يزرايل مەن پالەستينا اراسىنداعى قاقتىعىس قايتا كۇشىنە ەندى. بۇل 2014 جىلعى قاقتىعىستان كەيىنگى ەڭ اۋقىمدى شيەلەنىس بولىپ وتىر. 10 مامىر كۇنى قوس تاراپ اسكەري ارەكەتكە كوشە باستادى. پالەستينا يزرايل اۋماعىنا جۇزدەگەن قولدان جاسالعان زىمىراندارىن جاۋدىرسا، يزرايل گازا ايماعىنا ۇشاقپەن سوققى جاساۋدا. قازىردىڭ وزىندە قوس تاراپتان ونداعان ادام قازا تاۋىپ، جۇزدەگەن ادام جاراقات الدى. 

قاقتىعىس رامازان ايىنىڭ باستالۋىمەن جاڭا قارقىنعا كوشتى. سەبەبى يسلام تاريحىنداعى ماڭىزدى ءۇش مەشىتتىڭ ءبىرى سانالاتىن ءال-اقسا مەشىتى يزرايل وتارلاپ العان اۋماقتا تۇر. مۇسىلماندار ءۇشىن قاسيەتتى سانالاتىن رامازان ايىندا بۇل مەشىتكە كەلۋشىلەر سانى كۇرت ارتتى. ال يزرايل قورعانىس كۇشتەرى كەلۋشىلەردىڭ كوپتىگىنە نازار اۋدارىپ، مەشىت ماڭىنا قارۋ جاسىرۋى مۇمكىن دەگەن وي ءبىلدىردى. 7-8 مامىردا مەشىت ماڭىندا يزرايل ءتارتىپ ساقشىلارى مەن مەشىتكە سىيىنۋعا كەلگەندەر اراسىندا قاقتىعىس ورنادى. يزرايل جاساقتارى مەشىت ماڭىنا توپتاسىپ، مەشىتكە باسىپ كىردى. ولار سىيىنىپ جاتقانداردىڭ بارلىعىن كۇشپەن قۋىپ شىقتى. وپەراتسيا بارىسىندا گاز، رەزەڭكە وق قولداندى. ونداعان ادام جاراقات الدى. بۇل وقيعا ەكى ەل اراسىنداعى قاقتىعىستىڭ قايتا جاندانۋىنا سەبەپكەر بولدى.

10 مامىردان باستاپ يزرايل گازا ايماعىنىڭ بالىقشىلارىىڭ بالىق اۋلاۋىنا كەدەرگى جاساپ، تەڭىزدە بلوكادا باستادى. ال كەشكىسىن قىسىمعا شىداماعان حاماس كۇشتەرى يزرايلگە 137 زىمىران جىبەردى. بۇل ەكى قارسىلاس تاراپ اراسىندا جاڭا ۇرىستارعا باستاۋ الۋىنىڭ بەلگىسى بولاتىن. يزرايل كۇشتەرى ۇشاق جانە تىكۇشاقپەن سوققى جاساۋدا. وپەراتسياعا جيىنتىعى 80 ۇشاق قاتىسۋدا.

12-نە قاراعان ءتۇنى تاراپتار اراسىندا ناعىز ايقاس بولدى. حاماس 1055 زىمىراندى ءيزرايلدىڭ ونداعان قالاسىنا جىبەردى. "تەمىر كۇمبەز" زىمىرانعا قارسى جۇيەسى ونىڭ كوپ بولىگىن قاعىپ العانىمەن، كەيبىرى نىساناعا ءدال ءتيدى. ونداعان كولىك ورتەنىپ، عيماراتتار قيرادى. بەس ادام قازا تاپتى. يزرايل كۇشتەرى جاۋاپ رەتىندە ءتۇنى بويى گازا ايماعىنا سوققى جاساۋمەن بولدى. سوڭعى مالىمەتتەر پالەستينادا 43 ادامنىڭ قازا تاپقانىن ايتادى. 400-دەن استام ادام جاراقات العان.

يزرايل بيلىگى اسكەري وپەراتسيا اۋماعىن كەڭەيتىپ، قۇرلىق اسكەرىمەن شابۋىل جاساۋعا دايىندالىپ جاتىر. مىسىر قوس تاراپتى تاتۋلاستىرۋعا تىرىسىپ جاتىر. ازىرگە ناتيجەسىز. تۇركيا مەن يران پالەستينانى قولدايتىنىن ءبىلدىردى، الايدا قانداي دا ءبىر ارەكەتكە كوشكەن جوق. وقيعا تىم جىلدام وربۋدە.

Abai.kz