قورعانىس مينيسترلىگىندەگى قارۋ-جاراق جانە ماتەريالدىق-تەحنيكالىق قامتاماسىز ەتۋ قىزمەتىنىڭ باستىعى پولكوۆنيك اسىلبەك ساتىبالدينوۆ ۇستالدى.

"2021 جىلى 28 مامىردا قۇقىق قورعاۋ ورگاندارى قازاقستان رەسپۋبليكاسى قارۋلى كۇشتەرىنىڭ قارۋ-جاراق جانە ماتەريالدىق-تەحنيكالىق قامتاماسىز ەتۋ قىزمەتىنىڭ باستىعى پولكوۆنيك اسىلبەك ءساتىبالدينوۆتى ۇستادى", – دەپ حابارلادى ۆەدومستۆودان.

كەيبىر باق دەرەگىنشە، ول "قىزمەتتىك وكىلەتتىگىن اسىرا پايدالاندى، سىياقى بەرۋ كەزىندە بيۋدجەت قاراجاتىن جىمقىردى جانە اسكەري قىزمەتشىلەردەن اقشالاي جاردەماقىلاردى زاڭسىز ءوندىرىپ الدى" دەپ كۇدىككە ىلىنگەن. "سىياقىنىڭ جالپى سوماسى 10 ميلليون تەڭگەدەن اسادى", – دەلىنگەن Orda.kz پورتالىنىڭ اقپاراتىندا.

ءساتىبالدينوۆتىڭ جۇمىس ورنى مەن ۇيىندە ءتىنتۋ جۇمىستارى جۇرگىزىلدى. سونىمەن قاتار، قارجى قىزمەتىنىڭ باستىعى پودپولكوۆنيك جاربولوۆ تا "قىلمىس جاسادى" دەپ كۇدىككە ىلىنگەنى تۋرالى اقپارات تارادى.

قازاقستاننىڭ قارۋلى كۇشتەرىندە جۇمقورلىق فاكتىلەرىنە قاتىستى كۇدىك كوپ. مەملەكەت قورعانىس سالاسىنا جىل سايىن 4 ملرد دوللارعا جۋىق قاراجات ءبولىپ كەلەدى.

Abai.kz