قازاق ادەبيەتىنىڭ كلاسسيكالىق ءداۋىرىن جاساسقان جازۋشى قابدەش ءجۇمادىلوۆ ومىردەن ءوتتى.

قابدەش ءجۇمادىلوۆ 1936 جىلى 24 ساۋىردە شىڭجاڭ ولكەسىنىڭ تارباعاتاي ايماعى، مالدىباي اۋىلىندا دۇنيەگە كەلگەن. اۋىلدا باستاۋىش ءبىلىم الىپ، كەيىن شاۋەشەك گيمنازياسىن بىتىرەدى. 1956 جىلى قىتاي ۇكىمەتىنىڭ جولداماسىمەن الماتىعا كەلىپ، قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا تۇسەدى. الايدا ۋنيۆەرسيتەتتىڭ ەكىنشى كۋرسىنان كەيىن ەكى ەل اراسىنداعى ساياسي جاعدايعا بايلانىستى كەرى شاقىرىلىپ، 1958-1962 جىلدار ارالىعىندا قىتايدا قۋعىن-سۇرگىنگە ۇشىرادى. 1962 جىلى يمپەريا شەكاراسىن بۇزىپ وتكەن قازاق كوشىمەن بىرگە اتامەكەنگە قايتىپ ورالىپ، قازمۋ-دەگى اياقتالماي قالعان وقۋىن قايتا جالعاپ، 1965 جىلى ءبىتىرىپ شىعادى. «قازاق ادەبيەتى» گازەتىندە (1965-1967), «جازۋشى» باسپاسىندا (1967-1976), مەملەكەتتىك باسپالار كوميتەتىندە (1976-1981) جاۋاپتى قىزمەتتەر اتقاردى. 1981 جىلدان بىرىڭعاي شىعارماشىلىق جۇمىستا بولعان.

جازۋشىنىڭ ادەبي قىزمەتى شاۋەشەك گيمنازياسىندا وقىپ جۇرگەندە باستالعان. 1954 جىلى «شىڭجاڭ گازەتىندە» العاشقى ولەڭدەرى جارىق كورگەن. «جامال» اتتى تىرناقالدى اڭگىمەسى 1956 جىلى «شۇعىلا» جۋرنالىندا باسىلعان.

جاستىق شاقتا جازىلعان ولەڭدەرى 1967 جىلى «جاس داۋرەن» دەگەن اتپەن جەكە جيناق بولىپ شىققان. وسىدان كەيىن جازۋشى بىرىڭعاي پروزا جازۋعا ويىسقان. «قازدار قايتىپ بارادى» اتتى العاشقى اڭگىمەلەر جيناعى 1968 جىلى، «كوكەيكەستى» رومانى 1969 جىلى جارىق كوردى. روماندارىنىڭ دەنى تاريحي تاقىرىپقا ارنالعان. ونىڭ ەكى كىتاپتان تۇراتىن «سوڭعى كوش» (1974-1981), «اتامەكەن» (1985), «تاعدىر» (1988) روماندارى شىڭجاڭ قازاقتارىنىڭ ومىرىنەن جازىلعان. «سوڭعى كوش» ديلوگياسىنا 1983 جىلى م.اۋەزوۆ اتىنداعى ادەبي سىيلىق، «تاعدىر» رومانىنا 1990 جىلى اباي اتىنداعى مەملەكەتتىك سىيلىق بەرىلگەن.

قازاقستاننىڭ حالىق جازۋشىسى قابدەش ءجۇمادىلوۆتىڭ قايتىس بولۋىنا بايلانىستى مارقۇمنىڭ وتباسىنا، تۋعان-تۋىستارىنا قايعىرىپ كوڭىل ايتامىز.

Abai.kz اقپاراتتىق پورتالىنىڭ ۇجىمى