جەر شەتەلدىكتەرگە ساتىلمايدى، جالعا دا بەرىلمەيدى!

بۇگىن، 2021 جىلى 7 ساۋىردە قر پارلامەنتى ءماجىلىسنىڭ جالپى وتىرىسىندا جەر قاتىنىستارى بويىنشا زاڭ جوباسى ءبىرىنشى وقىلىمدا ءبىراۋىزدان قابىلداندى.

«اق جول» پارتياسى قر پرەزيدەنتى ق.توقاەۆتىڭ جەر ماسەلەسىنە قاتىستى ەل كۇتكەن باستى ۇستانىمىن تولىق قولداپ داۋىس بەردى. زاڭ جوباسىن تالقىلاۋ بارىسىندا فراكتسيا ۇستانىمىن دەپۋتات بەرىك دۇيسەنبينوۆ ءبىلدىردى.

«قازاق ءۇشىن جەر داۋى – ەجەلدەن ەڭ ماڭىزدى ماسەلە ەكەنى بەلگىلى. تاۋەلسىزدىكتەن بەرگى حالىقتىڭ ەڭ قاتتى تولقۋى دا وسى جەر ماسەلەسى توڭىرەگىندە بولىپ، داۋ موراتوري جاريالاۋمەن باسىلعان بولاتىن.

مەملەكەت باسشىسى ق.ك.توقاەۆ ءوزى باستاماشى بولىپ، پارلامەنت ماجىلىسىنە ەنگىزگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋالار ەنگىزۋ تۋرالى» زاڭ جوباسىن قابىلداۋ عاسىردان اسا ۋاقىت ىشىندە داۋعا اينالىپ كەلگەن تۇيتكىلدى ماسەلەنىڭ شەشىمى بولىپ تابىلادى.

تاريحىمىزدان بەلگىلى، حح عاسىردىڭ باسىندا الاش ارىستارى باستاپ، 12 مىڭنان استام قازاق ازاماتى قول قويعان «قارقارالى پەتيتسياسىندا» كوتەرگەن 10 ماسەلەنىڭ ەڭ ماڭىزدىسى – جەر ماسەلەسى ەدى»، - دەدى دۇيسەمبينوۆ.

ءيا، «ەلدىكتىڭ كەپىلى – جەر. ول – تاۋەلسىز مەملەكەتتىڭ جانە سول ۇلتتىڭ باسقۇجاتى. ارى. نامىسى. بارى. بايلىعى. بولىنبەيتىن ەنشىسى»، دەگەن ۇران كوتەرگەن الاش كوسەمى ءاليحان بوكەيحان وسى ەل ءۇشىن ەڭ باستى ماسەلەنىڭ باسى-قاسىندا بولعان ەدى.

2016 جىلى جەر داۋى كوتەرىلگەن كەزدە «اق جول» پارتياسى دا ءوزىنىڭ ناقتى رەسمي ۇستانىمىن ءبىلدىرىپ، جەردى شەتەلدىكتەرگە ساتپاۋ عانا ەمەس، ونى شەتەل ازاماتتارى مەن كومپانيالارىنا جالعا دا بەرمەۋ تۋرالى ۇسىنىس جاساعان بولاتىن. بۇل ۇستانىمدى پارتيامىزدىڭ ساياسي باعدارلاماسىنا دا ەنگىزدىك.

وكىنىشكە وراي، ءبىزدىڭ بۇل رەسمي ۇسىنىسىمىز بەلگىسىز سەبەپتەرمەن ۇكىمەت كوميسسياسىنىڭ قورىتىندى حاتتاماسىنا ەنبەي قالدى. ءتىپتى، كوبى ءبىزدىڭ پىكىرىمىزدى تۇسىنبەي، وسى سايلاۋ الدىندا وتكەن تەلەدەباتتاردا باسقا پارتيانىڭ وكىلدەرى سۇراق قويعان كەزدە پارتيا توراعاسى ازات پەرۋاشەۆ ناقتىلاپ تۇسىندىرۋگە ءماجبۇر بولدى.

