«قازاقكونتسەرت» مەملەكەتتىك كونتسەرتتىك ۇيىمى «قازاق راديوسىنىڭ» 100 جىلدىق مەرەيتويىنا وراي مەرەكەلىك كونتسەرت ارنادى. «Qazaqstan» وكز كامەرالىق زالىندا وتكەن كونتسەرت ەكى ۇلكەن ۇيىمنىڭ ىنتىماقتاستىق قارىم-قاتىناسىن نىعايتا ءتۇستى. 

«قازاقكونتسەرت» پەن «قازاق راديوسى» ۇيىمدارىن كوپتەگەن مادەني-تانىمدىق جوبالار بايلانىستىرادى. سونداي-اق عاسىر قۇرداسى اتانعان راديونىڭ التىن قورىندا قازاقكونتسەرتتە ەڭبەك ەتكەن ونەر ساڭلاقتارىنىڭ تۋىندىلارى ساقتالعان. بيىل «قازاقكونتسەرت» ۇيىمى دا ءوزىنىڭ 60 جىلدىعىن اتاپ وتەتىنىن ەسكەرسەك، بۇل قوس مەرەيتويعا ارنالعان كونتسەرت ۇلت رۋحانياتىن ارتتىرا تۇسكەنى انىق. 

مەرەكەلىك ءىس-شارا بارىسىندا ءوزىنىڭ قۇتتىقتاۋ ءسوزىن «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى جەڭىس سەيدۋللاۇلى جەتكىزدى:

- اقپاراتتىق، تاريحي-تانىمدىق، مəدەني-اعارتۋشىلىق باعىتتاعى وزەكتى تۋىندىلار توعىسقان وسىنداي ىرگەلى ۇيىممەن قازاقكونتسەرتتىڭ ىنتىماقتاستىق ورناتۋى ءبىزدى ەرەكشە قۋانتادى. قازاق مۋزىكا ونەرىنىڭ قاراشاڭىراعى اتانعان قازاقكونتسەرتتىڭ تاريحى «قازاق راديوسىمەن» تىعىز بايلانىستى. قازاقكونتسەرتتە ەڭبەك ەتكەن ونەر ساڭلاقتارىنىڭ تۋىندىلارى قازاق راديوسىنىڭ تولقىنىندا ەستىلگەن سايىن ءبىزدىڭ دە تاريحىمىز جاڭعىرا، جاڭارا تۇسەدى.  عاسىر قۇرداسى اتانعان «قازاق راديوسى» وركەندەي بەرسىن. شىعارماشىلىقتارىڭىز تابىسقا، ەڭبەكتەرىڭىز ۇلكەن جەتىستىكتەرگە ۇلاسسىن! حالىق رۋحانياتىن دامىتاتىن قازاقكونتسەرت پەن قازاق راديوسىنىڭ بىرلەسكەن جوبالارى كوپ بولسىن!- دەدى ءوز سوزىندە جەڭىس سەيدۋللاۇلى. 

ۇيىمداستىرۋشىلاردىڭ مالىمدەگەندەي، كونتسەرت بارىسىندا بارلىق ساقتىق شارالارى ساقتالدى.  

مەرەكەلىك كونتسەرتتە «استانا سازى» مەملەكەتتىك فولكلورلىق ءانسامبلى، ەربولات شالدىبەكوۆ، كلارا تولەنباەۆا، ايگۇل ەلشىباەۆا، قۇرماش ماحانوۆ، گۇلنار كوشەنوۆا سىندى ارتىستەر ونەر كورسەتتى. كونتسەرت باعدارلاماسىنا بەلگىلى حالىق تۋىندىلارى مەن زاماناۋي شىعارمالار ەنگەن. «قازاق راديوسىنىڭ» ۇجىمى دا وزدەرىنىڭ العىستارىن جەتكىزىپ، ەكى ۇيىم اراسىنداعى سەرىكتەستىك ودان ءارى كۇشەيە تۇسەتىنىنە سەنىم ءبىلدىردى.

Abai.kz