قر پرەمەر-ءمينيسترى اسقار مامين قر اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) سەلەكتورلىق وتىرىسىن وتكىزدى.

سانيتارلىق-ەپيدەميولوگيالىق جاعداي تۋرالى دەنساۋلىق ساقتاۋ ءمينيسترى الەكسەي تسوي، ۆاكتسينا ءوندىرۋ جونىندەگى جۇمىس تۋرالى ءبىلىم جانە عىلىم ءمينيسترى اسحات ايماعامبەتوۆ، كارانتيندىك شارالاردىڭ ساقتالۋىن باقىلاۋ تۋرالى ىشكى ىستەر ءمينيسترى ە. تۇرعىمباەۆ، وڭىرلەردەگى احۋال تۋرالى اقمولا وبلىسىنىڭ اكىمى ەرمەك مارجىقپاەۆ، قوستاناي وبلىسىنىڭ اكىمى ارحيمەد مۇحامبەتوۆ، سولتۇستىك قازاقستان وبلىسىنىڭ اكىمى قۇمار اقساقالوۆ باياندادى.

قر-داعى قازىرگى سانيتارلىق-ەپيدەميولوگيالىق جاعداي كۇردەلى — رەسپۋبليكا «جوعارى قاۋىپتىلىك ايماعىنا» كىردى، 8 ءوڭىر «قىزىل ايماقتا» تۇر: نۇر-سۇلتان جانە الماتى قالالارى، اقمولا، اتىراۋ، باتىس قازاقستان، قوستاناي، پاۆلودار جانە سولتۇستىك قازاقستان وبلىستارى. كۇن سايىن 1,5 مىڭعا جۋىق جاڭا سىرقاتتانۋ جاعدايى تىركەلەدى، رەپرودۋكتيۆتىك كورسەتكىشى – 1,14. ينفەكتسيالىق توسەك ورىندارىنىڭ جۇكتەمەسى – 31%، رەانيماتسيالىق – 20%.

QazCovid-in وتاندىق ۆاكتسيناسى كلينيكالىق سىناقتاردىڭ III كەزەڭىنەن وتۋدە (الدىن الا تيىمدىلىگى – 96%). «سپۋتنيك V» ۆاكتسيناسىنىڭ ساپاسىن اتتەستاتتاۋ جۇمىستارى جۇرگىزىلىپ جاتىر. حالىقتى «سپۋتنيك V-مەن» جاپپاي ۆاكتسينالاۋ 1 اقپاندا باستالادى.

ۇكىمەت باسشىسى ءبىلىم جانە عىلىم مينيسترلىگىنە بيولوگيالىق قاۋىپسىزدىك پروبلەمالارى ينستيتۋتى بازاسىندا QazCovid-in ۆاكتسيناسىنىڭ تاجىريبەلىك پارتياسىن جانە «انتيگەن» عوك» جشس وندىرىستىك الاڭىندا تاجىريبەلىك-ونەركاسىپتىك پارتيانى شىعارۋدى قامتاماسىز ەتۋدى تاپسىردى.

پرەمەر-مينيستر اكىمدىكتەرگە ۆاكتسينانى ساقتاۋ ءۇشىن قاجەتتى جابدىقتاردى ساتىپ الۋدى اياقتاپ، ەگۋ پۋنكتتەرىنىڭ تولىق دايىندىعىن بيىلعى 1 اقپانعا دەيىن قامتاماسىز ەتۋدى تاپسىردى.

اقپارات مينيسترلىگىنە دەنساۋلىق ساقتاۋ مينيسترلىگىمەن بىرلەسىپ، كوروناۆيرۋس ينفەكتسياسىنا قارسى ۆاكتسينالاۋ تۋرالى اقپاراتتىق-ءتۇسىندىرۋ جۇمىسىن قامتاماسىز ەتۋ، ىشكى ىستەر مينيسترلىگىمەن بىرلەسىپ، ۆاكتسينالاۋ ماسەلەلەرىنە قاتىستى ارانداتۋ جانە جالعان اقپارات تاراتۋ فاكتىلەرىن ۋاقىتىلى توقتاتۋ تاپسىرىلدى.

ۇكىمەت باسشىسى ەپيدەمياعا قارسى ءىس-شارالارعا تارتىلعان قىزمەتكەرلەردىڭ قاۋىپسىزدىگى ماسەلەلەرىنە ەرەكشە باقىلاۋ جاساۋ قاجەتتىگىن اتاپ ءوتتى.

«ۆاكتسينا ءوندىرىسىن قامتاماسىز ەتۋ جانە حالىقتى جاپپاي ۆاكتسينالاۋدى وتكىزۋ دەنساۋلىق ساقتاۋ سالاسىنداعى ۇكىمەتتىڭ بۇگىنگى كۇنگى نەگىزگى مىندەتى»، — دەدى ا. مامين.

Abai.kz