وزبەكستاننىڭ «ميللي تيكلانيش» دەموكراتيالىق پارتياسىنىڭ توراعاسى الىشەر قادىروۆتىڭ مالىمدەۋىنشە، ونىڭ پارتياسى تاشكەنتتەگى «يستيكلول» ونەر سارايى الدىنداعى كونتسەرتتەگى «ارانداتۋشىلىقتى» قاتاڭ تۇردە سىنايدى.

قادىروۆ Telegram-ارناسىندا جاريالاعان مالىمدەمەسىندە «ميللي تيكلانيش» پارتياسى ونەرگە قارسى شىقپايتىنىن، بىراق ونەردى ساياساتتا قارۋ رەتىندە پايدالانۋدى قولدامايتىنىن ايتتى.

«ءبىز ونەرگە قارسى ەمەسپىز، ءبىز ونەردىڭ ساياسي قارۋعا اينالۋىن قالامايمىز. استانانىڭ قاق ورتاسىندا ءبىزدىڭ اتا-بابالارىمىزدى، وزبەك زيالىلارىن قىرعان، باسقىنشى سوۆەت مەملەكەتىنىڭ تۋىن كوتەرۋىن وزبەك حالقىن قورلاۋ دەپ ەسەپتەيمىز»، – دەدى الىشەر قادىروۆ.

پارتيا توراعاسى باس پروكۋراتۋرانىڭ «ارانداتۋ ارەكەتىنە بەرگەن باعاسىن» كۇتىپ وتىرعانىن مالىمدەدى.

كسرو-نىڭ قىزىل تۋى 1 مامىردا «حور تۋرەتسكوگو» جانە سوپرانو (رەسەي) ۇجىمدارىنىڭ كونتسەرتى كەزىندە جەلبىرەگەن. بۇل كونتسەرت «يستيكلول» ونەر سارايى الدىنداعى الاڭدا «جەڭىس اندەرى» جوباسى اياسىندا ۇيىمداستىرىلعان.

قىزىل تۋدى كوتەرۋ ساتىندە تۇسىرىلگەن سۋرەت كونتسەرتتى ۇيىمداستىرۋشىلاردىڭ ءبىرى – «روسسوترۋدنيچەستۆونىڭ» وزبەكستانداعى مەكەمەسىنىڭ پاراقشاسىندا جاريالاندى. رەسەيدىڭ وزبەكستانداعى ەلشىسى قىزمەتىنە جاقىندا عانا تاعايىندالعان ولەگ مالگينوۆ «جەڭىس اندەرى» كونتسەرتىندە ءسوز سويلەگەن.

Abai.kz