2016 جىلدان بەرى جەر ءۇشىن ايتىسپاعان ادامىم، جازباعان كەم-كەتىكتەر قالماعان شىعار. ءدال قازىر نە دەسەك تە وتكەندى ورنىنا كەلتىرە المايمىز. بىراق، جىبەرگەن ولقىلىقتىڭ ورنىن تولتىراتىن مۇمكىندىك تۋىپ تۇر.

پرەزيدەنتىمىز ق-ج.توقاەۆ مىرزا قازاقتىڭ تاريحىنداعى ەڭ ۇلكەن قۇندى جارلىعىنىڭ ءبىرىن جاريالادى.

قازاق ءۇشىن ەڭ باستى قۇندىلىق:

ءبىرىنشىسى - تاۋەلسىزدىكتىڭ جاريالانۋى،

ەكىنشىسى - شەكارامىزدىڭ بەكىتىلۋى،

ءۇشىنشىسى - سول جەرىمىزدىڭ شەتەلدىكتەردىڭ يەمدەنۋىنەن ساقتاپ قالۋ،

ءتورتىنشىسى -  تىل ماسەلەسى.

قايسىبىر مەملەكەت بولسا دا، وسى ءتورت «تاعانى» نىق بولسا، سول مەملەكەتتىڭ بولاشاعىنا ۇلكەن سەنىممەن قاراۋعا بولادى.

ەندى، مەملەكەتتىگىمىزدى ۇستاپ تۇرعان وسى ءتورت «تاعانىمىز» نەسىمەن قۇندى ەكەندىگىنە توقتالىپ وتسەم.

1) تاۋەلسىزدىگىمىز جاريالانىپ، جارلىققا قول قويىلعان كۇننەن باستاپ، ءبىز دەربەس مەملەكەت بولدىق. بۇل يگىلىككە ەشقانداي قۇندىلىق جەتپەيدى. ول داۋسىز.

2) شەكارامىز بەلگىلەنىپ، الەم كارتاسىنان ويىپ تۇرىپ ورىن الۋىمىز — ءبىزدىڭ ەلدىگىمىزدىڭ ەڭ ۇلكەن سيمۆولى.

جەرى جوقتىڭ - ەلى جوق! سوندىقتان، تاۋەلسىزدىك پەن شەكارامىزدىڭ بەلگىلەنۋى ءبىر-بىرىنەن ءبولىپ قاراۋعا كەلمەيتىن ەگىز ۇعىم.

3) شەت مەملەكەتتەردەن جەرىمىزدى قورعاۋ - مەملەكەتتىگىمىزدى قورعاۋ. ەلىمىزدىڭ 80%-ى اۋىل شارۋاشىلىق جەرلەرى ەكەندىگىن ەسكەرسەك، ق-ج.توقاەۆ مىرزانىڭ بۇل جارلىعى جەرىمىزدى، ەلدىگىمىزدى شەتەلدىكتەردىڭ «ارانىنان» الىپ قالۋ (باسقا ماقساتتاعى جەرلەردى قورعايتىن ارنايى زاڭدار بار).

بۇل دەگەنىمىز سوڭعى 20 جىلداعى جارلىقتاردىڭ ەڭ ۇلكەنى دەۋگە بولادى.

سوندىقتان قادىرىن تەرەڭ ءتۇسىنۋىمىز كەرەك!

4) ءتىلىمىزدىڭ ماسەلەسى دە جاقىن بولاشاقتا شەشىلەتىنىنە بەك سەنىمدىمىن. وسى ماسەلەنىڭ دە شەشىلۋىنە از عانا ۋاقىت قالعانى كۇن وتكەن سايىن كورىنىپ تە، سەزىلىپ تە كەلەدى.

ال، ەندى «ءتورت تاعانىمىزدى» شەگەلەپ الۋدىڭ بار ماقساتى - ەلدىگىمىزدى سىرتقى كۇشتەردەن قورعاۋ!

بۇگىنگى كۇنگە دەيىن «ءتورت تاعانىمىزدىڭ» الدىڭعى ەكەۋى شەگەلەنىپ قويىلعان بولسا، بۇگىندەرى تاعى ءبىر «تاعانىمىز» شەگەلەنەدى دەۋگە ابدەن بولادى.

