2021 جىلعى 26 مامىردا، ۋكراينانىڭ استاناسى كيەۆ قالاسىندا، ۋكرايناداعى قازاق دياسپوراسىنىڭ قۇرىلتايى ءوتتى. قۇرىلتايعا وسى ەلدە تۇراتىن قانداستار مەن قازاقستاننان دەلەگاتتار قاتىستى. قۇرىلتايعا قاتىسۋشىلار قازاقستانداعى جۇرگىزىلىپ جاتقان ساياسي، ەكونوميكالىق، مادەني رەفورمالارعا قولداۋ ءبىلدىرىپ، دۇنيە جۇزىندەگى قانداستارىمىزعا ارنايى ۇندەۋ جولدادى.

ۋكرايناداعى قازاق دياسپوراسىنىڭ
وتانداستارعا ۇندەۋى

قىمباتتى وتانداستار!

2021 جىل – ءبىزدىڭ اتامەكەنىمىز قازاقستاننىڭ تاريحى مەن تاعدىرىنداعى ەڭ ەلەۋلى، اسا ماڭىزدى جىل. بيىل قازاقستان رەسپۋبليكاسىنىڭ تاۋەلسىزدىگىنە 30 جىل تولىپ وتىر.

ادامزات تاريحى ءۇشىن، وتىز جىل از ۋاقىت كورىنگەنىمەن، ءبىزدىڭ حالقىمىز ءۇشىن وسى ءبىر تاعدىرلى ۋاقىت مەجەسى وتىز عاسىرعا تاتيدى. ءبىز سان جىلدار بويى اتا-بابالارىمىز اڭساعان، سول جولدا قانىن توگىپ، جانىن قۇربان ەتكەن بوستاندىققا قول جەتكىزدىك.

ۇلى دالا توسىندە كوك بايراعى جەلبىرەگەن، تورتكۇل دۇنيە تۇگەل مويىنداعان، بىرىككەن ۇلتتار ۇيىمىنداعى بارلىق مەملەكەتتەرمەن تەرەزەسى تەڭ، كەرەگەسى كەڭ قازاق مەملەكەتى سالتانات قۇردى. بۇل بارشا قازاقستاندىقتار ءۇشىن، اسىرەسە، تۋعان ەلدەن جىراقتا جۇرگەن بىزدەر ءۇشىن كوڭىل تولقىتار، جۇرەكجاردى ۇلى وقيعا ءارى باعا جەتپەس قۇندىلىققا اينالدى.

1992 جىلدىڭ قىركۇيەك ايىندا، ءى دۇنيەجۇزى قازاقتارىنىڭ قۇرىلتايىندا، التى قۇرلىققا تارىداي شاشىلىپ كەتكەن قانداستارىمىزدىڭ باسى قوسىلىپ، باۋىرى بۇتىندەلدى. سول العاشقى قۇرىلتايدا ەلباسى ن.ءا.نازارباەۆ «باۋىرلارعا قۇشاعىمىز ايقارا اشىق» دەگەن اتاقتى بايانداماسىن جاساپ، شەتتە جۇرگەن قانداستارىمىزدى تاريحي وتانىنا ورالۋعا شاقىرعان ەدى. بۇگىندە ميلليوننان استام قانداس باۋىرلارىمىز اتامەكەنىنە ورالىپ، تۋعان ەلى مەن جەرىنىڭ بولاشاعى ءۇشىن ايانباي ەڭبەك ەتىپ جاتىر.

ۋكرايناداعى قازاق دياسپوراسى دا ءوز اتامەكەنىنەن ەشقاشان قول ۇزگەن ەمەس. ءبىز قازىرگى كەزدە قازاقستاننىڭ ۋكرايناداعى ەلشىلىگى ارقىلى دا  تاريحي وتانىمىزبەن، الەمنىڭ باسقا ەلدەرىندەگى قازاقتىڭ قوعامدىق ۇيىمدارىمەن تىعىز قارىم-قاتىناس ورناتىپ وتىرمىز.

