بۇگىنگى كۇنىڭ باستى تاقىرىبى – شىعىس قازاقستاننىڭ سەمەي قالاسىنداعى «اباي-ارەنا» سپورت كەشەنىنە ەلدىڭ ەكس-پرەزيدەنتى نۇرسۇلتان نازارباەۆتىڭ ەسىمىن بەرۋ ماسەلەسى بولدى.

باق پەن الەۋمەتتىك جەلى سەمەيدەگى ءبىر كوشە مەن سپورت كەشەنى نۇرسۇلتان نازارباەۆ اتىنا بەرىلەدى دەگەندى جارىسا جازىپ جاتىر. نوبايى: «نۇرسۇلتان نازارباەۆ كوشەسىندەگى «ەلباسى-ارەنا» ستاديونى» بولۋى مۇمكىن ەدى.

كىم ۇسىندى؟

جەرگىلىكتى ءماسليحات اقپاراتىنشا، بۇل ۇسىنىستى 30 شاقتى ادامنان قۇرالعان باستاماشىل توپ ۇسىنعان. جاڭاعى ۇسىنىس ءبىلدىرىپ، باستاما كوتەرگەن وتىزدىق اقساقالدار، تانىمال سپورتشىلار، قوعام قايراتكەرلەرى، زيالى قاۋىم وكىلدەرى، جەرگىلىكتى دەپۋتاتتىق كورپۋس، ۇكىمەتتىك ەمەس ۇيىم وكىلدەرى، قوعام بەلسەندىلەرىلەرىنەن قۇرالىپتى.

ەلگە ەسىمى بەلگىلى پالۋان، قازىرگى ءماسليحات دەپۋتاتى ايبەك نۇعىماروۆ: «قاراعايلى شاعىن اۋدانىنداعى قازىر اتاۋسىز تۇرعان كوشەگە «نازارباەۆ داڭعىلى» دەگەن اتاۋ بەرىلگەنىن قالايمىز. سونداي-اق، سول اۋدانداعى سپورت كەشەنىنە دە تۇڭعىش پرەزيدەنتتىڭ ەسىمى بەرىلىپ، «ەلباسى-ارەنا» دەپ اتاۋ تۋرالى باستاما كوتەرىلدى.

بارلىعى بولدى. مادەنيەت، سپورت وكىلدەرى مەن قالالىق بەلسەندىلەر... قازىر شەشىم قالالىق ماسليحاتتا قارالىپ جاتىر. ودان ءارى استاناعا جىبەرىلەدى. سول جاق شەشەدى»، - دەپ سۇحبات بەرىپتى.

ءسويتىپ جەرگىلىكتى دەپۋتاتتار بۇل ۇسىنىستى قالالىق ءماسليحاتتىڭ جاقىندا وتەتىن سەسسياسىندا قاراۋعا ماقۇلداسىپتى.

سونداي-اق، «مەملەكەتتى نىعايتۋداعى ەلباسى نۇسۇلتان ءابىشۇلى نازارباەۆتىڭ ەڭبەگىن ۇلىقتاۋ جانە قر تاۋەلسىزدىگىنىڭ 30 جىلدىعىنا وراي وسىنداي باستاما كوتەرىلدى. بۇل ماسەلەنى ونلاين جانە جۇزبە-ءجۇز فورماتتا تالقىلاۋعا 10 مىڭ ادام قاتىسقان»، - دەگەن جەرگىلىكتى ءماسليحات مالىمدەمەسىن باق تاراتىپ جاتىر.

ءبىر ايتا كەتەرلىگى، ءدال وسى نۇرسۇلتان نازارباەۆقا ەسىمى بەرىلگەلى جاتقان سپورت كەشەنى وسىعان دەيىن «اباي-ارەنا» دەپ اتالىپ كەلگەن.

«باستاماشىل توپ قاراعايلى شاعىن اۋدانىنداعى كوشەگە جانە «اباي ارەنا» ستاديونىنا (قازاق اقىنى اباي قۇنانباەۆتىڭ قۇرمەتىنە قويىلعان) ەلدىڭ بۇرىنعى پرەزيدەنتى نۇرسۇلتان نازارباەۆتىڭ ەسىمىن بەرۋدى سۇراعان»، - دەپ جازادى «ازاتتىق راديوسى».

«ەكسپرەسس-ك» اقپاراتىنشا، 5 مىڭ ادام سياتىن كوپفۋنكتسيونالدى مادەني-سپورتتىق كەشەن قر تاۋەلسىزدىگى كۇنىنىڭ قارساڭىندا، 2019 جىلى سەمەيدە اشىلعان. سپورت نىسانى قاراعايلى دەيتىن جاڭا ىقشام اۋداندا تۇرعىزىلعان. بۇل كەشەندى جوسپارلاۋ جانە قۇرىلىس كەزەڭىندە «اباي-ارەنا» دەپ اتالعان»، - دەپ جازادى «Azattyq-ruhy.kz».

«سەمەيدە شقو بيۋدجەتى قارجىسىنا «اباي-ارەنا» مادەني-سپورتتىق كەشەنى سالىنۋدا. ونىڭ جالپى اۋماعى 33,8 مىڭ شارشى مەتردى قۇرايدى. كەشەننىڭ قۇرىلىسى بيىل اياقتالىپ، قولدانىسقا بەرىلەدى»، - دەگەن «Kapital.kz» 2019 جىلى.

