«دجورنالە» باسىلىمى «كاددافيدىڭ التىنى قايدا كەتتى» اتتى جۋرناليستيكالىق زەرتتەۋىن جاريالادى. ليۆيا ۇزاق جىلدار بويى يتاليانىڭ وتارى بولعاندىقتان، ريمدە ليۆياعا قاتىستى قۇپيا قۇجاتتار جەتەرلىك. ليۆيا كوسەمى بولعان مۋاممار كاددافي بايلىعىنىڭ ءبىراز بولىگىن يتاليادا ساقتاعان.

«ونىڭ بايلىعىنىڭ كوپ بولعانى سونشالىق، ول عالامات جوسپارلاردى ىسكە اسىرعىسى كەلدى. ول ءتىپتى افريكالىق ۆاليۋتا شىعارىپ، فرانتسۋزدىق وتارلىق فرانكتى اۋىستىرعىسى كەلدى» دەپ جازادى «دجورنالە» گازەتى. وسى جوسپار ونىڭ تۇبىنە جەتتى دەپ سۋرەتتەيدى اتالمىش زەرتتەۋ. 2011 جىلى ليۆياداعى تولقۋلار ءىرى اسكەري قاقتىعىسقا ۇلاسىپ، قازان ايىندا كاددافي ءولتىرىلدى.

حالىقارالىق ۆاليۋتا قورىنىڭ 2011 جىلعى مالىمەتى بويىنشا ليۆيا ورتالىق بانكىندە 144 توننا التىن بولعان. التى ميلليون حالقى بار ليۆيا ءۇشىن بۇل وتە كوپ.

كاددافيدىڭ بايلىعى باسىلىمنىڭ مالىمەتىنشە 200 ملرد دوللاردى قۇراعان. 2011 جىلعى كورسەتكىشپەن ساناساق بۇل سول ۋاقىتتاعى ۋوررەن باففەت، بيلل گەيتستىڭ قارجىسىن قوسا ەسەپتەگەننەن كوپ. كاددافيدىڭ ۇلدارىندا «يۋۆەنتۋس» كلۋبىنىڭ، «فاينەنشل تايمس» گازەتىنىڭ، «فيات» كولىگىنىڭ اكتسيالارى بولعان.

كاددافيدىڭ اجالىنان كەيىن ليۆيادا ازامات سوعىسى باستالىپ، دجاماحيريا كوسەمىنىڭ قازىناسى جوعالىپ كەتتى. 2013 جىلدىڭ 1 اقپانىندا «Daily Mail» گازەتىنىڭ جازۋىنشا حالىقارالىق قىلمىسقا قارسى پوليتسيا كاددافيدىڭ 97 ملرد دوللار قارجىسىن تاۋىپ، بۇعاتتاپ تاستاعان. الايدا ليۆيانىڭ التىن قورى تابىلمادى. ليۆيا ورتالىق بانكىنىڭ بۇرىنعى باسشىسى كاسەم ءازيزدىڭ اقپاراتىنشا كاددافي بۋنكەرىندەگى التىن قۇيمالار مەن گاۋحار تاستار 2011 جىلدىڭ مامىر ايىندا جوعالعان. ال بۇۇ-نىڭ 2017 جىلعى مالىمەتىنە ساي كاددافي ءوز قازاسىنا دەيىن التىن مەن گاۋحار تاستارىنىڭ ءبىراز بولىگىن ساتىپ، بۋركينا-فاسو، كەنيا سىندى ەلدەرگە قارجىلاي تۇردە بۇركەنشەك اتپەن جاسىرعان. RTBF كانالىنىڭ مالىمەتىنشە 5 ميلليارد ەۋرونى كوتەرىلىسشىلەر قولدى ەتكەن.

ليۆياداعى ازامات سوعىسىنا 10 جىل ۋاقىت بولدى. ەل ەكىگە جارىلىپ، قانتوگىس توقتار ەمەس. رەسەي بيلىگىنە ارقا سۇيەيتىن گەنەرال  حافتار اسكەرى مەن تۇركيا قولداۋىنا سەنەتىن بۇۇ مويىنداعان رەسمي بيلىك ءوزارا قىرقىسىپ جاتىر. مۇناي قورىنان بولەك، ليۆيادا ولار تاعى نەنى بولىسە الماۋى مۇمكىن؟ نەنى ىزدەپ ءجۇر؟ مۇمكىن ءىز-ءتۇسسىز جوعالعان كاددافيدىڭ قازىناسىن شىعار...

Abai.kz