سوناۋ 1994 جىلدىڭ وزىندە كيەۆ قالاسىندا «دوستىق» قازاق مادەني ورتالىعىن اشۋعا قول جەتكىزدىك. سونىمەن قاتار، حاركوۆ قالاسىندا قازاقستاندىقتاردىڭ «بىرلىك» قوعامدىق ۇيىمى تۇراقتى جۇمىس ىستەپ كەلەدى. كيەۆتەگى ۇلى اقىنىمىز جامبىل جاباەۆ اتىنداعى قوعامدىق كىتاپحانا دا ۋكرايناداعى قازاقتاردىڭ رۋحاني ورتالىعىنا اينالعان. وتكەن جىلى «وتانداستار» قورىنىڭ قولداۋىمەن «اباي» مادەني-ىسكەرلىك ءۇيى اشىلدى.

ءبىز ءوز بالالارىمىزعا، نەمەرەلەرىمىزگە ۇلتىمىزدىڭ سالت-ءداستۇرىن، ءتىلى مەن ءدىلىن ۇيرەتىپ، تاريحىن، مادەنيەتى مەن ادەبيەتىن ناسيحاتتاۋدى پەرزەنتتىك بورىشىمىز دەپ سانايمىز.

ۋكرايناداعى قازاق دياسپوراسىنىڭ قۇرىلتايى وسىنداي اۋقىمدى دا ماڭىزدى ماقسات-مۇراتتاردى كوزدەيدى. ءبىز قازاقستان مەن ۋكراينا اراسىنداعى ساياسي، ەكونوميكالىق، گۋمانيتارلىق ءوزارا بايلانىستىڭ بۇدان ءارى دە قارقىندى دامىعانىن قالايمىز جانە وسى جولدا قازاق-ۋكراين حالىقتارى دوستىعىنىڭ «التىن كوپىرى» بولعىمىز كەلەدى!

قادىرلى قانداستار!

سوڭعى ەكى جىل بارشا الەم حالقى ءۇشىن اۋىر سىناق پەن بولجاۋسىز تاۋەكەلدەر ۋاقىتى بولدى. توتەننەن كەلگەن كورونوۆيرۋس دەرتى ءبىزدىڭ اياۋلى اتامەكەنىمىزدى دە اينالىپ وتكەن جوق. وسى ورايدا، ءبىز – جىراقتا جۇرگەن قانداستار قازاقستاننان جەتەتىن ءاربىر اقپاراتقا، ءاربىر جاڭالىققا قۇلاق ءتۇرىپ، ەلەڭدەپ وتىرمىز.

تۋعان وتانىمىز بۇل سىناقتان دا ابىرويمەن شىعاتىنىنا، ونىڭ بولاشاعى جارقىن دا جاسامپاز بولاتىنىنا كامىل سەنەمىز.

تاۋەلسىز قازاقستاننىڭ ءار جەتىستىگىنە، ءار جاقسىلىعىنا جۇرەگى جارىلا قۋاناتىن الدىمەن بىزدەر، وزدەرىڭىزدىڭ باۋىرلارىڭىز ەكەنىن دە رياسىز كوڭىلمەن جەتكىزگىمىز كەلەدى.

قر پرەزيدەنتى ق.ك.توقاەۆ ايتقانداي – «تاۋەلسىزدىك بارىنەن قىمبات». اتامەكەن – قازاقستانىمىزدىڭ تاۋەلسىزدىگى ماڭگىلىك بولسىن!

حالقىمىز امان-ەسەن، كوك اسپانىمىز اشىق، تىرلىگىمىز بەيبىت تە بەرەكەلى بولسىن!

ءبىز سىزدەرمەن ءاردايىم بىرگەمىز!

ۋكرايناداعى قازاق دياسپوراسىنىڭ
قۇرىلتايىنا قاتىسۋشىلار

ەسكەرتۋ: ماتەريالدى Abai.kz اقپاراتتىق پورتالى رەداكتسياسىنىڭ رۇقساتىنسىز، كوشىرىپ جاريالاۋعا تىيىم سالىنادى.

Abai.kz