ۇكىمەت وتىرىسىندا پرەزيدەنتىمىز: «جاڭا ءالىپبي باستاماسى – بۇل كۇردەلى ءارى  شەتىن ماسەلە ەكەنىن ۇمىتپاعان ءجون. جاڭا گرافيكانى ەنگىزۋ ءبىر كۇندە يا بولماسا، ءتىپتى، ءبىر جىلدا ىسكە اسا قوياتىن جۇمىس ەمەس. ايتپەسە، اسىعىستىق بۇكىل مادەنيەتىمىزگە جانە تاريحي بولمىسىمىزعا زيان كەلتىرۋى مۇمكىن. ماسەلە – كيريلليتسادان لاتىن الىپبيىنە اۋدارۋدا ەمەس، بۇل قازاق ءتىلىنىڭ اۋقىمدى رەفورماسى دەگەن ءسوز. قارجى ماسەلەسىن دە ەسكەرۋىمىز كەرەك. لاتىن ءالىپبيىن ەنگىزۋ جۇمىسى  بىرتىندەپ جۇزەگە اسۋى كەرەك. نەگىزىندە، بۇل گرافيكا  جاس ۇرپاققا ارنالعان دەپ ايتۋعا بولادى. ونىڭ يگىلىگىن، ەڭ الدىمەن، سولار كورۋى كەرەك. سوندىقتان، بۇل ءۇردىس جوسپارلى تۇردە، بىرتىندەپ ىسكە اسىرىلۋى قاجەت»، – دەدى.

بىراق ءوز قولىمىزداعى قازاق ءتىلىنىڭ اۋقىمدى رەفورماسى ارقىلى ءبىر كۇندە قۇتىلۋعا بولاتىن ەكى بالەلى اتاۋ بار. ەندى سول جايىندا ءسوز قوزعايىق.

قازىر قازاق ەلىن الەمگە تانىتاتىن ىنتەرنەت پەن مەملەكەت اتاۋىندا كەزىندە ساياسي الاڭعاسالىق شىرماۋىمەن ورىس ءتىلىنىڭ ىقپالىمەن جازىلعان جانە ورىس ءتىلدى ءىت ماماندارىنىڭ بىلمەستىگىمەن 1990 جىلداردىڭ باسىندا الەمدىك قولدانىسقا ەنىپ كەتكەن، كوزگە شىققان سۇيەلدەي Republic of Kazakhstan دەگەن مەملەكەتتىك اتىمىز جانە KZ حالىقارالىق دومەندىك اتاۋىمىز بار. ولاردى Republic of  Qazaqstan جانە QZ دەپ وزگەرتۋگە نەگە ءالى كۇنگە دەيىن مويىنىمىز جار بەرمەيدى.  

ەندى ءالىپبيىمىزدى ۇلتتىق اۋەزەگە كەلتىرگەنىمىز سياقتى Republic of  Qazaqstan جانە QZ-ءتى حالىقارالىق ستاندارتتاپ بۇرىنعى قاتە جازىلىپ جۇرگەن لاتىنشا جازىلۋدى جونگە كەلتىرۋدىڭ جولىن ىزدەستىرىپ، قانشا شىعىن كەتەتىن ەسەپتەپ شىعارىپ ىسكە بەل شەشە كىرىسەتىن ۋاقىت كەلگەن سياقتى.

ءبىز كەلەر ۇرپاققا تەك ۇلتتىق جازۋىمىزدى عانا ەمەس، ۇلتتىق تۇرپاتتاعى ەل اتاۋىندا مۇراعا قالدىرامىز عوي؟! بيىل تاۋەلسىزدىكتىڭ 30 جىلدىعىن تويلاعالى وتىرعان شاقتى پارلامەنت دەپۋتاتتارى وسىنداي ماڭىزى بار دۇنيەلەردى نەگە كوتەرمەيدى؟! ولار وسىنى قولعا الىپ ىسكە اسىرسا، ۇلتىمىز ءۇشىن ەرەك سىي بولار ەدى-اۋ!!! الدە بۇل Republic of  Qazaqstan جانە QZ حالىقارالىق اتاۋلارى قازاق ءتىلىنىڭ اۋقىمدى رەفورماسىنا جاتپايتىن وگەي-قاعاي بالالار ما!؟

ءابىل-سەرىك الياكبار

Abai.kz