ال بيىلعى جىلدىڭ 20 قاڭتارىندا «اق جول» پارتياسى ۇكىمەتكە جەر كودەكسىنە ءتيىستى وزگەرىستەر مەن تولىقتىرۋلاردى ەنگىزىپ، ەلدى الاڭداتقان جەر داۋىنىڭ شەشىلۋىنە نۇكتە قويىلۋ كەرەكتىگى تۋرالى دەپۋتاتتىق ساۋال جولداعان بولاتىن.

سونىمەن جەر تۋرالى زاڭ جوباسىندا حالىقتى تولعاندىرىپ وتىرعان باستى سۇراققا ناقتى جاۋاپ بەرىلدى!

اۋىل شارۋاشىلىعى جەرلەرىن شەتەلدىكتەرگە، ازاماتتىعى جوق ادامدارعا، سونداي-اق, شەتەلدىك قاتىسۋى بار زاڭدى تۇلعالارعا جەكە مەنشىككە جانە جالعا بەرۋگە دە تىيىم سالىنادى.

«اق جول» پارتياسى جەر ماسەلەسىندە ەلدىڭ ءسوزىن جەرگە تاستاماعان مەملەكەت باسشىسى ق.ك.توقاەۆتىڭ باستى ۇستانىمىن تولىق قولداپ، داۋىس بەردى.

«بۇگىن قازاقستان قوعامىنداعى حالىق كۇتكەن ماڭىزى زور، ەرەكشە قۇجات قابىلداندى! ەندى جەر شەتەلدىكتەرگە ساتىلمايدى، جالعا دا بەرىلمەيدى!»، - دەپ تالقىلاۋدى قورىتتى ءماجىلىس توراعاسى نۇرلان نىعماتۋللين.

موراتوري قابىلدانعانعا دەيىن بىرىككەن كاسىپورىندارعا جالعا بەرىلىپ كەتكەن 74,4 مىڭ گەكتار، شەتەلدىك ازاماتتارعا جالعا بەرىلگەن 18,5 مىڭ گەكتار اۋىل شارۋاشىلىعى جەرلەرىنىڭ مەرزىمى 2022-2025 جىلدارى اياقتالادى دا، جەر مەملەكەتكە قايتارىلادى. بايانداما جاساعان اۋىل شارۋپشىلىعى ءمينيسترى ساپارحان وماروۆ وسىلاي دەدى.

ەندى وسى بۇگىن قابىلدانعان جەردىڭ شەتەلدىكتەرگە ساتىلماۋى مەن جالعا دا بەرىلمەۋى تۋرالى زاڭ جوباسىنىڭ نەگىزگى باپتارىن جەر تۋرالى كوميسسيا باسشىلىققا الىپ، بارلىق جەر تۋرالى ماسەلەلەردى تۇگەل شەشۋى ءتيىس.

ءيا، بۇگىن، ساۋلەلى ءساۋىر ايىنىڭ قاسيەتتى 7-ءسى كۇنى قابىلدانعان زاڭ جوباسى بۇكىل ەلدىڭ كۇتىپ وتىرعان ەڭ باستى قۇجاتتارىنىڭ ءبىرى ەدى. ويتكەنى، جەر بولماسا، ەل دە بولمايدى! سوندىقتان، زاڭ جوباسىن قۋانا قولداپ، ەرەكشە تولقىنىسپەن داۋىس بەردىك.

داۋىس بەرە وتىرىپ، ءوزىمنىڭ وسى بۇكىل ەل كۇتكەن تاۋەلسىزدىكتىڭ بەرىك تىرەگى بولار تاريحي شەشىمدى قابىلداۋعا قاتىسىپ وتىرعانىما اللاعا سانسىز شۇكىرلىك ەتتىم.

ال وسى حالىقتىڭ نارازىلىعىنا ۇشىراپ، ەلدى الاڭعا شىعارعان جەر ساتۋ تۋرالى داۋلى باپتار قابىلدانعان پارلامەنت قۇرامىندا بولماعانىما قۋاندىم.

جەر ماسەلەسىندە شەگىنەرگە جەر جوق! ويتكەنى، جەر - تاۋەلسىزدىك كەپىلى!

قازىبەك يسا،

قر پارلامەنتى ءماجىلىسى دەپۋتاتى

Abai.kz