2020 جىلى قازاقستان قىتايعا 9 ملرد اقش دوللارى كولەمىندە ەكسپورت جاساعان. ال 2023 جىلعا قاراي ەكى ەل $24,5 ملرد-قا 56 زاماناۋي كاسىپورىن سالۋدى جوسپارلاپ وتىر. بۇل تۋرالى قر ساۋدا جانە ينتەگراتسيا مينيسترلىگى مالىمدەدى. 

ناقتىراق ايتساق، 1 ناۋرىز كۇنى قر ساۋدا جانە ينتەگراتسيا ۆيتسە-ءمينيسترى قايرات تورەباەۆ قحر كوممەرتسيا ۆيتسە-ءمينيسترى ۆان شوۋۆەنمەن قازاقستان-قىتاي «قورعاس» شەكارا قىزمەتىن ۇيلەستىرۋ جۇمىسىنىڭ 2-ءشى وتىرىسىنا دايىندىق بويىنشا كەلىسسوزدەر وتكىزدى.

كەلسسوز بارىسىندا ۆيتسە-مينيستر قايرات تورەباەۆ قىتاي مەن قازاقستان 56 كاسىپورىن سالۋدى جوسپارلاپ وتىرعانىن جانە ونىڭ قۇرىلىسى 2023 جىلى اياقتالاتىنىن ايتتى.

- 2005 – 2020 جىلدار كەزەڭىندە قىتاي ينۆەستيتسيالارىنىڭ جالپى كولەمى $19,2 ملرد استى. سونىمەن قاتار، قىتايعا تىكەلەي ينۆەستيتسيالاردىڭ جىلىستاۋى $667,2 ملن قۇرادى. يندۋستريالىق-ينۆەستيتسيالىق ىنتىماقتاستىق باعدارلاماسى اياسىندا $24,5 ملرد-قا 56 زاماناۋي كاسىپورىن سالۋ جوسپارلانۋدا. بۇل نىسانداردىڭ باسىم بولىگى 2023 جىلعا قاراي اياقتالادى دەپ كۇتىلۋدە، - دەدى قايرات تورەباەۆ.

ودان بولەك تاراپتار «قورعاس» شىحو قىزمەتىن ۇيلەستىرۋ تەتىگىنىڭ 2020 جىلعى 4 قىركۇيەكتەگى 1-ءشى وتىرىسىنىڭ ۋاعدالاستىقتارىن ىسكە اسىرۋ بارىسى تۋرالى ماسەلەلەردى قارادى. اتالعان كەلىسىم قر ساۋدا جانە ينتەگراتسيا مينيسترلىگى، الماتى وبلىسىنىڭ اكىمدىگى جانە «قورعاس» شىحو اق  نەگىزىندە جۇزەگە اسىرىلادى.

بۇگىندە «قورعاس» شىحو قازاقستان اۋماعىندا جالپى سوماسى 110,37 ملرد تەڭگەگە 29 ينۆەستيتسيالىق جوبانى ىسكە اسىرۋ جوسپارلانعان. وسى ماقساتتا قازىر 24 كومپانيا جۇمىس ىستەپ جاتىر. قازىر ولاردىڭ تەكى 1 جوباسى عانا ىسكە اسقان.12 جوبا بويىنشا قۇرىلىس جۇمىستارى جۇرگىزىلىپ جاتىر ەكەن. ال، قالعان جوبالار جوبالاۋ ساتىسىندا.

ايتا كەتەيىك، بۇعان دەيىن قازاقستان قىتايمەن جالپى سوماسى 28 ملرد دوللاردى قۇرايتىن بىرلەسكەن 51 نىسان سالۋ كوزدەلگەن. ونىڭ 4-ەۋى ىسكە قوسىلدى. سونىمەن قاتار، ەكس-پرەزيدەنت نازارباەۆ پەن سي تسزينپين اراسىندا «نۇرلى جول» جانە «ءبىر بەلدەۋ – ءبىر جول» باعدارلامالارى جاسالعان.

اشىق دەرەككوزدەرىندەگى مالىمەتكە سايكەس، 2019 جىلى قازاقستاننىڭ قىتايعا قارىزى 11 ميلليارد دوللار بولعان.

Abai.kz