چەحيا مەن رەسەيدىڭ اراسى قاتتى ۋشىعىپ كەتتى. وعان اسەر ەتكەن چەحيانىڭ رەسەيلىك 18 ديپلوماتتى ەلدەن شىعارۋى بولىپ وتىر. ولاردى پراگا رەسەي مۇددەسىنە تىڭشىلىق جاسادى دەپ ايىپتاۋدا. الايدا جاعدايدىڭ ءتىپتى كۇردەلى، ءتىپتى قاۋىپتى ەكەنى 2014 جىلعى جارالىستارمەن بايلانىستى ەكەنىنەن-اق اڭعارۋعا بولادى. 

2014 جىلى 16 قازاندا جانە 3 جەلتوقساندا چەحيانىڭ ۆربەتيتسە قالاسىندا وق-ءدارى ساقتالعان قويمادا ەكى جارىلىس بولدى. ءبىر قويمادا 100 توننا، ەكىنشىسىندە 7000 توننا وق-ءدارى بولعان. جارىلىستىڭ جويقىندىعى سونشالىق، اۋداندى سىلكىندىرىپ جىبەرگەن، 2 ادام قازا تاپقان. باستاپقىدا جارىلىس قويماداعى قاۋىپسىزدىك شارالارى ساقتالماعاندىقتان ورىن الدى دەگەن بولجام ايتىلدى. الايدا تەكسەرۋشىلەر تاراپىنان «قالايشا ەكى قويمادا اراعا ەكى اي سالىپ جارىلىس بولدى جانە وندا ساقتالعان زىمىراندار الىس قاشىقتىققا جەتەتىن زىمىراندار ەدى»، - دەگەن كۇدىك تۋىندايدى. كوپ ۇزاماي جارىلىسقا رەسەيلىك بارلاۋ قىزمەتىنىڭ ازاماتتارىنىڭ قاتىسى بارى انىقتالدى.

چەحيا قاۋىپسىزدىك ورگاندارى جارىلىسقا رەسەيدىڭ بارلاۋ باسقارماسىنىڭ بارلاۋشىلارى اناتولي چەپيگا مەن الەكساندر ميشكيننىڭ قاتىسى بار دەپ وتىر. ولار قويماعا كىرۋ ءۇشىن رۇقساتنامادا اتتارىن رۋسلان بوشيروۆ پەن الەكساندر پەتروۆ دەپ جازدىرعان. ال چەحياعا نيكولاي پوپ جانە رۋسلان تاباروۆ دەگەن پاسپورتپەن كىرگەن. وسىلايشا ولار وزدەرىنىڭ شىنايى ەسىمدەرىن جاسىرعان. بۇل تۋرالى 17 ساۋىردەگى پرەسس-كونفەرەنتسيا بارىسىندا چەحيانىڭ پرەمەر-ءمينيسترى اندرەي بابيش حابارلادى.

بۇل ايىپتاۋدى رەسەي تاراپى «نەگىزسىز جانە وتىرىك»، - دەپ اتاپ، رەسەيدەگى چەحيا ەلشىلىگىنەن 20 ديپلوماتتى ەلدەن شىعاراتىنىن مالىمدەدى. ولار 24 ساعاتتىڭ ىشىندە ەلدەن كەتۋى ءتيىس. رەسەيدەگى چەحيا ەلشىلىگىندە 5 ديپلومات قانا قالاتىن بولدى.

الدىن-الا بولجامدارعا ساي، رەسەي بارلاۋشىلارى چەحيانىڭ وق-ءدارى قويماسىنان ۋكرايناعا قارۋ-جاراق تاسىمالى بولۋى مۇمكىن دەگەن اقپاراتتى يەمدەنىپ، جارىلىس ۇيىمداستىرعان. بۇل ءىس بويىنشا پراگا ەو ەلدەرىمەن تالقىلاۋ وتكىزبەك. ساراپشىلار چەحيانىڭ رەسەيگە سانكتسيا سالۋى مەن ديپلوماتيالىق قاتىناستى ءۇزۋ مۇمكىندىگىن جوققا شىعارمايدى.

Abai.kz