جۋىردا ساياسي بەلسەندى ەرمەك نارىمبايدىڭ ەكس-پرەمەر-مينيستر اكەجان قاجىگەلدينمەن سۇحباتى شىقتى. قازاقستانداعى ساياسي جاعدايلاردى تالقىلاعان سۇحباتتا 2019 جىلعى پرەزيدەنت سايلاۋىنا ۇمىتكەر بولعان ءامىرجان قوسان تۋرالى دا ءسوز بولادى. 

قاجىگەلديننىڭ ايتۋىنشا، «قوسانوۆتىڭ ارمانى - پرەزيدەنتكە ۇمىتكەر دەگەن «كوروچكا» الۋ بولعان. ونىڭ ساياسي ارەناداعى ەڭ بيىك شىڭى سول بولدى»، - دەيدى.

ال، ءامىرجان قوسان قيىن ساتتە ءوزىن ەشبىر وپپوزيتسيا جاقتاماي، جالعىز بولعانىن ايتادى. «ەگەر سول ساتتە مەنى وپپوزيتسيا قولداسا، جاعداي باسقاشا بولار ەدى»، - دەپتى. ءبىز ءامىرجان قوسان مىرزانىڭ سول پىكىرىن وقىرمان تالقىسىنا ۇسىنعاندى ءجون كوردىك.

ءامىرجان قوسان، ساياساتكەر:

- قۇرمەتتى اكەجان قاجىگەلديننىڭ نارىمباەۆقا بەرگەن سۇحباتىندا مەن جايلى جاعىمسىز پىكىر ايتىلعانى تۋرالى جەكەمە حاتتار كەلىپ جاتىر. وندا مەنىڭ ساياسي كارەرام اياقتالدى دەگەن سەكىلدى اڭگىمەلەر ايتىلىپتى. 

مەن قازىرگى رەجيمگە سىن كوزىمەن قارايتىن كەز كەلگەن ادامدى قۇرمەتتەيمىن. ول دا، كاجەگەلدين سياقتى، جەكە ءوزىمدى سىناسىن (بۇل قالىپتى جاعداي), مەن ءۇشىن، ازامات جانە ساياساتكەر رەتىندە، پليۋراليزم ۇدەرىسىنىڭ ءوزى جانە بالاما كوزقاراستىڭ بولۋى ماڭىزدى.

اكەجان اعا ءوز ەلىنىڭ لايىقتى ازاماتى. ول ەڭ كۇردەلى ەكونوميكالىق رەفورمالار كەزىندە پرەمەر-مينيستر بولعان. قازىر دە ەلدە بولىپ، ەلگە پايداسىن تيگىزسە دۇرىس بولار ەدى.

مەن ەشقاشان ءوزىمنىڭ ساياسي كارەرام تۋرالى ويلاعان ەمەسپىن. ەگەر سول كۇنى (پرەزيدەنت سايلاۋىنان سوڭ) بارلىق جاقتاستارىمدى كوشەگە شىعۋعا شاقىرسام، بىرىنشىدەن، مەنى بىردەن پوليتسياعا الىپ كەتەر ەدى، ەكىنشىدەن كوشەدە جەلتوقسان مەن جاڭاوزەننەن وتكەن ناعىز قىرعىن بولار ەدى. 

ەگەر مەن بىرىككەن وپپوزيتسيادان ۇمىتكەر بولسام، سول ساتتە باسقاشا بولار ەدىم! بىراق، مەن جالعىز بولدىم. جانە وسىنداي قيىن شەشىمدى ادەيى قابىلدادىم. قاجەگەلدين دە، ءابليازوۆ تا، تۇرسىمباەۆ پەن سارسەنباەۆ تا، ەرعاليەۆا مەن باپي دە، جۇكەەۆ پەن ماماي دا، بەرگەي دە سول ساتتە مەنىڭ قاسىمدا بولعان جوق. ولاردىڭ ەشقايسىسى ماعان كەلىپ: «ءامىرجان، ءبىز سەنىمەن بىرگەمىز!»، - دەگەن جوق. بارلىعى: «سەن كۇرەس، ءبىز كورەمىز»، دەگەندەي ۇستانىمدا بولدى. جالپى العاندا، الەۋەتتى سايلاۋشىلاردىڭ داۋىستارىن مەنىڭ كۆازي-سەرىكتەرىم ۇرلادى. ەگەر ءبىز ءبارىمىز بىرگە بولساق، جاعداي باسقاشا بولار ەدى!

ەندى قازىر ولار مەنىڭ باستى سىنشىلارىما اينالدى! اشىعىن ايتقاندا، سول كەزدە مەنى قولداماعانداردىڭ قازىر مەنى سىناۋعا مورالدىق قۇقىعى جوق.

سايلاۋ كەزىندە كاجەگەلدين ءبىر توپ قازاقستاندىقتاردى ءوز قاراجاتىنا پاريجگە شاقىردى. بۇل قاراجات سول كەزدە ماعان، ۇمىتكەر رەتىندە كومەكتەسەر ەدى. مۇمكىن اكەجان ءالى دە پرەزيدەنت بولامىن دەپ ويلايتىن شىعار؟ كورسىن! مەن ونى جانە دەموكراتيالىق ۇراندارمەن كەلگەن كەز كەلگەن ادامدى قولدايمىن!

سول سياقتى تۇرسىمباەۆ پەن سارسەنباەۆ تا استانادا كەزدەسۋ ۇيىمداستىردى، وعان دا قوماقتى اقشا جۇمسالدى (ول اقشا دا كومانداما كومەك بولار ەدى).

جۇكەەۆ پەن ماماي دا سايلاۋ كەزىندە ءۇنسىز قالىپ، قازىر مانساپتارىن انتي-كوسانوۆ تاقىرىبىندا جاساپ ءجۇر.

جۇكەەۆ مىرزا، مەن سايلاۋعا قاتىسقان كەزدە، ءوزىڭىزدىڭ جاقتاسىڭىزبەن بىرگە قايدا بولدىڭىز؟ جالپى العاندا، مەنىڭ داۋىستارىمدى ازايتىپ، مەنى ماسقارالاعان ءدال وسى وپپوزيتسيونەرلەر بولدى!

ولاردىڭ بارلىعى ماعان قارسى جۇمىس ىستەپ، بيلىكتىڭ قولىنا وتكەن سياقتى. مۇمكىن ولار سول ءۇشىن اقشا العان شىعار، بىلمەيمىن.

مەنىڭ ۇندەۋىم، شەتەلدە وتىرىپ ءوزىن وپپوزيتسيا سانايتىن جانە اپتا سايىن ميتينگكە شاقىراتىندارعا ارنالادى!

دوستار، سىزدەرگە كوفە ءىشىپ وتىرىپ ايتۋ، ەلدى كوشەگە شاقىرۋ وڭاي. ال، ءسىزدىڭ جەتەگىڭىزگە ەرىپ قانى توگىلگەندەر ءۇشىن كىم جاۋاپ بەرەدى؟ 

قازاقستانعا كەلىڭىز. سىناقتارعا، ۇرىپ-سوعۋلار مەن ارانداتۋشىلىقتارعا قاراماستان ەلدەن كەتپەگەن جانە وسى جىلدار ىشىندە ەلدىڭ دەموكراتيالىق دامۋى ءۇشىن بىردەڭە جاساۋعا تىرىسقان ءامىرجان قوسانوۆتىڭ ورنىندا بولىڭىز!

دايىنداعان نۇربيكە بەكسۇلتانقىزى

Abai.kz