وسىدان بىرنەشە كۇن بۇرىن رەسەيدىڭ «ريا نوۆوستي» اگەنتتىگى «ەاەو باتىس سانكتسيالارىنا ۇجىمداسقان تۇردە جاۋاپ دايىنداپ جاتىر» اتتى ماقالا جاريالادى. وندا رەسەي سىرتقى ىستەر ءمينيسترىنىڭ ورىنباسارى الەكساندر پانكيننىڭ پەتەربورداعى ەكونوميكالىق فورۋمدا سويلەگەن ءسوزى جازىلعان.

«ءۇشىنشى ەلدەردىڭ ەاەو-عا (وداققا مۇشە ەلدەرگە) قارسى سانكتسيالىق ءىس-ارەكەتتەرىنە جاۋاپ شارالارى تۋرالى ماسەلە كۇن تارتىبىنە قويىلدى. بۇل ماسەلە قاراستىرىلىپ جاتىر جانە الداعى ۋاقىتتا دا قاراستىرىلاتىن بولادى. بىراق ءبىز بۇل تاقىرىپ وسىنداي سانكتسيالاردىڭ ناقتى تۇرلەرىمەن، ماسشتابىمەن، كولەمىمەن، كەلتىرىلگەن زيانىمەن جانە دسۇ جانە باسقا قۇرالدار تۇرعىسىنان زاڭدى بولاتىن مۇمكىن شارالارمەن بايلانىستى بولۋى كەرەك ەكەنىن ءتۇسىنۋىمىز كەرەك»، - دەپتى پانيكين.

رەسەي سىرتقى ىستەر ۆيتسە-ءمينيسترىنىڭ بۇل ايتقاندارى - شىن مانىندە قازاقستاندى باتىس پەن رەسەي اراسىنداعى سانكتسيا سوعىسىنا ءماجبۇرلى تۇردە ارالاستىرۋ ارەكەتى ەكەنى ايدان انىق. سول ءۇشىن دە ۆيتسە-مينيستر پانكيننىڭ مياۋلاپ ايتقان ماڭكىلى قازاق قوعامىندا قىزۋ تالقى بولۋدا.

اتالعان ماسەلەگە قاتىستى Abai.kz اقپاراتتىق پورتالىندا «ورتاق وداققا "ورتاق سانكتسيا" ما؟» جانە «ەاەو-داعى كوپ «ورتاق» - تاۋەلسىزدىگىمىزگە قارسى شابۋىل!» اتتى ەكى بىردەي ماقالا جاريالانعان.

وندا: «قازاقستان اتىنان مۇنداي قاۋىپتى كەلىسسوزدى كىم جۇرگىزىپ وتىر؟ قازاقستاننىڭ سىرتقى ىستەر مينيسترلىگى نەگە ءۇنسىز»، دەگەن ساۋالدار توتەسىنەن قويىلعان ەدى. الگىندە مۇحتار تىلەۋبەردى مىرزا تىزگىنىن ۇستاعان قازاقستاننىڭ سىرتقى ىستەر مينيسترلىگى رەسەي شەنەۋنىگىنىڭ ورتاق وداقتاعى ورتاق سانكتسيا تۋرالى سوزدەرىنە جاۋاپ بەرىپتى.

قر سىرتقى ىستەر مينيسترلىگىنىڭ رەسمي مالىمدەمەسى:

2014 جىلعى 29 مامىردا قول قويىلعان ەۋرازيالىق ەكونوميكالىق وداق تۋرالى شارتقا سايكەس بىرلەستىكتى قۇرۋدىڭ ماقساتى تاۋارلاردىڭ، كورسەتىلەتىن قىزمەتتەردىڭ، كاپيتالدىڭ جانە جۇمىس كۇشىنىڭ ەركىن قوزعالىسىن قامتاماسىز ەتۋ، ءوز حالىقتارىنىڭ ءال-اۋقاتىن ارتتىرۋ مۇددەسىندە مۇشە مەملەكەتتەر ەكونوميكالارىنىڭ تۇراقتى دامۋى ءۇشىن جاعدايلار جاساۋ بولىپ تابىلادى.

قازاقستان ەاەو شەڭبەرىندەگى ينتەگراتسيالىق پروتسەستەر تەك ەكونوميكالىق سيپاتقا يە دەگەن ۇستانىمدى قولدايدى. ەۋرازيالىق ينتەگراتسيا ورگاندارىنا ءتان ەمەس فۋنكتسيالاردى بەرۋدى قابىلداۋعا بولمايتىندىعىن ءداستۇرلى تۇردە اتاپ وتەمىز جانە بىرلەستىكتى ساياسيلاندىرۋعا قارسىمىز.

ەاەو تۋرالى شارتتى رەتتەۋ ماسەلەسىنىڭ شەڭبەرىنەن شىعاتىن، ونىڭ ىشىندە ءۇشىنشى ەلدەردىڭ سانكتسيالىق ارەكەتتەرىنە جاۋاپ شارالارىن قولدانۋ جونىندەگى باستامالاردى تالقىلاۋ مانماتىنىندە باتىستىڭ سانكتسيالارى ءوزىنىڭ نەگىزىندە، ەڭ الدىمەن، ساياسي سەبەپتەرى بار جانە بۇكىل ەاەو-عا ەمەس، جەكەلەگەن مەملەكەتتەرگە قارسى باعىتتالعانىن اتاپ وتەمىز.

قازاقستان رەسپۋبليكاسى ەاەو ەلدەرىنىڭ «شوعىرلاندىرىلعان شارالارى» تۋرالى باسقا مەملەكەتتەردىڭ سانكتسيالارىنا جاۋاپ رەتىندە ەشقانداي كەلىسسوزدەر جۇرگىزبەيتىنىن اتاپ وتەمىز. ەۋرازيالىق ينتەگراتسيا بويىنشا ارىپتەستەرمەن جۇرگىزىلەتىن جۇمىستا مۇنداي سانكتسيالاردىڭ ءبىزدىڭ مەملەكەتتەرىمىزدىڭ الەۋمەتتىك-ەكونوميكالىق دامۋىنا تەرىس اسەرىن بولدىرماۋ بويىنشا بىرلەسكەن ءىس-قيمىلدار تۋرالى عانا ايتۋعا بولادى.

Abai.kz