سىرتقى كۇشتەردەن شەكارامىزدىڭ ىشىندەگى جەرلەرىمىزدى قورعايتىن زاڭدى بەكىتىپ الۋ تۋرالى زاڭعا وزگەرىس ەنگىزۋ ءۇشىن جارلىق شىعارۋ — قازاق قازاق بولعالى ءوز جەرىنە تەك ءوزى قوجايىندىق جاساۋىنا مۇمكىندىك بەرەتىن جارلىق!

ۇلتىمىزدىڭ بولاشاعى ءۇشىن جاسالىپ وتىرعان ءاربىر يگى ءىستىڭ باعاسىن ءبىلۋ، باعاسىن ءادىل بەرۋ ءبىزدىڭ مىندەتىمىز.

ارينە، شەتەلدىكتەرگە جەرىمىزدى ساتقىسى كەلىپ وتىرعان «جۋان توپتاردىڭ» ارام پيعىلدارىنان، پرەزيدەنتىمىزدىڭ جولداعان جالعىز جارلىعىمەن قورعاپ قالۋ مۇمكىن ەمەس. ويتكەنى، شەتەلدىكتەردىڭ جەرىمىزدى يمەندەنۋىنە مۇمكىندىك بەرەتىن باسقا دا «شۇرىق-تەسىك» زاڭدارىمىز بار. ولاردىڭ ءبارىن «كوشەدە ءجۇرىپ» بىتەپ شىعۋ مۇمكىن ەمەس.

سوندىقتان، پرەزيدەنتىمىزدىڭ «جەر كوميسسياسىن قۇرۋ» جونىندە جولداعان تاپسىرماسى، توبەدەگى زاڭىمىزدىڭ «جىرتىق-جاماۋىن» تولىق بىتەۋ ءۇشىن، وسىنداي قاجەتتىلىكتىڭ تۋىندايتىنىن، ءارى ەڭ ءتيىمدى جولى ەكەندىگىن تەرەڭ تۇسىنگەندىكتەن، حالىققا بەرىپ وتىرعان ۇلكەن مۇمكىندىك دەپ قاراۋىمىز كەرەك.

الداعى موراتوريدە تۇرعان زاڭدارىمىزعا وزگەرىس ەنگىزىپ، وزگە دە «جىرتىق-جاماۋىن» بىتەۋ ءۇشىن، پرەزيدەنتىمىزدىڭ «قر-نىڭ اش جەرلەرى شەتەل ازاماتتارى مەن زاڭدى تۇلعالارىنا ساتىلمايدى، جالعا دا بەرىلمەيدى» دەگەن جارلىعى، ءبىزدىڭ (حالىقتىڭ) جەردى ساتقىسى كەلىپ وتىرعان لاتيفۋنديستتەرگە قارسى «اياق تىرەر» ەڭ ۇلكەن تىرەگىمىز بولماق.

مىنە، ءدال سوندىقتان عانا، پرەزيدەنتىمىزدىڭ وسى جارلىعى سوڭعى 20 جىلدا حالىققا جەرىمىزدى قورعاپ قالۋعا بەرىپ وتىرعان ەڭ ۇلكەن مۇمكىندىكتىڭ بىرەگەيى!

وسىنى تەرەڭ تۇسىنە بىلەيىك. «تار كورپەمىزدى» جان-جاققا تارتقىلاۋدى دوعارىپ، وسى جارلىقپەن قۇرىلاتىن كوميسسياعا حالىقتىڭ ىشىنەن شىققان ەڭ سەنىمدى، ەڭ ءپرينتسيپتى، ەڭ كورەگەن ازاماتتاردىڭ بولۋى ءۇشىن جۇمىلىپ جۇمىس جاساۋىمىز كەرەك.

وسى جولدا بۇعان دەيىن ورىن العان باسقا دا ماسەلەلەرمەن اشۋ -ارازدىققا بارعان ازاماتتار بولسا، مەن ولاردى وسى جولدا كەشىردىم! وسىناۋ قازاق ءۇشىن «نە بەل كەتەتىن، نە بەلبەۋ كەتەتىن» شاقتا، حالىقتى جان-جاققا تارتقىلاۋ - ءوز حالقىنا جاسالعان وپاسىزدىق بولىپ تاريحتا قالاتىنىن ۇمىتپاساق ەكەن.

رۇستەم اشەتاەۆ

Abai.kz