كۇنى كەشە عانا اقش-تىڭ IHME ينستيتۋتى الەمدەگى ەلدەردىڭ كوروناۆيرۋستان زارداپ شەگۋى، ادام شىعىنىنا قاتىستى ءوز زەرتتەۋىن جاريالادى. زەرتتەۋ بارىسىندا ولار قازاقستانداعى ۆيرۋس سالدارىنان كوز جۇمعاندار سانى 14 ەسە ازايتىپ كورسەتىلگەن دە وتىر. ينستيتۋت 20 ەلدىڭ دەرەكتەرىنە زەرتتەۋ جاساعان. IHME-نىڭ زەرتتەۋى بويىنشا قازاقستاندا شىنايى نەگىزدە 81696 ادام كوز جۇمعان دەسەدى. بۇل اقپارات ەل ىشىندە داۋ تۋعىزىپ، الەۋمەتتىك جەلىدە قىزۋ تالقىلاندى. 

ەل اراسىندا ۆيرۋسقا قاتىستى ستاتيستيكاعا سەنىم از. 2020 جىلدىڭ شىلدە-تامىز ايىنداعى ادام ءولىمىنىڭ كۇرت ارتۋى مەن كوروناۆيرۋستىق پنەۆمونيانى رەسمي تىركەۋدى تەك قانا 1 تامىزدان باستاپ ىسكە اسىرۋى ۇلكەن داۋعا ۇلاستى. 2020 جىلى ولگەندەر سانى 2019 جىلمەن سالىستىرعاندا 22 پايىزعا ارتىق. بۇل 30 مىڭ ادامعا كوپ دەگەن ءسوز. رەسمي ستاتيستيكا سولاي دەيدى، ال ستاتيستيكانىڭ بەيرەسمي جاعىنىڭ بارىن ەسكەرۋدى دە ۇمىتپاعان ءجون. اقش ينستيتۋتىنىڭ زەرتتەۋىن مينيسترلىك وكىلدەرى جوققا شىعاردى. قىسقاشا مينيسترلىك جاۋابى كەلەسىدەي بولدى:

«قر دەنساۋلىق ساقتاۋ مينيسترلىگى دەنساۋلىق كورسەتكىشتەرى جانە باعالاۋ ينستيتۋتىنىڭ (ihme, اقش) «COVID-19 جالپى ءولىم-ءجىتىمىن باعالاۋ» اتتى جاريالانعان زەرتتەۋىندە اقپاراتقا قاتىستى ايقىندىق ەنگىزۋدە.

قر ستراتەگيالىق جوسپارلاۋ جانە رەفورمالار جونىندەگى اگەنتتىگىنىڭ ستاتيستيكا بيۋروسىنىڭ دەرەكتەرىنە سايكەس 2020 جىلدىڭ قورىتىندىسى بويىنشا كوروناۆيرۋستىق ينفەكتسيادان قايتىس بولعاندار سانى 4 729 ادامدى قۇرادى. 2021 جىلدىڭ 4 ايىندا كۆي-دان قايتىس بولعاندار سانى 1 846 ادامدى قۇرادى.

وسىلايشا، پاندەميا باستالعاننان بەرى قازاقستاندا كۆي-دەن 81 696 ادام ەمەس، 6 575 ادام قايتىس بولدى. دەنساۋلىق كورسەتكىشتەرى جانە باعالاۋ ينستيتۋتىنىڭ كورسەتكىشتەرىنىڭ دۇرىس ەمەستىگى ايقىندالدى. (ihme, اقش) (بۇدان ءارى-ينستيتۋت)

سونىمەن قاتار، ۇلتتىق ستاتيستيكا بيۋروسىنىڭ الدىن الا دەرەكتەرى بويىنشا 2020 جىلى قايتىس بولعانداردىڭ سانى 2019 جىلمەن سالىستىرعاندا 21,8%-عا نەمەسە 29 124 ادامعا ارتىپ، 133 489 ادامعا قاراعاندا 162 613 ادامدى قۇرادى. وسىلايشا، ارتىق ءولىم-ءجىتىم 29 124 ادامدى قۇرادى، بۇل ينستيتۋتتىڭ مالىمدەلگەن كورسەتكىشتەرىن دە جوققا شىعارادى.

انىقتاما: كۆي – 4 729 ادام نەمەسە 16,2%-دى قوسپاعاندا، ادامدار باسقا دا ولىمنەن قايتىس بولىپ جاتتى:
- قان اينالىمى جۇيەسىنىڭ اۋرۋلارى، تىنىس الۋ ورگاندارىنىڭ اۋرۋلارى، جۇيكە جۇيەسىنىڭ اۋرۋلارى، جۇقپالى جانە پارازيتتىك اۋرۋلار.

جوعارىدا باياندالعاننىڭ نەگىزىندە «COVID-19-دان جالپى ءولىمدى باعالاۋ» دەنساۋلىق كورسەتكىشتەرى جانە باعالاۋ ينستيتۋتىنىڭ (ihme, اقش) جۇرگىزگەن زەرتتەۋلەرىنە سايكەس جاريالانعان ستاتيستيكالىق دەرەكتەر قازاقستان رەسپۋبليكاسىندا تىركەلگەن ناقتى دەرەكتەرگە سايكەس كەلمەيتىنىن حابارلايمىز»، - دەيدى مينيسترلىك.

Abai.kz