پرەزيدەنت قاسىم-جومارت توقاەۆ سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتى قابىلدادى

مەملەكەت باسشىسىنا اگەنتتىكتىڭ وتكەن جىلى اتقارعان جۇمىسىنىڭ نەگىزگى ناتيجەلەرى جايىندا باياندالدى.

اليك شپەكباەۆ مەملەكەت باسشىسىنا سىبايلاس جەمقورلىققا قارسى باستامالاردىڭ ىسكە اسىرىلۋى جانە ەلىمىزدىڭ Transparency International سىبايلاس جەمقورلىقتى قابىلداۋ يندەكسى بويىنشا ىلگەرىلەگەنى تۋرالى ايتتى. اگەنتتىك توراعاسىنىڭ ايتۋىنشا، جۇيەلى جۇرگىزىلىپ جاتقان ساياسي جاڭعىرۋ مەن سىبايلاس جەمقورلىققا قارسى رەفورمالاردىڭ ارقاسىندا قازاقستان اتالعان رەيتينگتە العاش رەت 38 بالل جيناعان. بۇل ەلىمىزدىڭ 19 ساتىعا جوعارى كوتەرىلىپ، 94-ءشى ورىنعا تابان تىرەۋىنە مۇمكىندىك بەرگەن.

قاسىم-جومارت توقاەۆ اگەنتتىكتىڭ شىعىنداردى وتەۋ جانە ءتيىمسىز جۇمسالعان قارجىنىڭ الدىن الۋ بويىنشا اتقارعان جۇمىسىنىڭ ناتيجەسىندە 95,6 ميلليارد تەڭگەنىڭ كەرى قايتارىلعانىن، ونىڭ ەكونوميكالىق تيىمدىلىگىن وڭ باعالادى. سونداي-اق سىبايلاس جەمقورلىق قىلمىستارىنىڭ 5 پايىزعا تومەندەگەنىن اتاپ ءوتتى.

مەملەكەت باسشىسى سىبايلاس جەمقورلىققا قارسى جاڭا زاڭنامالىق باستامالاردى ساپالى تۇردە جۇزەگە اسىرۋعا جانە ەىدۇ مەن گرەكو ستاندارتتارىنا سايكەس سالالىق زاڭنامانى جاڭعىرتۋدى جالعاستىرۋعا، ونىڭ ىشىندە، شەنەۋنىكتەردىڭ شىعىستارى مەن كىرىستەرى ءبىر-بىرىنە سايكەس كەلمەگەنى ءۇشىن جاۋاپكەرشىلىك ەنگىزۋ ماسەلەسىنە نازار اۋداردى.

كەزدەسۋ سوڭىندا پرەزيدەنت اگەنتتىك توراعاسىنا جازانى بۇلتارتپاي ورىنداۋ قاعيداتىن قاتاڭ ساقتاۋدىڭ ماڭىزدى ەكەنىن ايتىپ، قىلمىستىڭ الدىن الۋ ىسىندە ازاماتتىق قوعاممەن بايىپتى جۇمىس جۇرگىزۋدى تاپسىردى.

Abai.kz