شەتەلدىكتەرگە جەردى ساتۋعا زاڭ جۇزىندە ءبىرجولا تىيىم سالىنادى. بۇل تۋرالى ۇلتتىق قوعامدىق سەنىم كەڭەسىنىڭ 5-وتىرىسىندا قر پرەزيدەنتى قاسىم-جومارت توقاەۆ ايتتى. 

«مەملەكەت باسشىسى: حالقىمىز ءۇشىن جەر ماسەلەسى قاشاندا اسا ماڭىزدى. بۇل – مەملەكەتتىگىمىزدىڭ بەرىك نەگىزى جانە قاسيەتتى سيمۆولى. قازاقتىڭ جەرى شەتەلدىكتەرگە ساتىلمايدى دەپ بىرنەشە رەت ايتتىم. بۇل ماسەلەگە قاتىستى قاۋەسەتتەردى توقتاتۋ قاجەت.

سوندىقتان، مەن مىناداي ناقتى شەشىمدەر قابىلدادىم. بىرىنشىدەن، شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىرامىن. بۇل شەتەلدىكتەردىڭ ۇلەسى بار زاڭدى تۇلعالارعا دا قاتىستى»، - دەدى قازاقستان پرەزيدەنتى.

«كوميسسيا (جەر رەفورماسى جونىندەگى كوميسسيا) جۇمىسىنىڭ ءاربىر كەزەڭى جانە وندا ۇسىنىلعان شارالار تۋرالى حالىقتى ۇنەمى حاباردار ەتىپ وتىرۋ كەرەك. باستى مىندەتتىڭ ءبىرى - كوميسسيا جۇمىسىنىڭ جانە شەشىم قابىلداۋدىڭ ەرەكشە اشىقتىعىن كورسەتۋ. ءبىز جەرگە قاتىستى قوعام تاراپىنان كوتەرىلگەن بارلىق ماسەلەنى دۇرىس جانە ءتيىمدى شەشە الامىز دەپ سەنەمىن»، - دەدى قازاقستان پرەزيدەنتى.

مەملەكەت باسشىسى بۇل شەشىمدەر ەڭ الدىمەن، ەل ەكونوميكاسىن دامىتۋعا جانە ازاماتتاردىڭ تۇرمىس ساپاسىن ارتتىرۋعا ارنالاتىندىعىن باسا ايتتى.

«ەڭ باستىسى، جەر شەتەلدىكتەرگە ساتىلمايتىنى تۋرالى تۇبەگەيلى شەشىم قابىلداندى»، - دەدى قاسىم-جومارت توقاەۆ.

Abai.kz