«قاسىم-جومارت توقاەۆ «اباي ارەنا» مادەني-سپورت كەشەنىنىڭ قۇرىلىسىمەن تانىستى»، - دەپ جازادى «اقوردا» سايتى 2019 جىلدىڭ 26 ءساۋىرى كۇنى.

ەلباسىنىڭ ءوزى نە دەيدى؟

«اباي-ارەنا» سپورت كەشەنىنە نازارباەۆ ەسىمىن بەرۋ تۋرالى ۇسىنىس باق پەن جەلىدە قىزۋ تالقى بولۋدا. كوپشىلىك جۇرت بۇل ۇسىنىسقا ءوز نارازىلىقتارىن ايتىپ جاتىر.

ال بۇگىن نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي تwitter-دە: «الەۋمەتتىك جەلىلەر مەن باق-تا شقو بەلسەندىلەرىنىڭ «اباي ارەنا» ستاديونىنىڭ اتاۋىن وزگەرتۋ تۋرالى ۇسىنىسى تالقىلانۋدا. ەلباسى ءاردايىم وزىنە قاتىستى مۇنداي «قۇرمەت-قوشەمەتكە» قارسى. ن.نازارباەۆتىڭ پىكىرىنشە، ستاديون قازاقتىڭ ۇلى اقىنى ءارى فيلوسوفىنىڭ اتىندا قالۋعا ءتيىس»، - دەپ جازدى.

باق: «دەي تۇرعانمەن، نۇرسۇلتان نازارباەۆتىڭ ءوزى قىزمەتتىك كارەراسىنىڭ العاشقى جىلدارى جەكە تۇلعانى ەرەكشە ۇلىقتاۋ دەيتىن الاشاپقىن، بەلسەندىلىكتى سىنايتىن»، - دەپ جازادى.

مىسالى، 2017 جىلى پرەزيدەنتتىڭ باق وكىلدەرىمەن كەزدەسۋى بارىسىندا جۋرناليست گۇلنار باجكەنوۆا: «سوڭعى ۋاقىتتا ءسىزدىڭ قۇرمەتىڭىزگە ولەڭدەر جازىلىپ، كينو ءتۇسىرىلىپ، ەسكەرتكىشتەر قويىلىپ جاتىر، دەپۋتاتتار دا ءتۇرلى ۇسىنىستار جولداپ جاتىر. كونستيتۋتسيانىڭ 91-بابىن وزگەرتۋ ارقىلى تۇڭعىش پرەزيدەنتتىڭ مارتەبەسىن بەكىتىپ تە قويدى. مەنىڭ ساۋالىم قاراپايىم عانا: ءسىز بۇعان قالاي قارايسىز؟ سىزگە بۇل كەرەك پە؟ الدە مۇنىڭ ءبارى سولاردى جاساپ جاتقان ادامدارعا قاجەت پە؟»، - دەپ سۇراعان.

«ءبىر سوزبەن عانا ايتا الامىن: ماعان مۇنداي نارسەلەر كەرەك ەمەس. مەن بۇل تۋرالى ۇنەمى اشىق ايتىپ ءجۇرمىن»، - دەگەن نازارباەۆ مارك اۆرەليدىڭ «ەسكەرتكىش سوعۋ ارقىلى، كەلەر ۇرپاق سەنى ەسىنە الادى دەپ ويلاما»، دەگەن ءسوزىن مىسال ەتكەن.

«كەزىندە لەنيننىڭ، ءستاليننىڭ ەسكەرتكىشىن شۋىلداپ قولداعاندار قازىر نە بولدى؟.. سول قولداعان ادامدار الگى تۇلعالاردى وزدەرى قۇلاتىپ تاستادى. كەيىن پرەزيدەنتتىكتەن كەتكەن كەزدە، مەن كەلەر ۇرپاقتىڭ شەشىمىنە اسەر ەتە المايتىن بولامىن»، - دەگەن.

ايتا كەتەيىك، قازىردىڭ وزىندە الماتى، اقتاۋ، قاراعاندى، ورال، وسكەمەن، شىمكەنت، قوستاناي، كوكشەتاۋ، پاۆلودار قالالارىندا نۇرسۇلتان نازارباەۆ اتىنداعى كوشەلەر بار. ال پرەزيدەنت توقاەۆ ەل تىزگىنىن ۇستاعان ساتتە-اق، انت قابىلداپ بولىسىمەن، مەملەكەت استاناسىنا نۇرسۇلتان نازارباەۆتىڭ ەسىمىن بەرۋ كەرەك دەگەن ۇسىنىس ايتقان ەدى. كەيىن استانا قالاسى ەدەل-جەدەل نۇر-سۇلتان قالاسى بولىپ وزگەرگەن. استانا اتاۋىن وزگەرتۋگە قاتىستى ەل-جۇرتتىڭ پىكىرى سۇرالماعان.

سونداي-اق، ەلىمىزدە بىرنەشە نىسان ءبىرىنشى پرەزيدەنتتىڭ ەسىمىمەن اتالادى. حالىقارالىق اۋەجاي، ساياباقتار مەن مەكتەپتەر ت.ب. نۇرسۇلتان نازارباەۆ كوشەلەرى مەن ەسكەرتكىشتەرى ەلىمىزدەن تىس، شەت مەملەكەتتەردە دە بار.

Abai.kz