1 ناۋرىز كۇنى ەلىمىزدە جالپىحالىقتىق مەرەكە - العىس ايتۋ كۇنى اتالىپ وتەدى. وسى مەرەكە قارساڭىندا بەلگىلى قوعام قايراتكەرى، قازاقستان حالقى اسسامبلەياسىنىڭ مۇشەسى، قازاقستاننىڭ ەڭبەك سىڭىرگەن قايراتكەرى، فيلولوگيا عىلىمىنىڭ دوكتورى، پروفەسسور، ءتىل جاناشىرى اسىلى وسمان قازاق حالقىنا دەگەن ريزاشىلىعى ءبىلدىردى. 

ونىڭ ايتۋىنشا، العىس ءسوزىنىڭ ءوزى ىستىق ىقىلاس، جىلى جۇرەكپەن ايتىلعان ىزگى نيەتتەگى ءسوز.

«العىس دەگەن ءسوزدىڭ ءمانى ەرەكشە. قيىن كەزەڭدە جارتىسىن جارىپ، ءبۇتىنىن ءبولىپ، وزگە ەتنوستاردى باۋىرىنا باسقان قازاق حالقىنا العىسىمىز شەكسىز. سول داۋىرلەردە بىزگە پانا دا، انا دا بولعان - قازاق. قازاق حالقىنىڭ ارقاسىندا ءبىز بۇگىنگى كۇنگە جەتىپ وتىرمىز»، - دەيدى اسىلى وسمان.

قازاقستان حالقى اسسامبلەياسى مۇشەسىنىڭ ويىنشا، جەر بەتىندە قازاق حالقىنداي حالىق جوق.

«ءوز باسىم العىستى الدىمەن كوكتەگى قۇدايعا، ودان كەيىن جەردەگى دارحاندىعى دالاسىنان دارىعان سول دالانىڭ يەسى قازاق دەگەن حالىققا ايتامىن. ءسوزى قۋاتتى، ءجۇزى شۋاقتى، تىلەگى تۇنىق، نيەتى اق، ەشكىمدى جاتسىنبايتىن قازاق حالقىنا بارشا ەتنوس وكىلدەرى قارىزدار. قازاق حالقى بۇلتتان تومەن بولعانىمەن وزگەدەن بيىك دەپ سانايمىن»،- دەيدى ول.

سونىمەن قاتار، ول ءاربىر وتباسى ءبىر-ءبىر مەملەكەت ەكەنىن اتاپ ءوتتى. وتباسىندا تىنىشتىق بولسا، مەملەكەتتىڭ دە بىرلىگى بەكەم بولادى، دوستىق نىعايادى. بۇل ورايدا قازاقستان حالقى اسسامبلەياسىنىڭ اتقارىپ وتىرعان ءرولى زور.

«ءبىز «العىس ايتۋ كۇنىندە» عانا ەمەس، ءاردايىم ءبىر-بىرىمىزگە شىنايى نيەتىمىزدى، العىسىمىزدى ءبىلدىرىپ ءجۇرۋىمىز كەرەك. قازاقستان حالقى اسسامبلەياسىنىڭ دا باستى ماقساتى – ۇلتارالىق كەلىسىمدى نىعايتۋ، ەلىمىزدەگى تۇراقتىلىقتى قامتاماسىز ەتۋ»،- دەدى قازاقستاننىڭ ەڭبەك سىڭىرگەن قايراتكەرى.

ايتا كەتەيىك، 2015 جىلدىڭ ءساۋىر ايىندا قحا 22-ءشى سەسسياسى مەن قحا 20 جىلدىعىن مەرەكەلەۋ كەزىندە قر تۇڭعىش پرەزيدەنتى – ەلباسى قازاقستاندا العىس كۇنىن اتاپ ءوتۋدى ۇسىندى. بۇل كۇن - بارلىق قازاقستاندىقتاردىڭ ءبىر-بىرىنە دەگەن ماحابباتى مەن دوستىعىنىڭ جارقىن بەلگىسى.

Abai.kz