ونىڭ ايتۋىنشا، ۆاكتسينانىڭ ءبىر بولىگى رەسەيدىڭ وزىنەن ساتىپ الىنادى، ال ءبىر بولىگىن قاراعاندىدا ورنالاسقان "قاراعاندى فارماتسەۆتيكا كەشەنى" وندىرەدى. جەلتوقساندا مۇندا "سپۋتنيك V" ۆاتسيناسىنىڭ العاشقى سىناق نۇسقاسى شىعارىلعان.

— بيۋدجەتتە جالپى 10 ميلليونداي ادامدى قازاقستاندىق، رەسەيلىك جانە بالكىم باسقا [ۆاكتسينامەن] قامتاماسىز ەتۋگە جەتەتىن قارجى قاراستىرىلعان، ونىڭ كولەمى شامامەن 50 ميلليارد تەڭگە. سونىڭ ىشىندە رەسەي ۆاكتسيناسىنىڭ 2 ميلليون دوزاسى بار. ەكى دوزاعا 20 دوللاردان، جالپى 14 ميلليارد تەڭگە، — دەدى شورانوۆ.

جۋرناليستەر بريفينگ بارىسىندا-اق ەسەپتەپ، رەسەي ۆاكتسيناسىنىڭ ەكى دوزاسى 20 دوللاردان بولعاندا جالپى 16,8 ميلليارد تەڭگە كەتەدى دەگەن قورىتىندى شىعاردى. ارتىنشا ۆيتسە-مينيستر "ويشا ەسەپتەگەندە قاتەلەسكەنىن" ايتىپ، رەسەي ۆاكتسيناسىنا "16 مەن 17 ميلليارد تەڭگە ارالىعىندا" قاراجات ءبولىندى دەدى. ونىڭ ايتۋىنشا، قالعان اقشا سىناق ءالى اياقتالماعان قازاقستاندىق ۆاكتسينانى الۋعا ارنالعان.

شورانوۆتىڭ ايتۋىنشا، رەسەيدە يا قازاقستاندا شىعارىلعانىنا قاراماستان، "سپۋتنيك V" ۆاكتسيناسىنىڭ باعاسى بىردەي بولماق. ۆاكتسينانىڭ پارتياسىنا بايلانىستى باعا "20 مەن 26 دوللار اراسىندا قۇبىلۋى مۇمكىن", كەلىسىمدەرگە قول قويىپ، سوڭعى كوممەرتسيالىق ۇسىنىستى بەرگەننەن كەيىن عانا سوڭعى سوما ناقتىلانادى دەدى شورانوۆ.

رەسەي ۆاكتسيناسىنىڭ قازاقستاندا وندىرىلەتىنىن حابارلاعان ەل ۇكىمەتى جەلتوقساننىڭ سوڭىندا لوگيستيكانى قاپەرگە العاندا قاراعاندىدا شىعاتىن ۆاكتسينا ارزانداۋ بولۋى كەرەك دەگەن ەدى.

مۇنىڭ الدىندا قازاقستاننىڭ دەنساۋلىق ساقتاۋ ءمينيسترى الەكسەي تسوي حالىققا رەسەي ۆاتسيناسىن سالۋ 1 اقپاندا باستالادى دەپ مالىمدەگەن. ناۋرىزدا مەكتەپ مۇعالىمدەرى مەن ۋنيۆەرسيتەت وقىتۋشىلارىنا، ۆەدومستۆولىق مەديتسينا مەكەمەلەرى وكىلدەرىنە; ساۋىردەن باستاپ مەكتەپ-ينتەرنات، مەكتەپكە دەيىنگى مەكەمە قىزمەتكەرلەرى، ستۋدەنتتەر مەن سوزىلمالى اۋرۋى بار ازاماتتارعا ۆاكتسينا سالىنباق.

تسويدىڭ ايتۋىنشا، جىل سوڭىنا دەيىن 6 ميلليون ادامعا ۆاكتسينا سالۋ جوسپارلانعان. سونىڭ ىشىندە جىلدىڭ ءبىرىنشى جارتىسىندا 2 ميلليون كىسىگە ەكپە سالىنباق. ايلارعا بولگەندە: اقپاندا – 100 مىڭ، ناۋرىزدا – 150 مىڭ، ساۋىردە – 600 مىڭ ادامدى قامتۋ جوسپارلانعان.

جوسپار بويىنشا، "قاراعاندى فارماتسەۆتيكا كەشەنى" ساۋىردەن باستاپ ايىنا 600 مىڭ دوزا ۆاكتسينا شىعارۋى كەرەك. 18 قاڭتاردا رەسەيدىڭ اقپارات اگەنتتىكتەرى "سپۋتنيك V" ەكپەسىنىڭ قازاقستانداعى كەشەندە وندىرىلگەن سىناق نۇسقاسى ونى ازىرلەگەن گامالەيا اتىنداعى ينستيتۋتتا تەكسەرۋدەن وتكەنىن حابارلادى. ۆاكتسينا ازىرلەۋ پروتسەسىن قارجىلاندىرعان رەسەي تىكەلەي ينۆەستيتسيا قورى جەلتوقساندا قازاقستاننىڭ دەنساۋلىق ساقتاۋ مينيسترلىگىمەن كەلىسىمشارت جاساسقان. سودان سوڭ "قاراعاندى فارماتسەۆتيكا كەشەنى" قاجەت سۇيىقتىقتى الىپ، "سپۋتنيك V" ۆاكتسيناسىنىڭ العاشقى 6 مىڭ دوزاسىن جاسادى.

قازاقستان باسشىلىعى ازىرگە سىناقتىڭ بارلىق كەزەڭىنەن ءوتىپ، تيىمدىلىگى مەن قاۋىپسىزدىگىن دالەلدەگەن باتىستىڭ AstraZeneca, Pfizer-BioNTech, Moderna ۆاكتسينالارىن الۋ جوسپارىن ايتقان جوق. باتىس عالىمدارى "سپۋتنيك V" ۆاكتسيناسىنىڭ كلينيكالىق سىناق ناتيجەسىنە كۇمانمەن قارايدى.

Abai.kz