلانىپ جاتقانىن اتاپ وتكەن.

«وسى رەتتە دەنساۋلىق تۋرالى كودەكستى قابىلداۋ كەزىندە سەناتورلار ەمدەۋدەن جانە پروفيلاكتيكالىق ەكپەلەردەن باس تارتۋ مۇمكىندىگى تۋرالى تۇزەتۋلەر ەنگىزگەنىن اتاپ وتكەن ءجون. سوندىقتان الەۋمەتتىك جەلىلەردە ايتىلىپ جۇرگەن كەيبىر پىكىرلەرگە بايلانىستى قازاقستاندا ۆاكتسينا ەگۋدى ءماجبۇرلى تۇردە جۇرگىزۋ مۇمكىن ەمەستىگىن ايتقىم كەلەدى.

الايدا، تەك ۆاكتسيناتسيا ارقىلى عانا پاندەمياعا توسقاۋىل قويۋعا بولاتىنىن ءتۇسىنۋىمىز كەرەك. تاريحتا مۇنداي جاعداي العاش رەت بولىپ وتىرعان جوق. ىندەت جايلاعان كەزەڭدەردە ۆاكتسينا ادامزاتتى بىرنەشە رەت امان ساقتاپ قالدى. سوندىقتان قازىر تاڭداۋ جاساۋىمىز قاجەت. قانشا ۋاقىتقا جالعاساتىنى بەلگىسىز، ۇلكەن الەۋمەتتىك سالدارى بار كارانتيندىك شەكتەۋلەردى ءارى قاراي كۇشەيتكەن دۇرىس پا، الدە جاپپاي ۆاكتسيناتسيالاۋ ارقىلى ۇجىمدىق يممۋنيتەت قالىپتاستىرىپ، قالىپتى ومىرىمىزگە قايتا ورالعانىمىز جاقسى ما؟ جاۋاپ اركىمگە تۇسىنىكتى بولار.

ۆاكتسيناتسيالاۋ - ءماجبۇرلى شارا ەمەس. بىراق، تۇتاس حالىقتىڭ دەنساۋلىعىن ساقتاۋ تۇرعىسىنان وتە ماڭىزدى قادام. سوندىقتان مەملەكەتتىك اپپارات پەن قوعامدىق ينستيتۋتتار بۇل باعىتتا ءتۇسىندىرۋ جۇمىستارىن كەڭىنەن جۇرگىزۋگە ءتيىس»، – دەلىنگەن جازبادا.

سونداي-اق، ماۋلەن اشىمباەۆ ۇكىمەت وتىرىسىندا پرەزيدەنت بۇدان باسقا دا ماڭىزدى ماسەلەلەرگە توقتالىپ، ۇكىمەت پەن اكىمدەرگە ناقتى مىندەتتەر جۇكتەلگەنىن تىلگە تيەك ەتكەن.

«وسىعان وراي سەنات الداعى ۋاقىتتا ماجىلىسپەن بىرلەسىپ، مەملەكەت باسشىسىنىڭ باستامالارى مەن تاپسىرمالارىن تابىستى ىسكە اسىرۋعا قاجەتتى زاڭدار قابىلداۋ جۇمىستارىنا باسىمدىق بەرەدى»، – دەيدى سەنات توراعاسى.

Abai.kz