پەتروپاۆل قالاسىندا 2009 جىلى 6 شىلدەدە بولعان جارىلىس.
مەرەكەلىك وتشاشۋدىڭ العاشقى دۇركىنى اسپانعا سامعاپ جارىلعانىمەن، ون سەكۋندتان سوڭ سناريادتار مەرەكەنى تاماشالاۋعا كەلگەن حالىققا، تۇرعىن ۇيلەرگە، كوشەگە قاراي اتىلدى. جاشىكتەگى پيروتەحنيكا وزدىگىنەن جارىلىپ، بىرنەشە ادام جارالاندى.
رەسمي مالىمەتكە سۇيەنسەك، 4 ادام جارالانعان، ونىڭ ءبىرى - پيروتەحنيكتىڭ ءوزى. ول باس جاراقاتىمەن جانە كۇيىكپەن 3-ءشى قالالىق اۋرۋحانانىڭ نەيروحيرۋگيا بولىمشەسىنە جەتكىزىلىپ، بىردەن مەديتسينالىق كومەك العان. وبلىستىق ىشكى ىستەر دەپارتامەنتى ءباسپاسوز قىزمەتىنىڭ مالىمەتىنشە، زارداپ شەككەندەردىڭ ءبارى دە قازىر ۇيلەرىندە.
وتشاشۋ بولعان جەرگە تاياۋ ورنالاسقان، جۋىردا عانا بوي كوتەرگەن «راحمەت» دۇكەنىنىڭ قاسبەتى سىدىرىلىپ ءتۇستى. سول ماڭايداعى ۇيلەر مەن دۇكەندەردىڭ، اكىمشىلىك عيماراتتارىنىڭ، سونىڭ ىشىندە قالالىق اكىمدىكتىڭ دە تەرەزەلەرىنىڭ بىت-شىتى شىقتى. زارداپ شەككەندەر، نەگىزىنەن، باستارىنا ساۋدىراي قۇلاعان شىنىدان جاراقات العان.
«وتشاشۋ باستالعان كەزدە، ءبىز ۇيدە ەدىك. ءبىر كەزدە ساتىر-سۇتىر ءبىر دىبىس ەستىلدى. كەلىپ قاراساق، تەرەزەمىز سىنىپتى. شىنى سىنىقتارى استىمىزداعى دۇكەننىڭ توبەسىندە جاتىر» دەيدى قالا تۇرعىنى ۆيكتور پوپپ.
تاعى ءبىر تۇرعىن نينا ستەپانوۆا: «ءبىزدىڭ ءۇيدىڭ ءبىر بولمەسىندەگى تەرەزەنىڭ جاقتاۋى ءتۇپ-ورنىمەن ۇشىپ كەتتى. ءۇيدىڭ ءىشى دە، سىرتى دا تولعان شىنى» دەيدى.
توتەنشە وقيعانىڭ كۋاگەرى لەۆ كارتاشوۆ: «ايەلىم دالادا وتشاشۋدى تاماشالاپ تۇرعان، ءبىر سنارياد ونىڭ قۇلاق تۇسىنان زۋ ەتىپ وتە شىقتى. ال مەن ەسىك الدىندا تۇرعام. جارىلىس تولقىنى ماعان دەيىن جەتتى» دەيدى.
پەتروپاۆل قالالىق ىشكى ىستەر باسقارماسىنىڭ باستىعى سەرگەي پۋرتوۆ جارىلىس بولىسىمەن پوليتسيا جىلدام قيمىلداپ، وقيعا ورنىن بىردەن قورشاۋعا العانىن ايتادى.
پوليتسەيلەر تاڭ اتقانىن كۇتپەستەن، ءتۇن ىشىندە ءۇي-ءۇيدى ارالاپ، شىعىنداردى ەسەپتەي باستادى. قاتتى قورقىپ قالعان جۇرتشىلىق كوپكە دەيىن تاراماي، بولعان وقيعانى اڭگىمەلەۋمەن بولدى.
وتشاشۋدى ۇيىمداستىرعان جەكە مەنشىك فيرمالاردىڭ ءبىرىنىڭ پيروتەحنيگىنىڭ ايتۋىنشا، ەكى جارىلىس بولعان، سناريادتار كۇتپەگەن جەردەن جارىلعان. ونىڭ سەبەبى ءالى ناقتى انىقتالعان جوق. پيروتەحنيكانى كىم شىعارعانى دا بەلگىسىز. ونى قازىر پوليتسيا انىقتاپ جاتىر.
تۇرعىنداردىڭ شىعىندارى كىمنىڭ ەسەبىنەن وتەلەتىندىگىن ءالى ەشكىم ايتا الماي وتىر. توتەنشە جاعدايلار جونىندەگى دەپارتامەنت مالىمەتتەرى بويىنشا، قالالىق ىشكى ىستەر باسقارماسىنا ازىرگە 15 ادامنان ماتەريالدىق شىعىنعا ۇشىراعاندارى تۋرالى ارىز كەلىپ تۇسكەن.
بيىل پەتروپاۆل قالاسىنىڭ كۇنى ادەتتەگىدەي 12 شىلدەدە ەمەس، 6 شىلدەدە تويلاندى. وعان قالا اكىمىنىڭ كەڭەسشىسى ۆالەري لوپاتكو قالانىڭ قۇرىلعان كۇنى 6 شىلدە ەكەنى تۋرالى تاريحي قۇجاتتاردى تاپقانى تۋرالى مالىمدەمەسى سەبەپ بولدى. بۇعان دەيىن بۇل مەرەكە حريستيانداردىڭ باسقا مەرەكەسى - اۋليە پەتر مەن پاۆەلدىڭ كۇنىنە ورايلاستىرىلىپ، جىلدا 12 شىلدەدە تويلانىپ كەلگەن-ءدى.

ارۋنا بۋلاتوۆا
"ازاتتىق" راديوسى 7 شىلدە 2009 جىل