باسشى قىزمەتكەرى جەمقورلىققا ۇرىنسا، لاۋازىمىنان بىردەن بوساتىلادى. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ايتتى.

«2020 جىلى قاراماعىنداعى قىزمەتكەرلەردىڭ سىبايلاس جەمقورلىق ارەكەتتەرى ءۇشىن 6 ساياسي قىزمەتشى وتستاۆكاعا جىبەرىلىپ، 9 ساياسي قىزمەتكەر، سونداي-اق اكىمشىلىك مەملەكەتتىك قىزمەت لاۋازىمىنداعى 39 باسشى جانە كۆازيمەملەكەتتىك سەكتوردىڭ 5 توپ-مەنەدجەرى تارتىپتىك جاۋاپكەرشىلىككە تارتىلدى»، - دەدى اليك شپەكباەۆ اگەنتتىكتىڭ القا وتىرىسىندا.

سونىمەن قاتار ول وتستاۆكا تۋرالى جاڭالىقتار ازاماتتار مەن باق-تىڭ ءجىتى نازارىندا ەكەنىن ەرەكشە اتاپ ءوتتى.

«بارلىعى باسشى بولۋعا ۇمتىلادى، بىراق كەز-كەلگەنى قاراماعىنداعى قىزمەتكەرى ءۇشىن جاۋاپكەرشىلىك الۋعا دايىن ەمەس. وتستاۆكاعا كەتۋ تۋرالى جاي ءوتىنىش بەرۋ جانە ءىس جۇزىندە وتستاۆكاعا كەتۋ – ەكى ءتۇرلى ارەكەت. ءجيى بەرىلەتىن ەسكەرتۋلەر مەن سوگىستەر ازاماتتاردىڭ تەك اشۋىن تۋعىزادى. سوندىقتان، زاڭمەن قوسا مورالدىك-ەتيكالىق قاعيداتتاردى دا باسشىلىققا الاتىن ۋاقىت كەلدى. وسى تۇرعىدا ءبىز كەڭەسىپ، اگەنتتىك قىزمەتكەرى سىبايلاس جەمقورلىق قۇقىق بۇزۋشىلىققا جول بەرسە ونىڭ تىكەلەي باسشىسىن اتقاراتىن لاۋازىمىنان بىردەن بوساتۋ تۋرالى شەشىم قابىلدادىق. تەك باسشىلار سىبايلاس جەمقورلىق فاكتىسىن ءوز بەتىنشە انىقتاپ، جولىن كەسكەن جاعدايلاردا عانا قولدانىلمايدى»، - دەدى اگەنتتىك باسشىسى.

دەرەككوز: قازاقپارات

Abai.kz