ناگرادالار تەك باسشىلارعا عانا تيەسىلى مە؟

جالپى ءبىزدىڭ شەنەۋنىكتەر قانداي دا يگى باستاماننىڭ ءوڭىن اينالدىرىپ، ابدەن سىلىكپەسىن شىعارىپ، وزگەلەرگە جەك كورىنىشتى ەتىپ كورسەتۋگە كەلگەندە الدىنا جان سالماي ما دەپ قالاسىڭ. ولار ءۇشىن ەشبىر قاسيەتتى دۇنيە قالماعان سەكىلدى كورىنەدى. ءتىپتى، كۇنى كەشە عانا وتكەن مەديتسينا قىزمەتكەرلەرى كۇنى مەرەكەسى دە قوستانايلىقتار ءۇشىن وسىنداي ءبىر كەلەڭسىز كورىنىسكە اينالدى.

راس، بۇل مەرەكە جاپ-جاقسى ءارى سالتاناتتى تۇردە باستالدى. بۇل داتاعا ارنالعان ارنايى جينالىس وتكىزىلىپ، مەملەكەتتىك ماراپاتقا يە بولعانداردى باياعى سول يگى داستۇرمەن وبلىس اكىمى ارحيمەد مۇقانبەتوۆ قۇتتىقتاپ، جىلى لەبىزىن ءبىلدىردى.

شىندىعىندا دا، مىنا ەلىمىزگە كەلگەن الاپات - كورونوۆيرۋس سەكىلدى ىندەتپەن ۋاقىتىن دا، ءومىرىن دە اياماي كۇرەسكەن اق جەلەڭدى ابزال جانداردى قالاي ارداقتاساڭ دا لايىقتى ەدى. ماسەلەن، ءبىزدىڭ وبلىستا تەك «دەنساۋلىق ساقتاۋ ءىسىنىڭ ۇزدىگى» سەكىلدى ءتوس بىلگىمەن 19 ادام ماراپاتتالدى. سولاردىڭ ىشىندە قوستاناي قالاسىنان دارىگەر-گينەكولوگ  قايىرحان ىسماعۇلوۆ،  ليساكوۆ قالاسىنان حيرۋرگ احمەتقالي نۇرماديەۆ پەن سارىكول اۋدانىنان ساۋلە الماتوۆا سەكىلدى دارىگەرلەردىڭ ەڭبەكتەرىنىڭ ءادىل باعالاعاندىعىنا ەشكىم دە داۋ ايتا الماسا كەرەك.

الايدا وسى مەرەكەدەن كەيىن كوڭىلدى كۇپتى ەتىپ، «بۇل قالاي؟» دەگەن ساۋال قايتا-قايتا الدىمىزدان شىعا بەردى. ول وسى ءبىر ازعانتاي عانا تىزىمگە ءبىزدىڭ وبلىستىق دەنساۋلىق ساقتاۋ دەپارتامەنتىنىڭ بەس بىردەي باسشى قىزمەتكەرىنىڭ كىرىپ كەتكەندىگىن قالاي جانە نەمەن تۇسىندىرۋگە بولادى؟  ماسەلەن، الگىندەي اسا بەدەلدى ءتوس بەلگىنى اتالمىش دەپارتامەنتتىڭ اكىمىشىلىك-زاڭ ءبولىمىنىڭ (بىلايشا ايتقاندا زاڭگەر), جالپى ەسەپتىك پەن بۋحگالتەرلىك ەسەپ جۇرگىزۋ ءبولىمىنىڭ (بىلايشا ايتقاندا ەسەپشى), اقپاراتتىق-ساراپتامالىق ءبولىمنىڭ (بىلايشا ايتقاندا ساراپتاماشى), ادام رەسۋرستارىن باسقارۋ مەن دامىتۋ ءبولىمىنىڭ جانە ءدارى-دارمەك ساياساتى مەن ءدارى-دارمەكپەن قامتاماسىز ەتۋدى ۇيلەستىرۋ بولىمدەرىنىڭ باسشىلارى بار.

ارينە، ۇكىمەتتىڭ مەملەكەتتىك ناگرادالاردى بەرۋ تۋرالى قاۋلىسىندا باسشى قىزمەتكەرلەر مۇنداي ماراپاتتاردى الماسىن دەگەن شەكتەۋ جوق. الايدا وندا «دەنساۋلىق ساقتاۋ ءىسىنىڭ ۇزدىگى» بەلگىسىن حالىقتىڭ دەنساۋلىعىن ساقتاۋ ىسىنە ەرەكشە ۇلەس قوسقان، وسى سالادا كوپ جىلدار قىزمەت اتقارعان، پراكتيكالىق دەنساۋلىق ساقتاۋدى دامىتۋعا كوپ جىلدار جانە وزىندىك ۇلەس قوسقان، ادامدى ەمدەۋ مەن دياگنوستيكاعا جاڭا ءبىر ەرەكشە ءادىس ەنگىزگەن، دەنساۋلىق ساقتاۋ سالاسىن رەفورمالاۋ مەن جەتىلدىرۋگە بەلسەنە تۇردە قاتىسقان ادامدار الاتىندىعى تايعا تاڭبا باسقانداي ەتىپ كورسەتىلگەن. سوندا بۇلار جايلى كرەسلودا وتىرىپ، دەنساۋلىق سالاسىن دامىتۋعا قانداي ەرەكشە ۇلەس قوستى نەمەسە ادام دەنساۋلىعىن ساقتاۋدا قانداي ءبىر ەرەكشە جاڭا ەمدەۋ مەن دياگنوستيكالىق ءادىس ويلاپ تاپتى دەگەن ساۋال تۋىندايدى.

مۇمكىن وسىنداي ءوزىم بىلەم مەن ءوزىم شەشەم دەگەن اسىرا سىلتەۋشىلىكتىڭ كەسىرىنەن قازىرگى كۇنگە دەيىن كورونوۆيرۋسپەن كۇرەستىڭ العى شەبىندە جۇرگەن، كۇندىز-ءتۇنى اۋا وتپەيتىن كوستيۋمىن شەشپەي، قينالعان جانداردىڭ جانىنان تابىلعان تالاي دارىگەر مەن مەدبيبىلەر وزدەرىنە لايىقتى وسى ماراپاتتان تىس قالماسىنا كىم كەپىل؟

بيلىك قولىندا ەكەن دەپ وبلىسىمىزعا بولىنگەن ناگرادالاردى باسشىلىق ورىنداردا وتىرعان جانداردىڭ وزدەرى الدىمەن قارپىپ قالىپ وتىرسا، كۇنى ەرتەڭ قاراپايىم حالىق قانداي پىكىردە قالادى؟ وسىنى ويلاعان جان بار ما؟ سوسىن، الگى ءتىزىمدى ەشبىر تالعام مەن تالداۋسىز بەكىتە سالعان ەلىمىزدىڭ دەنساۋلىق ساقتاۋ مينيسترلىگىنە دە وسى سۇراقتى باعىتتاعىمىز كەلەدى.

جايبەرگەن بولاتوۆ

Abai.kz